Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
أخبار الرئيسية (سلايدر)ريبورتاجلقاء الاسبوع

عمار أبو شيبة: ربنا حلل الزواج من أربع…. ليه أكتفي بشريكة واحدة. !؟

حوار: ملاذ ناجي

مذيع شاب صاحب حضور محبب وطلة هادئة برع في كل ماقدم علي الرغم من صغر سنه فهو يعتبر اصغر المذيعين سنا وان كانت اجادته لكل ضروب العمل التلفزيوني قد جعلت منه وجه تلفزيوني معروف في فترة قصيرة مذيع فضائية سودانية24 (عمار أبوشيبة) التقته ريبورتاج في حوار وكان الآتي:

كيف كانت بداياتك؟

دخلت جنة الاطفال في اخر التسعينات كنت بغني وعمري خمسة سنين مع (ماما ايناس) ووقتها غنيت غنية صعبة (امطرت لؤلؤا من نرجس) للكابلي كنت بسمعها كتير ولقيت نفسي حفظتها لأنو بتاع الترحيل الصباح كان بشغلها كل يوم فلقيت نفسي حفظتها وغنيتها.

وبعد ذلك؟

بعد داك بقت اهتماماتي اكاديمية اكتر وكنت بكتب فمثلا في الثانوي كان عندي جريدة حائطية اسمها الهلال طبعا انا هلالابي علي السكين ومابدسو وكان الزملاء من المريخاب (بشرطوها) فبكون عاملة وحدة تانية انتقدهم فيها مرة شالو المجلة دسوها طوالي طلعت التانية وكاتب ليك المانشيت جماهير المريخ تتعدى علي جريدة الهلال علقتها ومشيت قاموا طلعوا لي ديك علقوهها لي جمبها.

انتشر خبر اصابتك في الملعب بواسطة فنان قبل فترة ماحقيقة الخبر؟

كانت مباراة بين فريق الفنانين وفريق الاعلاميين وماحدث لي كانت (ضربة انكل) اي التواء كاحل ودي في الكورة مابضربك ليها زول بتكون اتعوقت براك فبتقيف مدة من الزمن وبترجع لكن الانتشر حول انو في فنان اصابني ما صحيح.

في السودان كتيرين اشتهرو بأخبارهم الخاصة عمار اشتهر بأخباره الصحية؟

ضاحكا:متين الكلام دا

مرة الاصابة ومرة اغماء علي الهواء ومرة انخفاض في السكر؟

الاصابة دي حاجة عادية بس لأنو كان نهائي دوري خيري وكان في عدد كبير من الصحفيين فالخبر انتشر فحين اني ماكنت مذيع معروف كنت يادوب بادي في قناة امدرمان.

وايضا اغمي عليك علي الهواء مباشرة؟

كنت يومين مانايم وكنت مرهق ووقتها كان في نقص في الزملاء بعضهم مسافر وبعضهم شغال وكان في تيم منتظر والناس جاهزة ومابينفع اعتذر في الفاصل حسيت اني ماقادر اكمل فكلمت المخرجة قالت لي فاضل خبرين فقريت الخبر الاول وبعدها شفت طشاش ومابتذكر حاجة تانية وبعد داك شفت في الفيديو انو اغمي علي.

بعد عملك في تلفزيون السودان وقناة امدرمان هل كان حلمك بعدهما النيل الازرق؟

بل حلمي كان ولا زال ان انضم الي ال(BBC) فأنا اعشق فن الحوار واحب طريقة الحوار الكلاسيكية والنيل الازرق تعتمد الحوار السريع الخفيف.

يرى البعض انك تراهن علي شكلك فقط؟

والله ياخ انا ماشايف نفسي (مهند) بعتبر نفسي مذيع ومعد جيد وعلي قدر من الثقافة امتلك الالمام المعرفي وامتلك ملكة الحوار بشتى ضربوه فدي كلها حاجات بتكمل بعضها و بتصنع مني مذيع جيد من وجهة نظري وان كان دا مابينفي انو الشكل والهندام مطلوب.

وهل اهتمامك (بالبدلة) يأتي احيانا علي حساب المحتوى؟

اقول ليك حاجة شغلانتنا دي بتفضحك من اول كلمة بتنطقها وطوالي الزول البحضرك دا بعرف اذا انت فاهم ولا (بدلة) ساي.

هل بتعتقد انو المذيعات بياخدوا فرص اكتر منكم؟

لا أعتقد ولو حصل بعتقد انو المرأة ليها الاولوية هسي لو في المواصلات جات بت ركبت بعدك انت بتقوم ليها وبتخلي ليها مكانك بكل طيب خاطر.

دي مواصلات ودي مؤسسات اعلامية يعني المرأة زي الراجل؟

اداريا لا يوجد تمييز وعن نفسي لو زميلتي طلبت مني تقدم حاجة مفروض اقدمها انا وانا عندي معاها تعامل في الحتات دي بوافق طوالي ماعندي مشاكل.

لماذا شاركت في اعتصام قناة امدرمان علي الرغم من انك غادرتها؟

هسي الواحد لما يعرس ويمشي بقاطع ناس بيتهم؟ دا تماما شعوري ناحية ناس قناة امدرمان بحس اني ود البيت ولازم اقيف في اي مشكلة بتخصهم.

في اي صف انت بين مذيعين قناتك؟ وهل ترى نفسك نجما؟

سودانية24 لاتقيس بالصفوف وانت كنت اري انني تقدمت وتحسنت لأني جيت مذيع مغمور وقدرت اعمل حاجة كويسة في فترة بسيطة اما النجومية فهي مرحلة قادمة ان شاء الله وان كانت s24 فيها نجوم رائعين؟

زي منو؟

زي محمد عثمان محمد حاليا هو نجم السودان الأول؟

برأيك ماسبب نجومية محمد؟

بالاضافة لعمله وتعبه علي مشواره فمحمد شخصية جميلة جدا فمثلا منو مابحس انو محمد اخوهو ولا صحبو لانو بقابلك بعفوية وبشاشة.

ومن نجم جيلكم؟

نحن جيلنا لسة يادوب ببني في نجوميته وما اتكون لسة الشكل النهائي لنجوميته.

اقريت بنجومية محمد عثمان من نجمة سودانية24؟

شهد المهندس وهي جات نجمة من النيل الازرق وماركة مسجلة.

انت شخصية انطوائية وخجولة علي الرغم من عملك في مهنة تتطلب انفتاح اكثر؟

انا زول بحب الاعلام ومابحب شهرتو

تعرضت لمعاكسة من احدى الفتيات في احد الاماكن العامة في حضور عدد من الناس ماهي ردة فعلك؟

اتضايقت من الحاجة دي جدا بصراحة.

قالت ليك شنو؟

قالت دا المذيع الكسار.

في الماضي كان المعاكسة من الشباب وكان الشاب يجرم الحصل شنو؟

بالضبط كدا وعلي فكرة الموضوع دا منتشر حتي اسفيريا بيجي اسكرين شوت لحاجات زي دي كتير.

هل صحيح انك تفكر في الهجرة الي اوربا؟

عشت فترة من حياتي في اوربا وحاليا افكر في الهجرة قبل 2020 لأن الوضع اصبح صعبا خصوصا اذا كنت تعمل في مهنة ابداعية.

لماذا يتم ربطك دائما بزميلاتك ويتم اسمك بشائعات خطوبة وزواج؟

يمكن لأنو بتربطني علاقة مميزة جدا وان كانت اخوية ولكن لما يكون في انسجام وتعامل حلو دايما بتفسر انو حب او خطوبة او زي زمان بقولو ليك الطيب عبدالماجد خطب هبة المهندس وغيرهم من الثنائيات وانا علاقتي طيبة مع كل الزميلات.

عملت حلقات عن القبلية والملاحظ انك مابتحب القبلية والعنصرية؟

فعلا ما بحب القبلية وبكره العنصرية والحلقات دي كانت عن النكات البتبخس الاخر وبتققل من قيمتو و(ابكر) البتظهرو زول غبي ومابفهم مابحب الحاجات دي.

وادروب؟

وحتي ادروب انا ادروب من الشرق لكن مابحب اذكر الحاجة دي علي الرغم من اعتزازي بيها لاني زي ماقلت ليك ضد القبلية.

لماذا لاتمتلك برنامج خاص بك؟

حضرت برنامج وكنت ح اقدمو رمضان وهو انتاج خاص بس الظروف ماساعدت ولأنو الوضع المادي العام مامساعد.

وما مصيره؟

ح اقدمه ان شاء الله بعد العيد.

حدثنا عنه؟

ماعايز احرقو لكن عشان عارف ماحتخليني ح اقول ليك انو بهتم بالسياحة.

كل اخبارك وشائعاتك مرتبطة بالحب والزواج عشان كدا لازم اسألك عن مواصفات شريكة حياتك؟

هي شريكة واحدة للحياة كلها؟ اذا ربنا قال اربعة ليه اقول شريكة وعن مواصفاتها فما جمال بس لانو الجمال دا حاجة نسبية وممكن تجذبك حاجات في الطرف التاني الناس ماتشوفها.

عندك نية التعدد يعني؟

دي حاجة ربنا حللها وبعد داك اي شي بجي بظروفو.

حتخوف منك الجنس اللطيف؟

ابدا دا شرع

من الاربعة ممكن وحدة تكون مذيعة؟

ممكن دي مهنتي وممكن تكون مهنتنا سوا وعندنا اصدقاء كتار متزوجين مذيعات وان كان كلو في علم الغيب.


لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

إغلاق
%d مدونون معجبون بهذه: