Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
اعمدة و أراءالرؤي -رؤى الطريفي

زول من نور

الرؤى – رؤى الطريفي

يا زول من نور..

ماليني غرام..

و أحلام و سرور..

يا زول ضواي في غبن الليل..

يا قمرة و نيل..

يا بسمة ف وش الهم و الخوف..

أنا صبري قليل..

و أيامي القبلك كانت بور..

يازول من نور..

 

يا ضحكة ف عز الوجع أفراح..

يا خير لواح..

يا أجمل من كل الفاتوك..

بنو من أوجاعك بُكراهم..

من غدر عيونهم شلت سماح..

و هدّيت بي صمتك دنياهم..

كت مرساهم..

اهدوكَ غرق..

ياخ انساهم..

قت لي: بغرق..

لو مدوا ايديهم للقيا..

و مالقو جواي من تاني براح…

 

يا زول من نور..

عايش في دنيا و لا شبهك..

انا بس البشبه فيك طيبك..

جيتك شان ريدي الفيك ندهك..

شان أبقى جراحك و طبيبك

جيتك والوجع الجواي يوت..

احكيلك دون احتاج لصوت..

أنا انده ليك و يخونني الصوت..

أنا أنده ليك و يخونني الصوت..

أنده ليك…

و يخونني الصوت.

جيتك شان عندك بلقى نَفَس..

يلحقني قبل ما قلبي يموت..

 

يا زول من نور..

تشبهني و تشبه حزن النيل..

ترويني قدر ما دموعي تسيل..

تسندني قدر ما زمني يميل..

لو خانو خطاي تبقالي دليل..

في عز الهم تبقالي الحيل..

تضويلي عيونك غُبن الليل..

درويش مجذوب في حولية..

سكران بذكر.. مشروق بالنور..

يا زول من نور

لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

إغلاق
%d مدونون معجبون بهذه: