Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
أخبار الرئيسية (سلايدر)ريبورتاجلقاء الاسبوع

شيبة الحمد عبدالرحمن: بلا مسكنات لهذا السبب نجومية محمد عثمان أكبر من نجوميتي

.. وأنا مذيع محترف…
عائشة هي مدينتي الفاضلة و(حاسي اني بعمل في حاجة بيروقراطية)……..

حوار ملاذ ناجي

مذيع متمكن صاحب امكانيات صوتية قوية وثقافة واسعة واطلاع كبيى عرف بسرده المحبب والقريب من القلب ابان فترة تقديمه لبرنامج اغنيات من البرامج وتميز في برامج المنوعات الاخري عموما حجز لنفسه مكانة وسط مقدمي نشرات الاخبار التقته المجهر في حوار الاتهامات والتساؤلات وخرجنا منه بالآتي:

شيبة في البدايات وشيبة اليوم فيما إختلفت؟
اختلفت مشاهداتي وملاحظاتي واختلف ادراكي للدنيا عموما سواء في حياتي الشخصية ام في مجالي المهني وقدرت احقق جزء كبير من طموحي
وحققت امنيات ولا تزال هناك امنيات.

حققت امنيات علي الصعيد الشخصي ام المهني؟ 
الشخصي والمهني في ان واحد

علي الصعيد المهني هل تقصد مركز التدريب؟
مركز التدريب دا كان في 2013 واستغنينا عنو في 2015.

استغنيتو عنو نسبة لفشلوا؟
ابدا المركز ما فشل وانما الاعباء المادية اضافة لإلتزامنا تجاه المؤسسات النحن شغالين فيها خلتنا ماقادرين نقسم وقتنا وجهدنا بشكل جيد عشان المركز يتقدم.

طالما انو المركز ما غطى منصرفاتو المادية معناها انو ما ناجح؟
المشكلة الاساسية كانت في عدم التفرغ 

عدم تفرغ ام سوء ادارة؟
ابدا لو سوء ادارة كان ممكن نجيب زول مختص يدير المركز ونحن بعيدين لكن ماكان حينفع يعني زي الطفل البتخلي  مسؤلية نجاحو علي المدرسة فقط لازم يكون جهد متكامل بين البيت والمدرسة والا اكيد ما حينجح وعموما المركز نشاطو مجمد وممكن يرجع في اي وقت.

لنعرج عن موضوع التدريب قليلا من وجهة نظرك مالفرق بين شيبة مذيع النيل الازرق وشيبة مذيع الشروق؟
الفرق انني انتقلت من خانة تقديم المنوعات الي الاخبار وطورت من مقدراتي وااصبحت اكثر استخداما للاداء الصوتي وثقفت نفسي سياسيا وعرفت اساليب العمل الاخباري علي اعتبار ان العمل الاخباري كنت اعتقد انه قريب للمنوعات وكله تقديم ولكني اكتشفت انو الاخبار وتحريرها امر اخر وانا الان لست مقدم اخباري وانما معين كصحفي معد للاخبار ومساعد منتج لفريق الصحفيين الموجود.

كم لبست في الشروق؟
خمسة اعوام ومثلها في الزرقاء وعلي فكرة عالميا اي شخص يعمل في مهنة لخمسة اعوام هو محترف.

هل انت محترف ؟
اكيد بدليل انو دي مهنتي الباكل منها عيش

ما اي مهنة بتأكلك عيش معناها انت محترف فيها؟
علي الاقل نحن عندنا حصيلة جيدة وجيلنا نحن جيل مميز جدا وانا افخر بأنني احد هؤلاء المميزين وبالنسبة لأنة علي الاقل تجربتي كانت جيدة علي اعتبار انو لما اعمل حاجة بفتش عن ارضاء طموحي اول اذا كنت راضي عنها فانا واثق انو الاخرين قد يرضو عنها لأنو لو انت ماراضي عن نفسك الاخرين ماحيرضو عنك.

شيبة رغم غرورك أفل البريق؟
اتحفظ عن كلمة غرور الا اذا كانت تعني الثقة بالنفس. 

شيبة بريقك أفل؟
انا ما الشخص الببحث عن نجومية 

لكن في الماضي كنت نجم؟
جاتني براها النجومية في الفترة ديك وما فتشتها 

جاتك براها وضيعتها براك؟
حتي لو ضاعت غير آسف عليها

هذا اعتراف ان نجوميتك اختفت؟
اليوم في الساحة في نجوم كتار جدا هل يفترض بي  انافس واعافر عشان احصل علي لقب نجم انا لا افكر بالطريقة دي خالص انا بفكر في كيفية تطبيق قواعد ورواسخ جيدة في العمل فقط وكيف اقدر احقق اهدافي التي لم تكن يوما من ضمنها النجومية ولا لكنت اصبحت (متسلقا).

الغالبية بيوصلو للنجومية بعد زمن مش بتجيهم لحدي عندهم ويفقدوها؟
انتي استعرتي شخصيتي وحللتيني وحكمتي علي علي اساس اني باحث عن نجومية علي الرغم من عدم تصريحي بذلك؟

طيب جيت التلفزيون ليه ما كان تكتفي بشهرة الاذاعة؟
هل بتفتكري انو لازم الزول يكون نجم بمعني النجومية المتعارف عليه فقط يعني اي مافي مقاييس تاني.

مقاييس زي شنو؟
زي القروش المرتبات والعمل الجيد دي مقاييسي الانا معترف بيها.

جحودك للأزرق امام سطوة اموال الشروق؟
ضاحكا: ح اجاوبك لكن عايز الاجابة تنزل زي ما ح اقولها ليك: انتي مثلا اكتر زول بتنقل بين الصحف فنون والاهرام والسوداني والان المجهر وغيرها من الصحف ومع ذلك اعلم تمام ان الامر لاعلاقة له بالجحود واعلم جيدا ان التنقل عبر المؤسسات الاعلامية امر اعتيادي لكل اعلامي وعن نفسي انا جيت الخرطوم ابحث عن مصدر رزق وكلنا بنطمح للعرض الافضل ودا حق مشروع للكل واذا ماسمي انتقالي من الازرق للشروق جحود فما بالك بمن ترك البلد وسافر عشان يصلح وضعو هل هو جاحد ام مغترب من ناحية تانية الواحد فينا بشوف الوضع الافضل ليهو طبعا.

معني ذلك انو اذا جاك عرض مادي افضل من عرض الشروق حتغادرها؟
ح ادرس العرض من كل النواحي كمان دا ما الشرط الوحيد برضو في حاجات تانية زي السياسة البرامجية والاضافة الممكن القناة الاخرى تقدمها لي وانا ما بستبعد الموضوع دا لأنو الشروق محطة من محطات الحياة المختلفة وادتني قوة واعطتني الكثير وعلمتني وانا مع التنقل لأنو بزيد خبرتك وبوسع علاقتك وعلي فكرة نحن كأعلاميين كتار جدا وما بنتعارف لإنغلاقنا علي مؤسساتنا.

النيل الازرق اعطتك الشهرة ماذا اعطتك الشروق غير المال؟
الشروق صنعت مني مذيع وقبلا كنت مقدم برامج والفرق شاسع بينهما تماما كالفرق بين الصحفي والكاتب الصحفي واعطتني القدرة علي العمل الاخباري الذي يعتقد الكثيرين انه سهل ولكنه صعب جدا.
 
ماالفرق بين جيلكم والاجيال القبلكم؟
جيلنا قدر يستصحب معاهوو افكار شاهدها خارجيا ويطرح افكارو بجرأة والاعانا علي كدا المؤسسات الاعلامية الجات رديفة لتلفزيون السودان ومع ذلك لكل جيل معاييره الخاصة.

يعني انتو عندكم البراحات المعينة علي الابداع؟
علي الاقل اليوم هناك الانتاج الخارجي وهو برامج تنتج خارج اطار القنوات وتبث داخلي وتتم عملية تنظيمها اداريا مثل في النيل الازرق انتجت برامج كتيرة.

تبقي الرعاية شرط اساسي لبث هذه البرامج؟
ما دايما فانا مثلا كنت حاسي اني عندي دور مفترض اقدمو تجاه اهلي البجة في شرق السودان واظهر بعض جوانبهم من خلال عملي في النيل الازرق وعرض مكون الشرق الثقافي فبالتالي عرضت الفن في الشرق واتحاد الغناء الشعبي هناك وكنت بستضيف فنانين الشرق البجو الخرطوم .

من خلال السهرات دي الناس عرفت انك ادروب؟
فعلا في الفترة عرفوني الناس كشيبة الادروب

لإنتمائك الكبير للشرق ومحبتك له تضايقك النكات عن الادروبات التي تطلقها الفرق الكوميدية؟
لا عادي لكن كمان انا ضد الاستهزاء بأي شخص عموما والموضوع كله عبارة عن تنميط ودي كلها فورة وبتعدي والمجتمع فيهو حاجات اخطر وان كنت ضد ان تكرس النكتة لمفاهيم مجتمعية خاطئة لأنو كقبائل سودانية ما ناقصين ولأنو الحاجة بكترة التكرار بترسخ في الذهن وممكن يتم التعامل معها كأمر واقع.

شيبة الشاعر (تعلب) مع شيبة المذيع خصوصا انك شاعر بمواصفات خاصة ومن طراز رفيع؟
الكسل فقط والانشغال احيانا.

من سنوات وانت تكتب تحت عنوان الي عائشة هل عائشة رفيقة الكفاح ام حبيسة الخيال؟
بل عائشة هي ايقونتي التي اكتب لها وهي مخلوق افتراضي احتاجه لأكتب.

ربما تكون عائشة مخلوق حقيقي راحل والباقي فقط بعض من رفاته وكتاباتك؟
بل هي المدينة الفاضلة التي ابحث عنها وابعث لها برسائلي وقصائدي.

في الفترة الاخيرة انت مقل شعريا هل اخذ جمود الاخبار من ارهافك السابق؟
صحيح يمكن اللغة الاخبارية الجامدة تأثر لكن بتأثر علي شخص غير شاعر وانا اصلا زول شاعر قبل ما اكون اعلامي واللغة عندي هي الحياة.

هلا فكرت في تقديم اشعارك لمطربين لغنائها حتي تصل بصورة اسرع؟
ابدا مافكرت ويمكن لأنو شيبة الاعلامي ظلم شيبة الشاعر وقال ليهو (دقايق اقعد هنا عشان نحن عندنا شغل) وعشان كدا بتلقي انو ظهورو خجول وبكتب في الفيس بوك في وقت فراغ شيبة الاعلامي وعموما ماضروري اكون بسترزق من شعري عشان اكون شاعر وعموما وان يسر لي الامر سأطبع ديواني الاول في الفترة القادمة.

من المطربين من وجهة نظرك يلائم لونيتك الشعرية؟
خطرت في بالي نهي عجاج لتقارب لونيتها مع ما اكتب.

اغنيات من البرامج سبب شهرتك صاح ام خطأ؟
صاح جدا كمان ولحدي اليوم في ناس مفتكرة اني اغتربت بعد خليت اغنيات من البرامج لانو اهتمامات الشعب السوداني مختلفة ولانو جمهور الاخبار غير جمهور المنوعات غير جمهور الرياضة.


من الافضل في تقديم البرنامج انت ام تسابيح ولا احتاج للاجابة التقليدية (ماشفتو)؟
ضاحكا: لالا شفت منو

وشعرت بشنو؟
شعرت بالحنين للبرنامج

الحنين للبرنامج ام للنيل الازرق؟
النيل الازرق بيتي وحنيني ليها دايم وازورها من حين لآخر وعلاقتي بهم وطيدة مثل علاقتي بالشروق وتيمها.

ارجع لسؤالي من الافضل في تقديم البرنامج؟
لا يجوز المقارنة بين من قدم البرنامج منذ خمسة سنوات ولمدة خمسة سنوات وبين شخص يادوب هو ليهو شهرين وبخت في بصمتو تسابيح عايزة فترة قبل الحكم علي تقديمها للبرنامج ووضعها في مقارنات.

من وجهة نظارك لماذا قارن الناس بين شيبة وتسابيح مع ان البرنامج قدمه عدد من المذيعين المعروفين؟
عشان الناس دائما بتقارن فيما لا يقارن المفترض عشان اكون عادل ادي تسابيح فرصة لحدي ما تستقر بالبرنامج ببصمة تسابيح الخاصة بانها في مرحله خلق علاقة مع مشاهد اغنيات من البرامج.


لو فكرت في استعادة نجوميتك ماذا ستفعل؟
لو كنت ابحث عن النجومية كنت اشتغلت برامج تافهة.

يعني البقو نجوم اشتغلو برامج تافهة؟
في ناس بقو نجوم عن طريق السوشال ميديا وممكن ببساطة جدا تكون معروف ومشهور لكن معروف بشكل سئ المهم تكون معروف ومشهور بشنو مش مشهور والسلام.

لو قدمت لك النيل الازرق عرضا هل تعود اليها؟
اذا قدمت لي عرض افضل من الشروق ممكن جدا

انت ادري بالعرض الذي من الممكن ان تقدمه لك الازرق فهل هو مفيد بالنسبة لك؟
يمكن جماله يكون في انها ممكن ترجعني لنوعية برامج انا انقطعت عنها 

واذا طلبوك كمذيع اخبار؟
ح اوافق اذا النيل الازرق طورت فكرة الاخبار عندها

الشروق (علبتك) بعد ان كنت (فريش)؟
لأنو الاخبار تتطلب ان لا ابتسم ببلاهة

في المنوعات كنت ببتسم ببلاهة؟
لأ ولم اكن ابتسم الا في مايستدعي الابتسام وفي الاخبار لا يوجد مايستدعي الابتسام (يعني ح اقول انفجرت قنبلة وانا مبتسم شمتان مثلا).
وبعد دا كلو مذيع الاخبار ما جامد في النهاية هي برنامج بس برنامج جاد شوية ورسمي.

بتحن لشيبة الزمان البقدم القوالب المختلفة الخفيفة؟
بتنهيدة: مسألة الحنين الي الماضي دي صفة يتميز بها كل الشعب السوداني تقريبا وكلنا عندنا عبارة يا حليل زمان ومرات بقعد كدا اتذكر وافكر في النهاية بصل لقناعة انو لو عاد بي الزمن لورا ما ح اختار مجال الاعلام كنت ح اختار اي دراسة اكاديمية اخري.

الكلام دا ممكن يقولو زول فشل او مجال الاعلام ما اداهو انت الاعلام اداك شهرة ووضع وغيرو؟
صحيح والحمد لله لكن دي الحياة كدا والزول دايما ما بشوف العندو بس انو ممكن اعمل شنو تاني؟ ضاحكا: ماقصدي هنا اني وصلت ولا شي بالعكس انا لحدي هسي بتعلم وبدخل ورش ودورات تديريبة وبحاول اطور من نفسي  علي قدر ما اقدر.

بتحس انو عطائك الابداعي وقف خصوصا انو لو الزول عايز يشوف الاخبار ماحيفرق معاهو المذيع منو الحيفرق معاهو الخبر المقدم؟
يمكن انا ميزتي اني مذيع شامل وممكن لو حسيت اني ماقادر ادي الاخبار ارجع المنوعات في غيري هم مذيعي اخبار وما عندهم المقدرات لتقديم المنوعات والبرامج الحوارية.

خصوصا وانت محاور ممتاز؟
الحوار فن فكيفية ان تكون حاضرا وسريع البديهة وتخرج الاسئلة من الاسئلة وتسيطر علي المحاور والضيف فلو كنت ضعيفا في فن الحوار من الممكن ان (يقعدك الضيف كنب) ويضحك المشاهد عليك.

زهجت من الاخبار؟
ما زهجت لكن حاسي اني بعمل في حاجة بيروقراطية.

وماذا تفعل حين تشعر بالملل؟
بعمل سهرة تلفزيومية بفكرة مختلفة اقدمها واعدها بتكون ريفرش كدا وبعد داك برجع بروح احسن وهسي حاليا عندي فكرة كدا بنفذ فيها.

من الجيل الجديد تري فيه نفسك؟
ضاحكا:عايزة تورطيني عشان تقولي لي مغرور وبتشكر في نفسك 

طيب نقول السؤال بطريقة تانية من من الشباب يسير في نفس خطك ويذكرك ببداياتك؟
كل جيل اليوم من الشباب الطامحين ومنهم من بداياتهم افضل من بداياتي.

من هو نجم جيلكم؟
لما جيت النيل الازرق كنت مقتنع بشخصتين كنجوم سعدالدين حسن وحامد الناظر كنت لما اسلم عليهم ساي بكون (متكيف).

ظهرت في القناة قبل محمد عثمان ومع ذلك نجوميته طغت علي نجوميتك؟
بمراااااحل محمد اليوم نجم كبير والسودان كلووو بيعرفو .

لماذا محمد عثمان حافظ علي نجوميتو وانت لا؟
ولأنو استمر من اول يوم بدا لحدي اليوم في برامج المنوعات وما غادرها ومشي من قناة منوعات لقناة منوعات.

من اكثر نجومية محمد ام سعد؟
 لكل منهم نجوميته ولكن في الجيل الجديد وهو الجيل الكانو مراهقين في فترة نجومية سعد محمد معروف اكتر وان كان سعد قفز قفزة كبيرة واحترف خارجيا.

نعود لموضوع الدورات التدريبة التي تقدمونها وانتم لازلتم في مرحلة التقييم؟
منو القال كدا؟

هنالك استنكار حول الامر من ناحية انكم لا تمتلكون الخبرة الكافية التي تؤهلكم لعمل دورات تدريبة وربما يحتاج بعضكم للتدريب ولا زالت تجاربكم تقيم الي اليوم؟
الكلام دا ذاتو نحن بالمقابل بنخضعو للتقييم ومثلما تطلق الاحكام انت كمان ممكن تطلق الاحكام ولما نستعين ببعضنا البعض لتطوير مقدراتنا ولما نمد يدينا لبعض هل دا شي معيب.

الم يكن من باب اولى ان يقوم الجيل القبلكم بهذه الخطوة؟
ياريت يسألو عن ذلك وعن لييه ماعملو خطوة زي دي

عشان هم ماعملو خطوة زي دي انتو اتبنيتو الفكرة؟ 
نحن خسرنا كتير لأنهم لو كانو دربونا كانو حيختصرو   لينا مسافات بدل نتخبط برانا لحدي مانعرف وجهتنا وهدفنا وكل العملناهو اننا بنحاول نمد ايدينا ونساعد بالبنقدر عليهو وانا بستفيد من البدربهم ديل ذاتهم.
قبيل ذكرت انك بتاخد كورسات ودورات يعني لسة بتتعلم الا ترى انك تناقض نفسك حين تدرس وانت  بتدرس وفي نفس الوقت حاسي انك وصلت وعايز تديهم خلاصة خبرتك؟
رغم ان السؤال تجريمي بالمعني الحرفي لكن ح اجاوب مثلا الاستاذ الدرسنا رياضيات في الثانوي ما كان انشتاين كان لسة قدامو ماجستير ودكتوراة وغيرو وماممكن تقارني زول خريج بي وانا زول شغال في مجال الاعلام من سنة الفين يعني لي 17 سنة اكيد حيكون عندي حاجة ممكن اقدمها ليهو وفي ناس عندهم خبرة اكتر مننا وما جاتهم الجرأة يعملو خطوة زي دي.

انتو فتحتو باب لكل من هب ودب ولأشخاص غير مؤهلين لعمل دورة تدريبة؟
لا تعليق يسألوا عن ذلك ولا احاسب انا وانما الجهات التي منحتهم التصاديق.

هل نجحتم في الدورات التي قدمتموها؟
الي حد كبير وليس الغرض ان اخرج اعلامي كامل للساحة وانما الامر اني اعرف بالمبادي والاساسيات وعلي ان اعرفك علي الطريق الصحيح وانا لا اتحدث عن الذرة ولا فيزياء الكم الموضوع بسيط في سياق عملي الاعلامي (انا بختك في بداية الطريق بقول ليك امسك الشارع دا بتصل لو حاولت تخش بشوارع تاني تغيرر مسارك انت حر) فهل تتخيلي ان ميزاينة الاعلام في البلد كلها حوالي 3مليون دولار فقط لا غير بجامعاتها بقنواتها و3 مليون دولار دي اي قناة كبيرة  برة بتصرفها في شهر واحد دي ميزانيتنا كلها اذا انت اهملت جوانب التدريب والتطوير والتقنيات وغيرها فطبيعي جدا يكون عندك مشاكل في المذيعين مشاكل في الصحفيين في القنوات ومعروف انك كل ما اديت حاجة بتديك اكتر والعكس صحيح.

هل حتواصل في موضوع التدريب وهي عائده المادي مجزي؟
ممكن اواصل وعلي فكرة عائدو المادي ما مجزي ولا يضاهي تعبو لأنو انا بكون عندي التزام اخلاقي اتجاه الناس دي اهم من اي شي اخر .

شكرا شيبة علي سعة صدرك؟
شكرا ليكم
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

إغلاق
%d مدونون معجبون بهذه: