Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
اعمدة و أراءقزاز ورزاز - محمد الطيب

مجانين اجانب وصوت الخروف اهم من الخروف !!

ترويسه قزاز ورزاز copy

رغم الحصل والكان ياما صبرتا عليك 
كان العشم جواى تصدق معاى عينيك 
لكن غرورك فاض كتل البراءة الفيك 
خلاك تقول مجبور أنا بكره برجع ليك 
اوعك تظن فى يوم أنا قلبى برض الذل
او يستكين هيمان ويرجاك عند الضل
انت الفتحت الباب وقت للخصام ادخل 
وانت الزرعتا الشوك وقلعت شجر الفل

 

* من مفارقات الحياة الإقتصاديه اننا في (عيد الاضحى) نرتاح من الفول ، بينما (الناس ديلك) في (الاضحى) يرتاحون من (اللحم) ..
* إحنا (الفول) معانا السنة كلها ما عدا يوم (الضحيه) ، والناس ديلك (اللحم) معاهو السنه كلها ما عدا يوم (الضحيه) ..
* وما بين الناس ديل والناس ديلك يموت (ألف طفل في السنة) بسبب الجوع وهم لا يجدون لا الفول ولا اللحم ..
* وصف الشاعر والصحفى الكبير سعد الدين أغنية (خبر الشؤم) بأنها (قلة أدب) ..
* سعد الدين ذهب ابعد من ذلك وهو يقول : (أنا اخشى ان تكون الأغنيه كتبت من اجل المغرزه والهدف منها توصيل رساله لفنان معين يمارس هذا الفعل) ..
* ما كتبه استاذ سعد خطير وخطير جدا يا هيثم عباس ..
* في كل عام تقوم حكومة ولاية الخرطوم بتغيير (مواقف المواصلات) ..
* بغيرو في (المواقف) وهى اصلا مواصلات ما في ..
* التغيير يحدث احيانا من اجل (شوفوني انا شغال) ..
* يشيلو مواصلات (الحاج يوسف) يودوها محل مواصلات (الكلاكله) ، بعد شويه يشيلو مواصلات (الثوره) يدوها محل مواصلات (الصحافه) ، ولما تجى الموقف بتلقى اى حاجة ما عدا المواصلات ..
* في السودان موقف المواصلات فيهو اى حاجة ما عدا المواصلات ..
* ممكن في الموقف تلقى (الموز والبرسيم وسم الفأر والبرتقال والسمسميه والحراميه) لكن ما بتلقى المواصلات ..
* والله مرات نبكى من كفرنا ومرات كفرنا يبكى الكفار ؟؟
* حتى وقت قريب كنت اظن ان (صلاح ولي) يتبع لكورس (الفنون الشعبيه) ولكن عرفت من بعض الاصدقاء ان صلاح ولى فنان قائم بذاته ..
* انا اشكر هؤلاء الاصدقاء على تصحيح المعلومه ..
* زيادة اسعار (المشروبات الغازيه) هو (طمع) من اهل الشركات ..
* وإحنا سنقابل هذا (الطعم) بكثر من (البخل) ..
* إنتو (اطمعو وإحنا نبخل) ونشوف في النهايه الخسران منو ؟
* ح نرجع للكركدى والتبلدى .. ومشروباتكم الغازيه دى إستحمو بيها عليكم الله ..
* كل الناس دون استثناء يعرفون جيدا فضل (صيام يوم عرفه) ..
* وبما ان ذلك كذلك فهى دعوة لللتذكير بصيام هذا اليوم المباركه ..
* وقبل هذا نسأل الله العلى القدير ان يوفقكم ويوفقنا لصيام يوم عرفه ويتجاوز عن سيئات اعمالنا وافعالنا وما ظلمنا به انفسنا ..
* امييين يارب ..
* قبل يومين وأنا (سارح كده) راجعت زكريات العيد الفات ..
* في العيد الفات قابلت حوالى (52) فتاة ..
* الـ(52) فتاة ديل كلهم في العيد الفات قلت ليهم : (السنة الجايه ان شاء الله عروسات) ..
* وهسه العيد باقى ليهو (يومين) والـ(52) بت لسه ما في زول دق ليهن الباب ..
* يبقى أنا شايف إنو المشكلة في الباب ..
* المشكلة ما في الزول البدق الباب بل المشكلة في الباب ..
* انا شايف كده ..
* واى زول طبعا حر في (شوفو) ..
* قلت المشكلة في الباب ولم أفسر وارجو من القارئ الكريم ان لا يفسر ايضا ..
* لان الذكاء في التفسير يفسد (بعض النوايا) ..
* وعايز أقول حاجة واحده بس ..
* كل الناس (بخطبو بعد داك بعرسو) ..
* يقول ليك : (خطوبتي في العيد والعرس شهر 12) ..
* إحنا وأولاد حلتنا دايرين نعكس الآيه ..
* يعنى الواحد يعرس بعد داك يخطب ..
* دايرين نكسر النمطيه والتقليديه ..
* تعرس الليلة وبعد سنة تخطب مرتك ..
* مرتك بـ(الصاء) ..
* ورد في الأخبار ان (معتمد مدنى) اتهم محليات ولايه الجزيره بأنها تقوم بارسال (المجنانين) إلى مدنى ..
* سعادة المعتمد يرى ان المحليات والمدن في الجزيره تقوم بارسال المجانين العندها الى مدنى ..
* يعنى حسب كلام المعتمد ده (نص مجانين مدنى) هم (مجانين من بره مدنى) ..
* يعنى (مجانين ضيوف) ..
* جايين إعاره ..
* محترفين ..
* والله يا سعادة المعتمد إحنا سمعنا بـ(السيل) البجى من بعيد لكن حكاية مجنون من بعيد دى اول مره نسمع بيها ..
* وبعدين أنا عندي سؤال لسعادة المعتمد .. السؤال هو : انت يا سعادتك بتعرف كيف ده مجنون مدنى وده مجنون ما من مدنى ؟؟
* كده ورينا عشان إحنا زاتنا نقدر نعرف معاك ..
* ورينا مجنون مدنى بيكون كيف ومجنون المناقل كيف ومجنون ود سلفاب كيف ؟؟
* هسه في حلتنا عندنا مجنون انا شاكي إنو يكون (مجنون من القضارف) ..
* والله غايتو جنس غايتو ؟؟
* المسؤولين ديل بعد مرات بيقولو كلام يحيرك ..
* ياخى القضيه قضيه إنو ديل مجانين نشوف جنو كيف والعلاج شنو ؟؟
* مش نقعد نقول ديل مجانين مدنى ولا مجانين ما مدنى ..
* حاجه تكسف ..
* اى حفل جماهيري لاى فنان شاب سيكون ناجح وذلك لان الحفلات الجماهيريه عند الفنانين الشباب بقت فيها (حشد) ..
* الفنان بيكون عندو (قروب) والقروب ده فيهو ألف نفر من اولاد الحله واصدقاء الطفوله والاهل يعزمهم الحفل ويجو يقوم تانى يوم يقول ليك الحفل نجح وادهشني ..
* ادهشك بـ(الناء) ..
* الكلام ده تقولو لزول ما اكل باسطه قبل كده ..
* قال ادهشني قال ..
* اسوأ (خمسه) حاجات في الدنيا دى (تلاته) هى : (تكون ما ضابح وتجيك ريحه الشيه من الجيران) و(تجيك ريحه الشيه من الجيران وانت ما ضابح) ..
* خوفا من الاحراج .. جرب صوتك الخروف قبل ما تشتريهو ..
* وتأكد ان الصوت (الجهور) عند الخروف اهم من (اللحم) ..
* وخروفكم لو ما أكل ملايتكم احسن تبدلو عشان نسابتك ما يشيلو حسك ..
* زمان إحنا بنتكيف لما خروفنا يأكل ملاياتنا ..
* وبنتكيف اكتر لما خروفنا يأكل (ملايه بت جيرانا) ..
* اصلو إحنا تاريخنا بنحب نشوف (زعل بنات الجيران) ، عشان كده خروفنا بحقق بعض امانياتنا ..
* غايتو السنة دى من شدة شوقنا للحم إحتمال نأكلها (نيه) ..
* ونركب صافنات ونجيبه (كباشيه) واصلو الزول بموت والذكرى تفضل حيه ..
* يا استاذه : كل ما أقول انت رومانسية بتخزليني وتعملى الكمونيه ..
* خليك كده ..
* ان شاء الله الكمونيه دى تضوى ليك ..
* و..و..
* وإذا الخاطر سرح عنك تأكد إنو …(مشى يجيب الخروف) ..
 

مقالات ذات صلة

اترك تعليقاً

إغلاق
%d مدونون معجبون بهذه: