وراء كل حب عظيم (نص) كيلو باسطة !!

قزاز ورذاذ – محمد الطيب الأمين
* (السقف) هو الحد الأعلى للأشياء وهذا معروف بالنسبة ليكم ..
* يقول ليك : (سقف الطموحات) ..
* وللأمانة العبدلله كان معجب جدا بكلمة (سقف الطموحات) ..
* كنت لما أسمع كلمة (سقف الطموحات) بشعر براحة نفسية كبيرة ..
* وحتى أكون صادقا ما كنت أعلم معنى هذه الكلمة ..
* في أول علاقة عاطفية بالنسبة لي إستخدمت هذه المفردة : (سقف الطموحات) ..
* وأحسب انني قد دخلت (قلب) تلك الفتاة بهذه العبارة التى كانت (رنانة) و(مدهشة) ..
* في العلاقة العاطفية الثانية إستخدمت كلمة (بغض النظر) وأيضا كان لها بريق ..
* في (البنيان) بنسقف (الأوضة) بالزنك أو بالعرش البلدى ..
* سقف الأوضة بيكون (الزنك) ..
* وفي هذا الزمان أصبح لا سقف للاوضة ..
* الأوضة ممكن تكون من (50) طابق ..
* عشان كده (البنيان) بقى ما عندو سقف معين ولا عندو حدود ..
* اصبح مفتوح على السماء ..
* أنا داير اقول إنو أولاد جيلنا (خربوا سقف البنات) ..
* قول لي كيف ؟؟
* بوريك كيف ..
* قبل ثلاثة أيام إتصل بي صديق قديم وقدم لي الدعوة لأتناول معهم (العصير) في إحدى (فنادق) الخرطوم ..
* قلت ليهو : معاك منو إنت ؟؟
* قال لي : معاي زميلتي من أيام الجامعة ..
* المهم .. إعتذرت ليهو وقلت له : (خليها المرة الجاية) ..
* حاول أن يقنعني بالحضور وقدم لي كثير من المغريات أذكر منها قوله : (تعال بعزمك عصير الكباية بـ75 جنية) ..
* إعتذرت له مجددا ورفضت الفكرة ..
* الزول ده هيج فينا ذكريات قديمة لها علاقة بـ(السقف) ..
* زمان يا جماعة (سقف طموحات البت) هو (الباسطة) ..
* ولما أقول زمان بقصد قبل (17) سنة كده تقريبا ..
* ونحنا راجعين من (درس العصر) لما تعزم ليك بت (ربع باسطة) بتكون (قلبت الهوبا) ..
* والزمن داك كنا لا نأكل الباسطة إلا في حالتين أتنين .. الحالة الأولى لما (الفيلم) يكون (ما هندي) .. والحالة التانية لما الباسطة تقع من يد الشافع ..
* بخلاف ذلك لا نأكل الباسطة ..
* في أطفال صغار الواحد يكون بيأكل في باسطة ولما قطعة الباسطة تقع من يدو بيبكى وبيجرى يكلم أمو يقول ليها الباسطة وقعت وإتملت تراب ..
* إحنا وأولاد حلتنا كنا بنأكل باسطة الشافع ده بترابها ..
* كنا عايشين على الباسطة (البتقع من يد الشافع) ..
* عايشين على (الباسطة اللاصقة في ورقة الباسطة) ..
* كنا بنأكل (الورقة زي اللبانة لأنو فيها باسطة لاصقة) ..
* في الزمن داك (البت) لو عزمتها باسطة بتفتح ليك قلبها (ضلفتين) ..
* أنا ما عارف البنات كانن بيحبن الباسطة ولا الباسطة كانت (حلوة شديد) ؟؟
* كنا في الحدائق لما نلقى ولد قاعد مع بت وبيضحكو مع بعض بنعلق ونقول : دى أكلوها باسطة عشان كده بتضحك ..
* بنقول : (عاين ليها شكلها شبعااانة في الباسطة) ..
* إحنا كمان قايلننا ما بنعرف (ضحك) الزول الأكل باسطة ؟؟
* على بالقسم إحنا عارفين أي حاجة ..
* مرة عندنا صاحبنا هسه هو (ضابط في الشرطة) ..
* صاحبنا ده قدر ما رسل خطابات للبت العاجباهو رفضت ترد ليهو ..
* كل يوم يرسل ليها (خطاب) مكتوب بـ(قلم مُطعر) ..
* بتتذكروا القلم المعطر ؟؟
* الزولة دى أصلو ما ردت عليهو ..
* يوم من الأيام عزمها ليك (باسطة بحليب) والأمور ظبطت ..
* بقى في اليحلو منها ..
* بقت ليهو في رقبتو ..
* ربع باسطة بس ..
* وكباية حليب ..
* شوف الطموحات كانت كيف ؟؟
* يوم نأكل في الفطور (سكسكانية) وفي العشاء (باسطة) تانى يوم ما بنمشى المدرسة ..
* هسه الأولاد خربوا لينا طبع البنات ..
* رفعوا سقف الطموحات ..
* الباسطة في نظر البنات بقت زي (الطعمية البايتة) ..
* ما بتدهشهم ..
* لو عزمت ليك واحدة باسطة بتقول عليك متخلف ..
* قبل فترة عزمت لي (بت) باسطة قالت لي : (حرام عليك انت قايلني بلعب في الموردة ولا شنو) ..
* طبعا ما عرفت العلاقة شنو ؟
* المهم ..
* كل البنات الحبيناهم هسه بيكون عندهن (سكرى) بسبب الباسطة ..
* والله صحي ..
* لكن حاليا إتنكرن للباسطة ..
* الشغلانية بقت فراخ وتورتة وهوت دوق وبيتزا وعصير بـ(75) وانناس بالحليب وجوافة بالقشطة ..
* ده غير : (الأيبات والجلاكسى والآيفون واللاب توب والبرادو) ..
* خربوا لينا طبع البنات ..
* الواحد فينا بقي زول (عين) ساكت ..
* بنعاين بس ..
* بندي العين حقها وبنعمل نايمين ..
* السقف بقى عالى شديد ..
* حليل زمن الباسطة كانت (مفتاح للقلوب) ..
* هسه الولد بيجيب للبت تلفون بالملايين عشان كده البنات بقن يشوفن الباسطة عشرة عشرة ..
* أي قصة حب كان وراها (ربع باسطة) ..
* مش بيقول ليك : (وراء كل رجل عظيم إمرأة) ؟؟
* إحنا بنقول : (وراء كل حب عميق نص كيلو باسطة) ..
* يا أستاذة : لو ما الدنيا على بالنعمة (الزلابية) كتير عليك ..
* و..و..
* كنت جنبك أشيل همك و …(لقيت همك كلو في بطنك) ..
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1