Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
اعمدة و أراءقزاز ورزاز - محمد الطيب

ماشين الجامعة بملابس النوم !!

 

 

* تحدث الناس بـ(شراسة) وبـ(عقلانية) عن مشاكل الدراما السودانية ..

* حيث إتفقوا على ان (درامتنا شينة وكذلك شاشتنا) ..

* ولكن إختلف الناس حول الاسباب التى جعلت درامتنا بكل هذا (الغباء) والتواضع ..

* البعض يرى ان الإمكانيات هى سبب مباشر في هذا الفشل والبعض الاخرى يفسر الازمة بأنها (ازمة كادر) ..

* والكادر المقصود هو (الممثل والمخرج وكاتب السيناريو) ..

* اهل الدراما يعتبرون الازمة إقتصادية في المقام الاول ..

* المخرج السودانى سعيد حامد الذى بصم على الدراما المصرية ذكر قبل ايام انه يستطيع ان يخرج بالدراما السودانية من المحلية إلا العالمية إذا وجد ثلاثه مليون دولار ..

* وتلاتة مليون دولار يا سعيد حامد ممكن يدفعوها لعصام الحضرى لكن ما بيدفوعها للدراما ..

* انا وحسب وجهة نظري ارى ان كل ما ذكر من اسباب صحيح ولكن هنالك سبب اصح من كل هذه الاسباب ..

* قبل ثلاث سنوات تقريبا امضيت ثلاث اسابيع بالقاهرة .

 

* وخصصت اسبوعين من هذه الاسابيع الثلاث في البحث عن اسباب نجاح الدراما المصرية ..

* وجدت ان الدرما المصرية تملك كوادر موهوبه و(دمها خفيف) ..

* هذا في المقام الاول ومن ثم الدراما في مصر تحظى بصرف كبير يكاد يصل مرحلة البذخ .

* فضلا عن (شطارة كتاب السيناريو والمخرجين) وتوفر بيئة التمثيل والتقنيات المطلوبة لانجاح كل عمل درامى ..

* المصريين يصرفون على الدراما صرف حقيقى وفي ذلك هم كرماء كرم حاتمى ..

* أهم من هذا وجدت من خلال البحث ان الدراما المصرية في عدد كبير من انتاجها تقدم حياة واقعية تلمس عصب الواقع وتتناوله بشجاعة كبيرة ..

* ولكن ..

* مربط الفرس وبيت القصيد في البحث الذى توصلت له هو : (الشارع في مصر) و(الشارع في السودان) ..

* وهذه النقطة فيها مفارقات عجيبة جدا ..

* الشارع المصرى منضبط جدا جدا ..

* يمكن ان (تلف) في شوارع مصر اسبوع كامل لا تشاهد فتاة ترتدى ملابس عارية ..

* وحينما تفتح اى قناة وتتابع عمل درامى مصرى تجد (التعرى في ابشع صوره) ..

* ما تقدمه الدراما المصرية فيما يتعلق بالتعرى واللبس الخليع لا وجود له في الشارع المصرى ..

* وذلك لان الدراما المصرية في الغالب تنقل حياة (البار) وتقدمها في شكل فيلم يكسر الدنيا داخل وخارج مصر ..

* في السودان الشارع عندنا (منحرف) وقد بلغنا مرحلة متقدمة جدا من الإنحلال وسوء الاخلاق ..

* هنا التعرى واللبس الخليع اصبح عادى والما عادى اللبس المحتشم ..

* وحديثي هذا تسنده (معارض اللبس المحتشم بالخرطوم) ..

* في الخرطوم هنالك اماكن قليلة جدا مخصصه للبس المحترم ..

* وكل الاسواق عندنا مليانة على الاخر بالملابس الخليعة التى تخدش الحياء وتتنافى مع الدين والعادة والعرف ..

* اخلاقيا المسافة بين واقع الشارع السودانى وواقع الدراما السودانية كبير جدا ..

* ما في مقارنة بين الشايفنو بعيونا في الشارع والبنشوفو في تلفزيون السودان في اى عمل درامى ..

* في درامتنا بتلقى (المرا في غرفة النوم لابسه توب المرقة) ..

* وفي الشارع العام بتلقى البنات لابسات ملابس النوم وماشات الجامعة ..

* عشان كده بتشوفو درامتنا بعيدة كل البعد عن واقعنا ..

* وكلامي ده ممكن ادلل عليه بنجاح الدراما الاذاعية وبعض الاعمال التلفزيونية التى لم تعتمد على الشكل بشكل كبير مثل سلسلة حلقات (متاعب) ومسلسل (دكين) و(سكة الخطر) ..

* ولو دايرين زيادة نماذج ممكن اديكم ..

* هسه كده إتخيل لو مسلسلاتنا السودانية دى بيجيبو فيها بنات لابسات ملابس عاريه وخليعة ؟؟

* إتخيل بس ..

* ح تلقى الناس كلها متابعة المسلسل خاصة لو بقى كمان فيهو رومانسية ..

* والرومانسية واللبس العارى هسه في الشارع السودانى على قفا من يشيل ..

* شايفنو قدامنا لكن لما نشوف المسلسل ما بنلقاهو ..

* بتحس إنو درامتنا من العصر البايت ..

* قدييييمة ..

* المنطق بيقول نحن نمسك في الله وحريقة في الدراما ..

* ما بنبيع الدين عشان درامتنا تنجح ..

* الحاجة دى اصلا ما بنجامل فيها ..

* وده سبب مكلة الدراما السودانية يا اولاد الحلال ..

* او هو من اكبر الاسباب ..

* نحن ما بنقول اعملوا لينا دراما عاريه لكن بنقول لو دايرين الدراما السودانية تنجح اضبطوا الشارع ..

* المفروض البنشوفو في مسلسلاتنا ده يكون هو واقعنا في الشارع العام ..

* بنات ماشات الجامعة بملابس نوم !!

* نحن في الملابس بقينا اكعب من فرنسا ..

* عموما دى وجهة نظري في موضوع الدراما ..

* واى زول طبعا حر في (وجهاتو ونظراتو) ..

* بنقدم في التلفزيون بنات ما عندهن علاقة ببنات الواقع ..

* ده اس المشكلة ..

* يا استاذة : كلم الناس ديل يركزو مع المسلسلات الدينية فذلك افضل لهم ولنا ولكم ..

*برجع وبقول ما ورد هو واحد من مشاكل الدراما الكتيره والعبدلله لم يدعو لدراما عاريه ولكنني اطالب بضبط الشارع حتى يستقيم عود الدراما الاعوج او نركز كل جهدنا في المسلسلات الدينيه والتاريخه فربما نصيب نجاحا معقولا ..

* و..و..

* والله في ..

مقالات ذات صلة

اترك تعليقاً

إغلاق
%d مدونون معجبون بهذه: