كان المفروض قلم (البك) ما يكتب إلا إنجليزي !!

شفتو كيف صافي ومسامح
القليـب الانـت جارحـو
سبتـو ضايـع بالسنـيـن
ولحظة صورتك ما بتبارحو
أمـا قلبـك يـا المعـانـد
الله يغفـر ليـو يسامحـو
والصـدود الجـوة فيهـو
باينة في عينيـك ملامحـو

* ذكريات الطفولة هي مثل (جنا الحشا) ..

* حنينة وحبيبة ومهما تجافينا بنقول حليلا ..

* والما عندو ذكريات ما عندو ماضي والما عندو ماضي ما عندو حاضر والحاضر (ولد المستقبل)  والماضي (ولد الحاضر) وهذا يعني ان (الماضى حفيد المستقبل) ..

* فاهمين حاجة ؟؟

* المهم ..

* من (شنطة الذكريات) الليلة طلعت بعض الحاجات ..

* طلعت ليكم حاجة من طرف الشنطة بس ..

* ونحنا ذكرياتنا (مُستفه) في ثلاث شنط واتنين كرتونة ..

* علي بالنعمة ذكرياتنا دي (شيلة عديل) ..

* هسه عليك الله مالو لو قالوا العريس في الزواج يجيب (الشيلة) ذكريات ؟؟

* والله تكون احسن حاجة ..

* نجيب ليهم (شنطة من ذكريات) الطفولة و(شوال من ذكريات الصبا) و(اربعة كراتين من ذكريات الخلط) ..

* يفتحوا كرتونة ذكريات الخلط على بالقسم ام العروس تفهم حاجة ذاتو ..

* نحنا في الخلط صعبين ..

* وصعبين شديد كمان ..

* الكافتريات دي عارفنها ليك كافتريا كافتريا ..

* واية كافتريا في الخرطوم دي نحنا عارفين عيوبها ..

*  هسه ممكن اوريكم الكافتريا (البتنقط في الخريف) !!

* وارويكم الكافتريا الفيها ذباب ..

* والكافتريا الفيها كدايس ما محترمة ..

* إحنا علي بالنعمة عارفين أي حاجة ..

* وعارفين كمان المذيعة الصوتها صوت التلفون الصينى باعت تلفونها وتلفون اختها عشان تسدد مديونيتها بطرف بتاع البوتيك ..

* عارفين نحنا ..

* عشان ما تقول قاعدين ساكت ..

* نحنا الجرجير لو ما غرق ما بنأكلو ..

* الواحد فينا زمان لما يكون ماشي يخش السينما بيأكل ليهو (بصلة) وببقي مارق ..

* ود كومار لما يضرب الخيانة تاني بنأكل بصلة ..

* يا اخ نحنا زمان شاي الصباح بنشربو بـ(الفلفلية) ..

* ما عندنا مشكلة تب ..

* في المدرسة زمن الإبتدائي كنا بنسرق (الطبشير) ..

* نشيل الطبشير ونجي نشخبط بيهو في (حيط بيوت الناس) ..

* تشيل الطبشيرة وتجي تكتب في حيطة الناس : (احب سارة) ..

* ولا تكتب اي اسم انت بتحب (ستو) ..

* يا جماعة سارة دي أنا جبتها نموذج عشان ما تشغلوها لي ساكت ..

* بتذكر في بيت في شارع مدرستنا اهلو رحلو ..

* البيت ده زي ثلاثة شهور كان قاعد فاضي ..

* عملنا ليك حيطة البيت ده زي السبورة ..

* ولما الحيطة إتملت كتبنا في الباب : (احب ريم) ..

* كنا نجاهر بالحب ونكتبه حتى في الحيط مع العلم إننا كنا صغار جدا على الحب ..

* وفي الزمن داك قيس لو شافنا كان تاني مات ..

* كنا لما نكتب في الحيطة (احب فلانة) الواحد فينا من الخوف نوم ما بنوم ..

* كنا ابرياء وكانت الحياة كلها خطوط حمراء ..

* وفي زمن الواتس والمعاصى هذا يمكن ان ترتكب اكبر جريمة وتأتي وتنوم حتى الساعة العاشرة صباحا وكأنك وارث ..

* القلوب ماتت يا مولانا ..

* المهم ..

* في مرحلة الإبتدائي كنت اتضايق جدا من (قلم الرصاص) ..

* كنت احس ان قلم الرصاص ده اقل من طموحاتنا ..

* قلم رصاص وموس وبراية واستيكة وحاجات كده ما كانت راكبة لي في رأسي ..

* كان كل همي ان اكتب بقلم (الحبر السايل) او (الحبر الناشف)  والمعروف بقلم (البك) ..

* داير متين ابقى كبير عشان اكتب بقلم (البك) او قلم (الفرنسى) ..

* لكن الكتابة بقلم الحبر كانت ممنوعه بامر إدارة التعليم في فصول الابتدائى تقريبا لحدي سنة رابعة او سادسة ما عارف ..

* الحاجة دي خلتني اظن بعض الظنون في الزمن داك ..

* كنت بظن ان قلم الحبر البك بيكتب انجليزي ..

* حسب فهمي الوقت داك ظنيت كده ..

* واي زول طبعا حر في (ظنونو) ..

* لما الناس يقولو الانجليزي صعب كنت بزعل شديد ..

* بقول ليهو : كيف يعني الانجليزي صعب وإنتو بتكتبو بقلم البك ؟؟

* يعني حسب فهمي إنو قلم البك هو براهو بيكتب إنجليزي في الكراس !!

* عشان كده بضايق لما زول يقول الانجليزي صعب ..

* وحسب خيالي المريض فاكر إنو قلم الرصاص كل امكاناته الكتابة باللغة العربية ..

* قلت ليكم خيالي مريض ..

* والله لو كان قلم البك بكتب إنجليزى براهو على بالقسم كوندليزا رايس كان تعبت معانا ..

* ليل ونهار نرسل ليها ..

* لكن الله شافك يا بت رايس ..

* رايس بـ(الضاء) ..

* يا استاذة : تصدقي زمان قلم الحواجب كان عيب !!

* و..و..

* واكتب لي يا غالي الحرف …(ان شاء الله في حيطة السجن) ..

اضافة تعليق

Powered by Facebook Comments

%d مدونون معجبون بهذه: