Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
أخبار الرئيسية (سلايدر)احداثريبورتاجلقاء الاسبوع

نعمة عثمان:  لا نتعامل بمبدأ الدكتاتورية والرجل السوداني يخاف من المرأة الناجحة

 حوار: ملاذ ناجي
مذيعة بمواصفات مختلفة حجزت لنفسها مكانة وسط المذيعات في فترة قصيرة استطاعت ان تلفت اليها الانظار وتثير الجدل نعمة عثمان التقتها المجهر في حوار للحديث عنها وعن تجربتها وخرجنا بالآتي:
نعمة من أكثر المذيعات ظهورا علي الشاشة الزرقاء ومع ذلك لم تستفيدي من الفرص الممنوحة لك؟ 
الفرصة الحقيقية هي ان يكون لك برنامج خاص بك مثل برنامج مية دقيقة الذي عرف الناس بمقدرات (مودة حسن) وامكانياتها اما البرامج اليومية مثل الbn fm والمساء الجديد فهي برامج مستهلكة وفقراتها معروفة ولا مكان لإبراز المقدرات.

ومالذي يمنع نعمة من ان يكون لها برنامجها الخاص الذي يبين مقدراتها؟
لا شئ غير مشغولياتي وادارة البرامج ليس لديها اي مانع بالعكس متي ما كانت الفكرة جيدة وتوفرت الرعاية فلا مانع لديهم.

وماهي فكرة برنامجك الجديد؟ 
لا معالم واضحة الا الآن ولكن قد يكون لدي تعاون مع الاعلامي (هيثم كابو) في برنامج نقدمه سويا وسيكون مختلف كليا.

وكيف ترين التعاون مع كابو وهو ناقد فني من طراز رفيع؟
هيثم اعلامي كبير وزميل قبل اي شئ واتمني ان استفيد منه ومن خبرته اذا ما اكتمل هذا المشروع.

في ماتقدمينه هل انتي مخيرة ام مسيرة؟ 
لا نتعامل بمبدأ الدكتاتورية ونتناقش في الفقرات والضيوف.

كيف تستعدين للمساء الجديد؟
بعمل بحث عن الضيف وبجمع المعلومات اللازمة عنو وبحرص اني اكون ملمة بكل التفاصيل.

هل لك تحفظات علي النيل الأزرق؟
ابدا لأنني اعتبر نفسي (مدللة) وأجد كل ما اطلبه.

ما الفرق بين مذيعة اليوم ومذيعة الأمس؟
الحضور  والثقافة

من الاكثر حضورا وثقافة؟
كل جيل له مميزاته واذا كانو هم جيل الرواد فنحن كمان حيجي علينا  يوم ونكون رواد.

الاستظراف واطلاق النكات والضحات الغير مبررة دليل علي ماذا؟
دليل علي محاولة كسر الروتين في برنامج مدته تلاتة ساعات وعشان ما يبقي ممل للمشاهد وعموما وعن نفسي انا ما بيتظرف وبحاول اكون متوازنة جدا.
من المذيعة والمذيع الاقرب الي قلبك وتجدين نفسك في العمل معهم؟
في المذيعات مودة واسراء فاطمة مصباح
والمذيعين حذيفة عادل وسوركتي

هل تعتبرين نفسك مشهورة ومعروفة في الشارع السوداني؟
كيييف معروفة جدا وناس كتير بوقفوني وبتصورو معاي.

لو كنتي ما جاهزة او مافي (المود) بتقبلي تتصوري؟
اكيد مرات كتيرة بكون (ماقاشرة) كدا وماشة مشوار قريب لكن ما برفض لي زول خالص.

استفدتي شنو من الشهرة؟ 
بقيت متحفظة اكتر ومسئولة وحريصة جدا علي تصرفاتي سمعتي.

انتي مشهورة بلقب (نعمة رمضان بي خيرو وبي شرو)..؟
رب ضارة نافعة وفعلا الموضوع دا عمل لي شهرة وحتي الما كان بعرفني بقى بتابعني وعلي فكرة الناس غفرت لي .

مالذي اوقعك في خطأ مثل هذا؟
بعتبر نفسي ما نضجت كفاية ولسة قدامي المشوار طويل.

نعمة عندك عداوات كتيرة السبب شنو؟
والله انا ذاتي ماعارفة عن نفسي انا زولة مسالمة جدا وما بتاعت مشاكل خالص والناس المعادياني دي عندهم اسباب هم بعرفوها براهم.

وجهي ليهم رسالة؟
ماعندي حاجة اقولها غير انو طالما انت ما بتعرفني حرام تحكم علي لأنو وقتها حكمك حيكون ظالم ومجحف.

سياط النقد الهبت ظهرك كيف تنظرين للنقد؟
بتألم طبعا ولكن لفترة بسيطة وبعد ذلك اخذ منه ما يمكن ان يمثل فائدة لي والباقي ما بهمني.

تتحدثي عن نقد الاسافير واحدثك عن نقد الصحافة؟
لا تعليق

هل سببت لك الشهرة اي متاعب؟
بالعكس ادتني محبة الناس ويمكن العيب الوحيد انها بتخلق ليك اعداء من غير سبب.

برأيك ماهي المواصفات الواجب توافرها في المذيعة النجمة؟
التعامل البسيط مع الناس والثقافة والالمام المعرفي والحضور

انتي نجمة؟ 
ابدا لسة بدري علي

هل عانيتي من ويلات الغيرة؟وكيف تتعاملين مع الامر؟
عندي حاجاتي البتميزني وعموما انا بطنش وما بركز.

برنامج في النيل الازرق تحلمي بتقديمه؟
حضرات السادة المشاهدين بتاع خالد الوزير عاجباني فكرتو شديد.

وعربيا؟
برنامج (انا وانا) لسمر يسرى.

يعني وطبعا اكيد بغض النظر وزي ما انتو عارفين عبارات معادة ومكررة لكن كمذيعات هل تعني تقهقر اللغة العربية؟
انا ما جااية اتفلسف ودا ما المهم المهم انك تكون بسيط وتقدر تحاور الضيف القدامك 

دي مافلسفة وانما ثقافة والمام؟
وانا مثقفة وملمة والطريقة البتتكلم بيها حسب الضيف القدامك وكيف توصل ليهو السؤال ببساطة.

اين مكانك وسط المذيعات في اول الصف ام في اخره؟
انا مذيعة صف اول ومصنفة كدا اداريا.

عودة تسابيح الي جنبات الازرق هددت عرشكم كمذيعات؟
عودة تسابيح اعادت لها بريقها.

نعمة ماهي مواصفات فارس احلامك؟
ممكن تكوني راسمة صورة عديل لي زول في خيالك ولما النصيب يجي بتنسي الحاجات دي كلها.

من وجهة لماذا الرجل السوداني يرفض الزواج من مذيعة او فنانة؟
الموضوع ما ليهو علاقة لأنو لو كنت دكتورة وناجحة برضو حيكون نفس الفهم الرجل السوداني بخاف من المرأة الناجحة والمشهورة عموما.
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

إغلاق
%d مدونون معجبون بهذه: