رامز سراج :عمر الامين وندي القلعة ابرز مفاجات الموسم الجديد من ميلودي كار

ريبورتاج:حسين علي
برنامج ميلودي كار  برنامج ترفيهي غنائي يقوم علي استضافة الفنان بداخل عربة ويقدم داخل هذه العربة احد اعماله ويقوم سائق العربة الموسيقي"رامز سراج" بالعزف اثناء القيادة بعد بث اولي حلقاته تجاوز عدد مشاهداتها العشرة الف مشاهدة في فترة وجيزة واستطاع خلق جمهور ومتابعين اردنا من خلال هذا التقرير معرفة كل مايختص بهذا البرنامج فجلسنا الي الموسيقي رامز سراج صاحب الفكرة والضلع الاساسي بالبرنامج فكان هذا الحوار

في البدء من اين اتت فكرة البرنامج؟
كانت الفكرة من انو انا واصدقائي كانا جالسين بالعربة الخاصة بي وكان معي ألتي الموسيقية "ميلوديكا " فقررنا فجاة ان نقوم بالعزف فقام احد الاصدقاء بوضع كاميرا لتسجيل فيديو ورفعنا الفيديو المسجل علي الفيس بوك فحصد 10.700 مشاهدة في فترة وجيزة فاقترح الاصدقاء تكرار هذه التجربة لانها جميلة فاتت فكرة انشاء صفحة خاصة لها بالفيس بوك وكل مرة جديدة يستضاف فنان فاذا كان يجيد العزف فبامكانه العزف معي رفقة الميلوديكا .
طيب الفكرة شنو من البرنامج؟
الفكرة تقديم مادة خفيفة الظل في مكان غير مالوف اللي هو العربية بشكل جديد ومختلف. وانو نوضح للناس انو الموسيقي مامحتاجة لي مكان معين.
توقف البرنامج في الفترة الحالية لماذا؟
وقفتنا الحالية لرفع جودة التصوير
لماذا اختيار اسم ميلودي كار تحديدا؟
 كلمة ميلودي تعني النغم وفي نفس الوقت "ميلوديكا" هي اسم الالة التي اعزف عليها فمع اضافة حرف ال"ر" تصبح ميلودي كار وتعني عربة الميلودي.
ضيق العربة الم يشكل مشكلة ؟
ضيق العربة شكل مشكلة لكن استطعنا التعامل معها ففي اول حلقة كانت مع ابراهيم بن البادية حاول بقدر الامكان ان يجلس مرتاحا حتي تم ارجاعه للمقعد الخلفي. و
هل البرنامج مرتبط بالعربة الحالية؟
 يمكن البرنامج ارتبط بالعربية وبشكلها وحتي اللوقو  لكن البرنامج مامرتبط بالعربة الحالية لان الفكرة الاطلاع علي جوانب اخري في حياة نجمك المفضل بعيدا عن المسرح واي مؤثرات في الصوت او ساون
لي قدام ممكن الموضوع يتطور
هل هنالك حهة تمول او ترعي البرنامج؟
الي الان انتاج الحلقات ذاتي وجاتنا بعض العروض من عدد من الجهات لم تري النور وبالنسبة لنا موضوع الانتاج غير مكلف حاليا
هل ستكون هنالك حلقات راتبة للبرنامج؟
مفترض باذن الله ان تكون الحلقات شهرية ولكن لظروف الانتاج المقنن نحن متاخرون وباذن الله بعد معاودة البرنامج ستكون الحلقات دورية .
هل هنالك صعوبات واجهتك قبل تنفيذ الفكرة لارض الواقع؟
هي صعوبات في اماكن التصوير فلتصوير البرومو كنا لافين يوم كامل لايجاد مكان هادي لتصويره بالاضافة الي مشكلة اصوات العربات والعربة نفسها اثناء التصوير تسبب تشويش والسخانة ايضا وصعوبة التعامل مع كاميرا بروفيشنال ووضعها داخل العربة .
وسائل التواصل الاجتماعي ومدي الاهتمام بها؟
بالنسبة لي هي زي مقياس حب الناس لي حاجة فبعد رؤية حب الناس لما تعمل شرعنا في عمل صفحة الفيس بوك وسيتم انزال الحلقات بها لكن نريد انزال اكثر من حلقة مجموعة حلقات لان الناس انتظاره طال.
وتوجد لدينا قناة في اليوتيوب بنفس الاسم لكن الي الان لم يتم رفع فيديوهات بها وفي انتظار تجميع اكتر من حلقة لرفعها مجتمعة وتعويض الناس عن فترة الانتظار الطويلة الماضية.
هل ممكن نشاهد البرنامج بدون رامز كمقدم؟
 من المفترض ان يكون رامز يعزف الفكرة مختلفة ماتقديم الفكرة انو تطلع من الدور بتاع الاسئلة التقليدية التي تسال للضيف او الفنان مادام نحنا في مكان غير تقليدي الفكرة انو ننتج مسيقي جميلة وانا مامقدم برنامج لكن صاحب فكرة وداير اعزف مع الزول يمكن لي قدام اذا الفكرة نجحت ممكن نطور فيها باذن الله
ماهي معايير اختيار الفنان ؟
عادة يكون بناء علي حبي الشخصي للفنان كموسيقي واستمتاعي معه لان البرنامج ليس تجاري غير تابع لشركة ونتاجي الخاص عشان كده بتحس بالحاجة بسيطة
علاقتي الشخصية مع الفنان او حبي ليهو ده المعيار البخليني افكر استضيف الفنان لاني بعتبر نفسي قدام الفنان مرات جمهور واعجابي بالفنان بولد فكرة اني اكون عاوز اتعامل معاهو واشتغل معاهو في الحاجة البحبها اللهي الميوزك .
عندي افكار كتيرة جدا انا مفروض اتعامل مع ناس وانا عندي مسؤلية كبيرة جدا تجاه الزول المفروض اتعامل معاهو بالنسبة لي انا مابقدر استضيف زول انا ماحاسي انو هو بشكل في ناس مهمشين غير معروفين نوع زي ده من الفنانين انا عاوز استضيفو يعني وانشاء الله حتكون في استضافات لي اكتر من زول

 

اليس من الممكن ان يكون الجمهور طرف في اختيار الضيف؟
تناقشنا في هذا الموضوع وانشاءالله الفترة الجاية حيكون في استشارة للجمهور اذا نفسهم يشوفو منو وحابين منو ونشوف راي الجمهور زاتو وبعداك علي حسب الظروف المتاحة للفنان انو هل ممكن يكون معانا ولا لا اذا موجود ولا عندو ظروف فبحاول علي قدر الامكان البي رغبات الناس وبالمناسبة انشاءالله لي قدام جميع الشخصيات الشبابية المؤثرة في الوسط الفني ماهم شرط يكون فنان جميع الشخصيات اللي ممكن تكون مؤثرة او الناس حاباها ممكن تستضاف في المرحلة الجاية.
طيب ممكن تكشف لينا مفاجات الموسم الجديد للبرنامج؟
باذن الله الناس تترقب عمر الامين –محمد الطيب-محمد علي وفي انشاء الله لي قدام اصوات نسائية مختلفة .

بمناسبة الاصوات النسائية دي مثلا زي منو؟
انشاءالله في استضافة لي نانسي عجاج وندي القلعة وباذن الله بنحاول نصل جميع الشرائح السودانية .
هل من الممكن ان نري ميلودي كار علي شاشة احدي الفضائيات ؟
جاء عرض من قناة انغام انشاءالله احتمال كبير يكون بيناتنا تعاون بس لسه ماقعدنا للتفاصيل بس انا اكون سعيد لو اتعاونت معاهم بس بالنسبة لي ماعندي مشكلة انو برنامجي يكون علي قناة اليوتيوب الخاصة به.
الجمهور المنتظر ميلودي كار ماذا تقول له؟
بقول ليهم ياخي اجمل حاجة في الدنيا انو الفكرة تبدا من فراغ وتنطلق لي فراغ كبير جدا ودي حاجة جميلة شديد وانا مبسوط جدا انو الحاجة الكانت ونسة قلبت جد وبقت صفحة وعندها معجبين وبعتذر ليهم جدا علي التاخير وانا متاسف بتمني بس من ربنا اقدر انجز في الفترة الجاية دي واقدم ليهم حاجة ترضيهم وتعوضهم الانتظار وبشكرهم شديد علي دعمهم ومشاهدتهم للعدد الكبير من المشاهدات الاذهلنا وخلانا نقلب الفكرة جد
من المواقف الطريفة  للبرنامج؟
مع ابراهيم بن البادية دايما بتمر مواقف لطيفة ابراهيم دايما مشغول بكون عندو شغل  فكنا بنفتش في حتة نصور فيها البرومو ففي النهاية ابراهيم اقترح لينا حتة خطيرة جدا  كانت  الباركن المقابل للقصر الجمهوري فصورنا فيهو وبالنسبة لينا كانت مجازفة كبيرة جدا ورمينا اللوم والمسؤلية علي ابراهيم والحمدلله ماحصلت لينا حاجة .
هنالك تشابه بين فكرة البرنامج وشق الديار؟
الحقيقة لو الناس تابعت حينما انشئت صفحة البرنامج علي الفيس بوك كان قبل شق الديار بفترة وفكرتي بدت قبل شق الديار وفكرة شق الديار مختلفة فيها مذيع بقدم البرنامج والفكرة هنا في الميلودي كار انو مقدم البرنامج هو بيعزف وهو يستضيف الناس وهو السائق وهو القائم بكل شي ففي فرق كبير جدا بين التجربتين .
ماهي اهداف البرنامج؟
ابراز المعالم المهمة في شوارع الخرطوم فنحنا انشاء الله حنشتغل بي كميرتين كميرا داخل العربية وكميرا خارج العربية .
جزء بكون للتذكير وربط للاماكن بالنسبة للمغتربين والمهاجرين خارج السودان الطولو ماشافو البلد وربط لي حبك واهتمامك انت كمشاهد اهتمامك المشترك مع الفنان اذا كان هو بحب ياكل في المكان الفلاني وانت بتشوفو بتربط زكرياتكم مع بعض
ميلودي كار حتكون في الخرطوم بس؟
ممكن جدا ونحنا انشاءالله مفكرين نسافر بره الي مختلف الولايات بس خلينا نبدا حاجاتنا هنا بعداك باذن الله.
كلمة اخيرة في الختام؟
بتمني بس انو اي زول عندو فكرة جديدة يحاول يعمله بصورة عامة وبتمني اي عندو اي احساس فني او احساس بتاع ابداع موجود جواهو يحاول يطلعو والحتة مامشكلة سواء كانت في عربية "يضحك" اومسرح.
وسبل انتاج المادة لن تشكل عائقا امام الافكار الجميلة.
|||||هوامش من اللقاء|||||
ميلودي كار تتيح لمعجبي الفنان مشاهدة جوانب خفية وتقربه من حياته
نحاول تطوير الفكرة عند استضافة الفنان نحاول زيارة اقرب الاماكن لقلب الفنان او المفضلة بالنسبة له.
توجد بعض الافكار لتغيير العربية وهنالك فكرة تسجيل الحلقات في عربة الضيف نفسه.
حتي كان عندنا محاولات مع فنانين غير سودانيين بيجو هنا بكون في ورش بينشتغل فيها كان في مقترحات للفكرة دي بس هي كان في مشكلة في التنظيم لكن باذن الله الحاجة حتكون اجمل واكبر
 البرومو

 


 

 

اضافة تعليق

Powered by Facebook Comments

اضف رد

%d مدونون معجبون بهذه: