يا جنابو الزول ده بعاين لي في (كبدتِي) !!

 

* في العادة الزول لما يشوف ليهو زول في الشارع العام بعاين ليهو في (وشو) ..
* وفي هذه الأيام الزول لما يشوف ليهو زول بعاين ليهو في (فشفاشو) أو في (طوحالو) ..
* أمبارح وأنا في الشارع ماشي كل الناس تعاين لي في (البنكرياس) ..
* في واحد عاين لي في (مصراني) لكن ما إشتغلت بيهو كتير ..
* غايتو يا أبوعركي البخيت تاني لو طالع خلي (حنجرتك) في البيت  للضمان كده ..
* الدنيا ما  معروفة وزي (حنجرتك) دي بتجيب الشي الفلاني ..
* عموما .. الشرطة نفت أن يكون هنالك أي بلاغ فيما يتعلق بسرقة الأعضاء البشرية ونحن نثق في الشرطة ومع ذلك نطالب أهلنا بالحذر ونسأل الله السلامة للكل ..
* والله يكضب الشينة ..
* مهاب عثمان هو من (مشتقات) فرفور ولذلك تراجع أسهم مهاب تعتبر منطقية لأن فرفور نفسه تراجعت أسهمه ..
* يحتاج مهاب عثمان أن يعرف أن (الرشاقة قتلت إشراقة) ..
* بمناسبة (الرشاقة) : لا تزال الفنانة محاسن لقيمات تُغني رائعة عبد القادر سالم (أسير غزال) بهذا الشكل : (عصير غزال فوق الدويم) ..
* أول مرة في حياتي أعرف إنو (الغزال) عندو عصير يا محاسن ..
* وغايتو جنس غايتو ..
* في الوقت الذي إتفق فيه العرب على محاربة ومقاطعة دولة قطر إستلم العدو الإسرائيلي (مفاتيح) المسجد الأقصي بدولة فلسطين المحتلة ..
* فلسطين وعلى مدار سنوات طويلة تكشف يوميا (هوان) العرب الذين أصبحوا يتفقون على مصالحهم الشخصية ولا يتفقون في أى أمور تهم الدين والإسلام ..
* كونوا (تتشاكلوا) وتتخانقوا حول قناة (الجزيرة) هذه ليس (رجاله) وإنما مصالح دنيوية تافه ، (الرجاله) هي أن نموت في سبيل حماية المسجد الأقصى  ..
* حماية الدين والمقدسات الإسلامية هي مسؤولية الأمة الإسلامية ، فلماذا لا تُرسل كل دولة مسلمة جيش قوامه (40) ألف مقاتل ؟؟ 
* (40) ألف مقاتل من كل دولة مسلمة قادر على محو إسرائيل من الوجود ..
* العرب لن يفعلوا ذلك لأن حدود تفكيرهم لم يتجاوز شهوات (البطن) ومياعة (الطرب) ..
* والله في ..
* رغم أنه يعتبر من (أقدم ثلاثة مذيعين بالقناة) إلا أن أمجد نور الدين لم يزل أسير برنامج (مساء جديد) ..
* أمجد ربما هو المذيع الوحيد الذي بدأ من مساء جديد وسيعتزل في مساء جديد ..
* نعم (المساء جديد) ولكن (أمجد نور الدين قديييم) ..
* حاجة تكسف ..
* على حس المطر كل حاجة في البلد سعرها زاد ..
* المواصلات سعر التذكرة زاد .. الفراخ زاد .. الورنيش زاد .. الطماطم زادت.. منديل الورق زاد .. البشكير زاد وحتى (سم الفأر) ياكافي البلا زاد ..
* هسه عليك الله سم الفأر ده علاقتو شنو بالمطر عشان سعرو يزيد ؟؟
* والله العظيم أنا خايف الأسبوع الجاي تجي مطرة نلقي ( جدول الضرب) ذاتو زاد ..
* قبل الزيادات ( خمسة في تلاتة بتساوي خمسطاشر) ..
* وبعد الزيادات دي ( خمسة في تلاتة ح تساوي واحد وعشرين) ..
* حتى الرصيد سعرو زاد ..
* الإسكراتش (أبو عشرة) في بعض الولايات بقي بـ(13) جنيه ..
* لو عايز تحول رصيد بألفين تدفع ألفين ونص ..
* ودي قصة واخرها لسه .. 
* من حق السعودية أن تفرض ما تراه مناسبا من رسوم للأجانب ولكن السعودية كان عليها أن تراعي خصوصية السودانيين الذين لهم قدح معلى فيما وصلت إليه السعودية الآن ..
* عموما .. نقول للأخوة السودانيين العائديين : (تعالوا بنأكلها كِسرة بموية وبنحمد ربنا الجابها) أو كما قالت الرائعة نضال حسن الحاج ..
* في آخر تصريح لها قالت المغنية مونيكا أن الجعليين أجبروها على العودة للغناء بالدلوكة ..
* يا مونيكا الجعليين (كتر خيرهم) لكن إنتي الفيك إتعرفت ..
* المشكلة ما في الدلوكة ، المشكلة في صوتك إنتي ..
* كل ما تغني مونيكا بجيني إحساس إنو (الدلوكة ما عندها ذنب) ..
* وغايتو الله يكفينا شر (المُصدي) اللمعتو الأيام ..
* (البت البايرة) تغضب كلما تشاهد (إعلان للحِنة) ..
* وإعلانات الحِنة في التلفزيون عادة لا ترضي (البايرات) ولا ترضي (رجال النسوان) الموظفين الكادحين جدا ..
* الموظف المتزوج يخشى المناسبات والأعياد والأفراح وذلك لان لها فاتورة باهظة تتعلق بـ(الحِنة) و(البيقن) و(الثياب الفاخرة) ..
* على فكرة .. مفعول (البيقن) هو نفس مفعول (سم الفأر) فهل (تتحنن) حواء بسم الفأر بدلاً عن البيقن ؟؟
* نتمني ذلك ..
* ويا أستاذة : عندك (رئه) تشهي السرقة ..
* والله صحي ..
* و..و..
* وباسم الحب بقدم ليك حياتي ومعاها …(الطوحال وكبدة ولد جيرانا) ..
إنهاء الدردشة
 

اضافة تعليق

Powered by Facebook Comments

%d مدونون معجبون بهذه: