زغرودة كاربة

نواعم ولكن – ميناس عبدالمتعال
في عيد الأضحية السعيد دلف المصلين بعد الصلاة للجيران للتهاني والتبريكات والأماني الطيبة بحنية وطيبة السودانين ،ياناس البيت السلام عليكم  وعيدكم  سعيد : عليكم السلام مرحب مرحب إتفضلوا علي  البيت   القابلة في عرفة والعفو والعافية ،صحبة ولله والرسول ، تلك من أجمل عبارات المعايدة التي يتداولها الناس في أيام العيد فقد إحتوت علي التبريكات وتصفية النفوس من شوائب النفس البشرية فتحلت بطابع التسامح .

سيد أحمد فتش لضباح بعد الصلاة وما لقي بالهين ،وصفوا ليهو واحد في أخر الحلة جابوا وجا وضبح الخروف وقطع لحمتوا ودخلها المطبخ كانت الساعة 12 جات نادي سميرة يامراة  آها جبت الضباح من آخر الدنيا ، دي اللحمة جيهينا تب بالشية والنية وأهم شئ شية الجمر ، : كويس ، سميرة ختت حللها وصاجها في النار وقامت علي الشربوت تشوفوا ظبط ولا لسة باقي البلح مبلول يومين ، ولانه اللحمة سمحة ما أخدت زمن في النار كتير ، بس سيد أحمد زيوا وزي كل الرجال (لهلاه شديد وغلبوا الصبر وفي الأكل مابتفاهم ) ياسميرة يامرأة وين الفطور الجوع كتلنا الساعة بقت 1 دا بقي غداء عديل  ، والرجال ديل أنا حلفت عليهم طلاق يفطروا : ياراجل ما لقيت تحلف الإ طلاق ويوم العيد كمان وبصوت خفيض (ينطلق بيكك أم شراع) رفعت صوتها شيل الصبر أنت اللحمة دي جبتها متين شوية وتجهز :

خلاص خففي يدك ، أخفف يدي أكتر من كدا حااااااضر وبتحت تحت (أقلبها بوتجاز ولاشنو غايتوا الرجال ديل !) دقائق بس والأكل يجهز ، ريحة الشية طقت وصفرة الرجال طلعت وسيد أحمد شال الصينية الصالون باقي حلف علي جيرانوا ، الجماعة ضربوا اللحمة تمااام وجوا للزيادة : سميرة زيدينا لحمة : كويس ، سيد أحمد تم 5 دقائق وجاء تاني يا مرأة أملي الصحن دا في نفرين دخلوا علي هسي: دي كفاية ، لا زيديها الخير راااقد واللحمة كتيرة ولو في الصاج كملت شدي غيرها وراك شنو ؟؟ ردت بغيظ شديد الله يصبرني أنا أشد وإنتو تآكلوا لاشكيرة لا حميدة تعباً للأجر : شيل الصحن والشربوت جاهز : كويس : جهزي معاك الشاي والجبنة : سمح كدي تموا فطوركم ؟ سيد أحمد جاب صينيتوا وجاء الحمدلله بطونا إتملت للسدادة الإ جيبي الشربوت نهضم بيهو ؟ هاك شيلهم كلهم جهزتهم : أيوه كدا خليك مرأة حرة سريع سريع حاجاتك جهزيها ماتتطمشي : هسي متين إطمشت أنت شفغتك دي أصلك مابتخليها وغير سوي وجيبي يامرأة ماعندك لي حاجة ، عاوزاك يوم واحد تبقى زي أحمد راجل خديجة : مالو أحمد ؟ ممهول وكل ماخديجة تسوي حاجة يشكرها ليها كان سوت شاي ساي يقول ليها تسلمي لي يانور عيوني : الإ أنا الله لي الرماني في الجعليين شنو؟ تطير عيشتهم !: إنتي من قبيل ما تقولي عشان كدا مركبه وش !دايرة النصيحة ولا غيرها : النصيحة ياسيد أحمد :انا ثقافة نور عيوني دي ماعندي الإ كنشك طاعم والبراك سوداء صحي مقصر فيك وعلي الطلاق أرضيك وأسوقك عمرة رمضان آها إنبسطتي ، فإنفرجت أساريرها مطلقة زغرودة كاربة عانقت عنان السماء وأنستها تعب الأيام الماضية، والله حيرتونا كلمة بترضيكم ،

عيد سعيد وربنا يديكم الصحة والعافية …

 

اضافة تعليق

Powered by Facebook Comments

%d مدونون معجبون بهذه: