يوسف البربري: الرقيص ما بينقص من قيمتي.

ولو ح اقيف جامد  أحسن لناس المناسبة ديل يجيبو ليهم (ام بي ثري) وخلاص


حوار: ملاذ ناجي
شاعر وملحن ومطرب من طراز خاص حاز علي شهرة واسعة في فترة وجيزة تميزه في الغناء الشعبي فتح له ابواب الساحة الفنية فأحبه الناس لقربه منهم ولبساطته يوسف البربري التقته المجهر في حوار الصراحة وخرجنا منه بالآتي:

كيف كانت البداية؟
كنت اكتب النثر اكثر وفي يوم كتبت قصيدة شكر وقراها ونصحني بإنو شعري دا لازم يتغنى وقد كان.

ومتين قررت تغني؟
الحكاية اني كنت موجود في منتدى حديقة القرشي وعمنا حسن عجمي ودكتور شلقامي طلعوني المسرح وختوني قدام الامر الواقع ولقيت نفسي بغني وبعد نزلت من المسرح لقيت زولة واقفة وقالت لي الا تغني لي في عرسي قلت ليها لكن انا ماقاعد اغني فأصرت جدا وقدام (شبكتها) غنيت ليها في عرسها وتوالت الحفلات.

اشتهرت كشاعر لاولاد الصادق اكثر؟
علاقتي بأحمد وحسين مميزة وهم اكثر اخواني وعلاقتي بيهم ماشعر بس.

الاغنية التي عرفت الناس بك هي (ادمنت ريدك) لأحمد الصادق ماسبب نجاحها الكبير؟
كان بتكلم معاي الشاعر الكبير التجاني حاج موسى وقال لي يايوسف غنيتك دي فصلت جيل من جيل وقال لي كلمة (ادمان) دي ماحصل اتقالت في اغنية سودانية قبل كدا.

انت قاسي في كتاباتك؟
بل نحنا جيلنا صعب وبايع الفكرة ويمكن لتعاملها الكتير مع الميديا والانفتاح الحاصل.

(ان شاء الله ماتتهنى دعوة خالصة بضميري) قمة القسوة والعدائية اين التسامح النبيل للحبيب ولو هجر
ضاحكا: يازولة الشاكوش حار وبعدين دا شعر مباشر وواقعي وما بتلقى في جيلنا دا التسامح النبيل بتلقي انو كل فعل وليهو ردة فعل.

(مسامحك ياحبيبي مهما قسيت عليا) دا برضو رد فعل وممكن يكون اقوى؟
دي اجيال سابقة كل شي فيها كان جميل ونبيل.

(كلام الليل) ايضا من الاغنيات الشبابية المعروفة كتبتها متغزلا في محبوبتك سابقا وزوجتك حاليا؟
كلام الليل عبارة عن الشكل الذي كنا نتمناه حرفيا لحياتنا ونرجس وياسمين اللتان تحدثت عنهما في الاغنية هما ابنتانا حاليا والاغنية تمثل حياتنا حاليا.

وماذا عن حادثة اختطاف ابنك الاصغر وهي تشعر انك مستهدف؟
الحكاية كانت غريبة شوية والحصل انو ولدي طلع الشارع ففي واحد ساقو فلما الناس شافوهو وسألو انت منو خلاهو وما اعتقد انو من ناس الحي لأنو كلهم اهلي وجيراني.


الشهرة السريعة هل تعني الغياب والزوال السريع؟
عن نفسي شهرتي السريعة وصلت ليها بتواضعي وتعاملي مع الناس واي بيت عرس بخش كأنو زواج في بيتنا او في حلتنا فعشان كدا لقيت شهرة وقبول.

انت شخصية متناقضة الا تتفق معي؟
ليه الاتهام دا

عشان شخصية يوسف ود البلد الضكران القلبو حار لاتتناسب مع المقدم من الرقص؟
اول حاجة نسبت حاجة مهمة انو نحن ماعرب نحن افارقة والافارقة عموما بتفاعلو بالرقص والتعبير الحركي والجسدي ودا مابنقص من قيمتي في شي لأنو تفاعل عادي ولو انا ح اقيف جامد طيب مازول المناسبة دا يجيب غناي في ام بي ثري وخلاص.

فرقة الديامة وعلاقتك بها واللغط الدائر حول رقيصهم؟
الفرقة وانا اولاد منطقة واحدة وكمال كيلا وجاز العقارب من ابناء الديم وكلنا بنميل للتعبير الحركي وفرقتي بالمناسبة تحمل كل القبائل ففيها الشايقي والجنوبي والمحسي وغيرهم.

ما اشهر اغنياتك التي غناها غيرك؟
احمد الصادق ادمنت ريدك وحسين الصادق خلاص ياقلب انساهو ريد وشكرالله سبحان الخلق الناس وطه سليمان الخلقك انت خلق غيرك.

من من الفنانين تتمني التعامل معه؟
طبعا العبقري معتز صباحي

عشقك لعثمان حسين ماذا عنه؟
اعشق عثمان حسين منذ صغري هو ومحمد احمد عوض من شكلا وجداني.

هل حدثت ان منعت احد الفنانين من اداء اغنياتك؟
ابدا بالعكس انا لو عايز اغني غنية من كلماتي واديتها لغيري لازم استأذن منو اول.

من يوسف الذي لا يعرفه الناس؟
انسان بسيط اولادي اهم حاجة في حياتي بيتوتي جدا بعشق الصيد والطبيخ.

مالقادم؟
تعاملات جديدة مع عدد من المطربين الشباب وسأخوض تجربة الفيديو كليب.
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

اضافة تعليق

Powered by Facebook Comments

%d مدونون معجبون بهذه: