أخبار الرئيسية (سلايدر)لقاء الاسبوع

ابي كنة: طول قامتي عامل لي ازمة مع ناس الإضاءة..و بحاول ما اتأثر بأي زول

حسام محي الدين من أميز المذيعين وشيبة الحمد من المقربين

حوار: ملاذ ناجي

مذيع شاب صاحب امكانيات صوتية وثقافية كبيرة عرفه المستمع عبر صباحات اذاعة هلا 96 بصوته المميز قبل ان ينتقل لعوالم الاخبار عبر فضائية الشروق (ابي كنة) التقته ريبورتاج في دردشة خفيفة وخرجنا بالآتي:

ابي هلا وابي الشروق ما الفرق واين تجد نفسك اكثر؟

اجد نفسي في كل ضروب الاعلام لأنني لطالما احببت هذا المجال وعن الفرق فلا فرق يذكر فكله يندرج تحت مسمى العمل الاعلامي الذي يتطلب منك تطورا طبيعيا في كل الاصعدة مهنيا وثقافيا وفكريا مع كل مرحلة.

يتهمك الكثيرين بتأثرك بالمذيع محمد عثمان؟

ضاحكا: ياخ انا بعاني من الحاجة دي وعن نفسي ماشايف اني بشبهو في شي الا كان في الطول والناس دايما بتقول لي كدا لكن انا ما بحب اقلد زول ولا اتشبه بزول وان كان الموضوع دا محمدة لو الناس شايفة اني ماشي في نفس خط النجاح المشى فيهو محمد.

بل تأثرك بمحمد واضح في طريقة قراءة الخبر مسكة الورقة التعبير الاول مع بداية النشرة…الخ؟

طيب شوفي انا لما جيت الشروق وبديت اقدم النشرة محمد كان لسة شغال منوعات وما قدم (مانشيتات سودانية) وانا كأبي بحاول جدا اني ما اتأثر بزول ولا اتصنع تون بتاع صوت ابدا وبحاول علي قدر ما اقدر ااني اكون طبيعي وتلقائي.

أنت معروف بأنك أطول مذيع سوداني قامة؟

طبعا الموضوع دا عامل ازمة لي ناس الاضاءة وطوالي بشتكو لكن في برضو عمر عائس ومحمد عثمان من القامات الطويلة وان كنت افوقهم قليلا.

هل قوة صوتك هي ما اهلتك للإنضمام الي اذاعة هلا في بداياتك؟

مع ان صوتي اذاعي ولكن تم قبولي لاسباب مجتمعة وليس الصوت فقط وانما الثقافة والحضور وسرعة البديهة وغيرها من الصفات الواجب توافرها في المذيع.

وكيف التحقت بالشروق؟

طلبوني ودخلوني المعاينات ومريت بكل المراحل الصعبة والمرهقة.

تمتلك اغرب هواية وهي تعلم اللغات ولذلك انت دائما في حالة دراسة؟

بحب اللغات جدا وبحب اكتشف عوالمها وعندي حلم كدا اني في يوم من الايام ممكن اقدر اتكلم كل الغات الموضوع دا ممكن يكون صعب لكن ما مستحيل وعلي فكرة حتي اللغة العربية حقتنا دي انا بتعلم فيها لأنها لغة صعبة وجميلة في آن وفي عوالم وبحور كتيرة جدا.

ابي انت مغرور جدا ومفلسف؟

دا حكم ولا سؤال؟

بل هي بعض من صفاتك؟

ابدا والله ماحقيقي انا بس بشغل مخي ما بتكلم ساي وبعدين ياخ الفلسفة دي علم يدرس وعن الغرور يمكن الناس الما بتعرفني تشوف كدا لكن زول بسيط جدا وعادي واكتر شخصية ايجابية في الدنيا.

من جانب آخر انت مرح وساخر جدا وشخصيتك لا تليق بجمود الاخبار؟

اللغة العربية هي التي تفرض عليك الجدية ونمط البرنامج الاخباري كذلك واستطيع ان اكون جادا في عملي رغم مرحي.

برأيك من أفضل مذيع سوداني من الجيل الحالي؟

أحمد الرهيد وهو شاب مؤهل جدا ومثقف وحسام محي الدين اري انه من اميز المذيعين.

ومن أفضل مذيعة سودانية؟

ما مركز معاهم شديد

ما الفرق بينك وبين المذيع النجم؟

مافي فرق وعن نفسي في ناس بستمتع بشغلهم وناس لأ.

هل الشروق محطتك الاخيرة في الفضائيات السودانية؟

هذا في علم الغيب وما معروف بكرة داسي شنو.

بمعني لو جاتم عروض من محطات سودانية اخري بتقبل؟

حاليا أنا مرتاح في الشروق.

في البدايات هل كان حلمك الشروق ام النيل الازرق؟

بل كان حلمي الاستقرار وان اطور من نفسي.

النجومية في الشروق للشروق وليست للمذيع؟

بالعكس النجومية للقناة والمذيع معا بعدين الاهم انو القناة منظمة وامورها واضحة والسستم واضح.

كيف هي علاقتك بزملائك الاعلاميين؟ ومن الاقرب اليك؟

علاقتي جيدة واحاول ان اكون مجامل في حدود المعقول مع الناس كلها وان كانت علاقاتي الخاصة خارج الوسط اكبر وفي الوسط شيبة الحمد واحمد الرهيد وابي عبدالحليم وسالم الهاشمي هم من المقربون.

في تيم الاخبار انت المذيع الوحيد الغير متزوج فهل من الممكن ان تتزوج من الوسط؟

لا اعتقد لاني مقتنع بمبدأ الاختلاف في الطباع والمهن وغيره وان كنت لا ادري اين النصيب
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

زر الذهاب إلى الأعلى