أخطر من الايدز !!

قزاز ورزاز – محمد الطيب 
شفاف وشوفتك شفا وزعلك يشفق وبعترف في سري في الغيب من سنين ما قايل الغيب بنكشف سامحني مرة إذا نسيت وما تبقى صارف ومنصرف لو مرة حق الريدة هان أنا ليّ عليك حق الولف أنا عندي ليك سر من زمان داير اقولو ومنكسف كل ما اقول قربت ليك تلقاني بادي من الألف
* في هذا الدنيا هنالك بشر تتوفر فيهم كل مواصفات (ملاح البامية المفروكة) ..
* وأفتكر أكتر حاجة إشتهرت بها (البامية) معروفة بالنسبة لكم ..
* المسرح هو (أبو الفنون)، وفي سوداننا الحبيب المسرح هو : (الإبن غير الشرعي للفنون) ..
* المسرح عندنا (لقيط) ..
* حاجة تكسف ..
* حرم النور وندى القلعة (وجهان لعملة واحدة) ..
* هنالك تشابه كبير بين ندى وحرم ..
* ولكن الذي يُحمد لندى ولحرم ان كليهما يعتمد على أغنياته الخاصة ..
* المذيعة التي قالت أن (المُهر) هو ولد (الأسد) هي نفس المذيعة التي قالت ان (جبل مرة) يتبع لجنوب السودان ..
* والمدهش فعلا ان هذه المذيعة لا تزال تعمل في القناة المعروفة وتظهر في الاسبوع الواحد أكثر من ثلاث مرات..
* والغريب في الأمر جدا، إنو الجماعة بيقولوا ليها (أستاذة) !!
* زولة بتقول (المهر ولد الأسد) وهم بيقول عليها (أستاذة) ..
* دي (إصتاذه) ما (أستاذة) ..
* يا أصتاذة لو المهر ولد الأسد زي ما قلتي.. (الدحش) يبقي ولد الفيل وألا شنو ؟؟
* (الشعب السوداني) و(النوكيا) قصة حب قديمة من زمن (تلاتين عشرة) ..
* الآن (السامسونج) مثل الشيطان دخل بين (السودانيين والنوكيا) فخرب العلاقات، ولكن يا الجلاكسى يبقى الحب للحب الأول مهما كانت (مغريات اللمس)..
* كلما استمع لصوت الفنانة ريماز ميرغني أحس بأن هنالك (مسكول) من رقم غريب ..
* لو جاك (مسكول) من رقم غريب أنت بتقول : (ده منو البيمسكل ده) ؟؟
* وإحنا وأولاد حلتنا كلما سمعنا صوت ريماز تجدنا نقول: (دي منو البتغني دي) ؟؟
* من تعاسة الحظ ان (تحب أنت) و(يتزوجك غيرك) ..
* في ناس كده ..
* هو يحب ويتزوج غيرو ..
* عندنا ولد في حلتنا كل ما يحب ليهو واحدة بيجي واحد يتزوجها ..
* يحب ليهو بت الليلة بعد أسبوع بيجيها عريس ..
* البنات بقن بيتفاءلن بحبو ..
* في واحدة من بنات حلتنا قدر ما (إتراشقت وإتخففت) عشان الولد ده يحبها أصلو ما حباها ..
* في النهاية هي إتوكلت على الله وحبت الولد ده ..
* أول ما حبتو قام هو إتزوج بت خالتو ..
* غايتو جنس غايتو ..
* قبل (الفيسبوك والواتساب) كانت الفتاة تنام مبكرا وتصبح الصباح عيونها متل (الفناجين) ..
* عيون فيها حيوية ونشاط وبياض وصفاء ..
* البت تلقاها من تسعة بتنوم ..
* لو الصباح شفت عيونها أنت النهار كلو تقعد تشرب في (الكركدي) ..
* كركدي وما عرفت لي ..
* هسه مع السهر وونسة الليل البت الصباح تلقى عيونها زي الزول الخاشي ليهو في (ورطة) ..
* زي الزول الما عارف يدبر قروش (السماية) ..
* سماية بـ(الخاء)؟؟
* ورد في أخبار الأسبوع الماضي خبراً جاء فيه: ان اهل العروس إعتدوا بالضرب على العريس داخل صالة الأفراح بعد ان رقص رقيص خليع مع زوجته أمام الحضور) ..
* العريس خدش حياء المعازيم برقيص خليع ..
* المؤسف فى الخبر ان العريس (طلق) عروسته داخل صالة الأفراح ..
* وهذه بحسب الخبر تعتبر هي اسرع حالة طلاق في العالم ..
* حسب ظني ان الموضوع ما كان يفترض ان يصل مرحلة الضرب والطلاق ..
* ولكن للأمانة هنالك (عرسان) بيكترو المحلبية ..
* الواحد أثناء الزفة بيرقص رقيص بايخ جدا مع عروسته ..
* نعم هي زوجتك وهذا حلال ولكن (للمكان والزمان) خصوصية يجب ان يراعيها كل عريس ..
* يعني زوجتك دي هي حقتك بـ(شهادة بحث) عديل، ولذلك ما في داعي تتهابل قدام الناس وترقص رقيص ما راكب عدلو ..
* في ناس طبعا الواحد بيحب يعمل حاجة جديدة، عشان كده تلقاهو بيرقص رقيص خليع مع زوجته..
* داخل الصالة هنالك أطفال وشباب وشابات ورجال ونسوان فضلا عن اخوان العروس وفي النهاية نحن سودانيين يجب ان لا نتجاوز حدود (سودانيتنا وأدبنا وإحترامنا لبعض) ..
* أنا حزين بسبب هذا الطلاق السريع في زمن اصبحت فيه العنوسة أخطر من الأيدز ..
* ويا أستاذة : وريتينا لكن ..
* و..و..
* ومن حور الجنان أم أنت من …(أمبدة السبيل) ..
لمتابعة الاخبار الفنية الثقافية زورو موقعنا الالكتروني صحيفة ريبورتاج:

صفحة الفيسبوك: https://www.facebook.com/reportagesd

تيليجرام: https://telegram.me/reportagesd

مجموعة الفيسبوك: https://www.facebook.com/groups/85632…

تويتر:https://twitter.com/reportagesd1

اضافة تعليق

Powered by Facebook Comments

%d مدونون معجبون بهذه: