(الوجنات) و(حُفر سوق ليبيا) وإنصاف بت مدني !!

 

 
* عادة العيد في الخرطوم ينتهي بإنتهاء (الخبيز) علما بأن الخبيز في الخرطوم ينتهي قبل صلاة العيد ..
* يعني في الخرطوم العيد ينتهي بإنتهاء صلاة العيد ..
* (وثقت) قناة النيل الأزرق للفنان (القاصر فنيا) صلاح ولي من خلال برنامج معايدة ..
* النيل الأزرق (أرسلت كاميرا) مع صلاح ولي لمنزلهم ومنزل خالته ومنزل عمنا ميرغني البكري ..
* أظن وليس كل الظن إثم أن قناة النيل الأزرق كانت تقصد بهذا التوثيق (صلاح بن البادية) وليس (صلاح ولي) ..
* إحتمال يكون (صلاح) إتشابه لقناة النيل الأزرق فبدلا من صلاح بن البادية او صلاح مصطفى وثقت لصلاح ولي ..
* نقترح للأخوة في قناة الأزرق أن يكون التوثيق في عيد الأضحى القادم للعازف (أيمن الربع) والمغنية (نجاة غرزة) والأخت الفنانة (محاسن لقيمات) ..
* وغايتو جنس غايتو ..
* لو كان (السيلفي) مرض ينتقل بالعدوة لتم الآن نقل جورج قرادحي للعناية المكثفة ..
* الكمية الكبيرة التى تعرض لها جورج قرادحي من (السيلفي) خلال أيام العيد بالسودان لم يتعرض لها حتى في وطنه لبنان..
* نجومية قرادحي في السودان تفوق نجوميته في وطنه لبنان ولذلك لا أعرف هل الشعب اللبناني (تقيل) ولا إحنا (الخُفاف) ؟؟
* حاجة تكسف والله ..
* قبل سنوات قالوا في سوق ليبيا ممكن يعملوا ليك (علامة صلاة في جبهتك) بمبلغ خمسين جنيه فقط لا غير ..
* والآن في الأخبار ورد أن هنالك (وجنة صناعية) يتم إستحداثها بملبغ وقدره (250) جنيه ..
* يعني (خدك يكون سادة) تمشي سوق ليبيا يعملوا ليك (جوز غمازات) وتدفع (ربع مليون) وتبقى مارق ..
* تحفر خدك بالقروش وتعمل ليك وجنات وتجي تضحك بسبب وبدون سبب ..
* علامة صلاة صناعية وغمازات صناعية وحتى (الصحة) بقت صناعية بفضل (حبوب النجمة وأخواتها) ..
* يا كافي البلا .. في الشارع لو لقيت ليك (بت سمينة) ما بتعرفها (سمينة سمن عادي ولا سمينة سُمن صناعي) ..
* وغايتو الله يكفينا شر المُصدي اللمعتو الأيام ..
* غابت سهام عمر شهور طويلة من الشاشة بعد (إستقالتها وإقالتها) ولم يحس بهذا الغياب أحد ..
* إحنا وأولاد حلتنا لا ننصح سهام عمر بالعودة بقدر ما أننا نتمنى أن يكون هذا الغياب من نصيب أسراء سليمان كذلك ..
* وعلى فكرة .. الرموش الطويلة لا تصنع مذيعة ..
* و(الثياب الفاخرة) كذلك ..
* في مذيعات كده مفتكرات الشغلانية (تياب ومكياج ووجنات وإبتسامة بلهاء) ..
* غايتو تاني أى (وجنة) نشوفها بنشك فيها ..
* بلغنا زمن بقينا ما بنعرف فيهو (الوجنة) من (الحفرة) ..
* قصة واخرها لسه ..
* حينما (يأخد) الطبيب إجازة في العيد لا يأخد المرض إجازة عن المريض في ذات العيد ..
* ولذلك كثير من المرضى في بلادي صبروا على المرض لحين عودة (دكاترة الهناء) من إجازاتهم السعيدة ..
* نعم الطبيب بشر ومن حقه أن (يرتاح) ويأخد إجازة ، ولكن المريض بشر ومن حقه أن يتعالج ..
* أنا أجزم بأن أى ولاية في السودان فيها (زول مات) في العيد بسبب عدم وجود الطبيب ..
* والله في ..
* واحدة من الأشياء التى أصبحت مُملة والحديث عنها مسيخ هى (مشاكل إنصاف مدني الخاصة) ..
* إنصاف مدني كلما وجدت (سانحة أمام الكاميرا) حدثتنا عن (شيكاتها ومديونيتها ومشكلتها المالية) ..
* نحن على الدوام نسأل الله أن يحل مشاكل إنصاف مدني ومشاكل كل الناس ..
* ولكن إنصاف ليس هي الوحيدة التى تعاني من مشاكل مالية وإقتصادية فهنالك المئات من السودانيين الذين يعانون من ذات المشاكل بعضهم يعيش (برة السجن) والبعض الآخر (جوة السجن) ..
* قبل سنوات مرت الفنانة حنان بلوبلو بأزمة إقتصادية كبيرة جعلتها ترهن منزلها (العزيز عليها) بمدينة المهندسين ..
 * حنان (باعت) منزلها لمدثر كاريكا ورغم ذلك لم تشتكي ولم (تجُوب) القنوات وتعرض مشاكلها كمل تفعل إنصاف ..
* من الحكمة أن تصبر على (الإبتلاء) ولا تلوم الناس فمثلما لك ظروف للناس ظروف أيضا ..
* حديثك الكتير عن مشاكلك الشخصية أحيان يجعل كثير من الناس ينفرون من حولك ..
* على إنصاف أن (تصمت وتصمد) حتى يتعاطف معها كل الناس ..
* (التقلة صنعة) يا إنصاف ..
* بسبب (الملايات الجديدة) أصبحنا في بيوتنا مجرد (ضيوف) ..
* كل ما تقول عايز (تأخد ليك تكية في السرير) يقول ليك : (أعمل حسابك دي ملايات العيد) ..
* الآن العيد إنتهى أرفعوا (ملايات الضيوف) و(رجعوا لينا ملاياتنا) ..
* الواحد بقى قبل ما يقعد في السرير بيحس بـ(الملايا) ملامحها إتغيرت من (الزهج) ..
* حتى الملايات بقت تضايق مننا ..
* ملايات بـ(الفاء) ؟
ويا أستاذة : أحلى حاجة في (شيالة خبيزكم) إنتي ..
*و..و..
* وتعالوا شوفوا الكنت راجيهو … صورتو في الفيس ما زي صورتو على الطبيعة ..

اضافة تعليق

Powered by Facebook Comments

%d مدونون معجبون بهذه: