قزاز ورذاذ - محمد الطيب

إحذر .. (اللقمة) دى ملياااانه سرطان !!

 

* الشعب السوداني تاريخيا عنده عشق خاص ليوم (الخميس) دون سائر الأيام ..

* بيقولو ليك (الجمعة طويلة) و(الأربعاء دمها تقيل) و(الثلاثاء جادة) ..

* هذه (العنصرية) التى نمارسها مع الأيام مارسناها من قبل مع (المدن السودانية) فسقط الجنوب سهوا .. 

* ولذلك نرجو ان تكون دارفور في نظر الحكومة والمعارضة هى مثل (الخميس) ..

* المذيعة السودانية (جديه عثمان) في سبيل ان تجد وظيفة في إحدى القنوات العربية المغمورة (قلعت التوب وفكت الطرحه) ..

* قد تكون حسابات جديه هى : (الغاية تبرر الوسلية) ، ولكن عليها ان تعلم ان (التعري) عمرو ما كان وسيلة مهما كانت مغريات الغايات ..

* أطلق الأستاذ حسين خوجلى مبادرة (أفتح دولابك) ، وهى مبادرة للتبرع بملابس الشتاء للفقراء والمساكين ..

* وقطعا هذا عمل جميل من زول جميل ولكن ..

* هؤلاء الفقراء يحتاجون لـ(الأكل والشرب) اكثر من حاجتهم لـ(البطانية والفانله) ..

* الزول الجيعان لو جاتو (نسمة) بيحس بيها (برد) ..

 

* والزول الشبعان في عز البرد ممكن يلبس (عراقي) ..

* وبما ان ذلك كذلك فعليكم بـ(بطُون الفقراء والمساكين) ..

* حينما تقرأ أسماء المذيعات السودانيات المرشحات لجوائز (نجوم العام) ستدرك ان (عامنا هذا بلا نجوم) ..

* كل مذيعة عملت ليها (بدره ولوكسيد) بيعملوها لينا (نجمة موسم) ..

* ديل ربما هم يختارون النجوم وفق جودة (البدره) و(نوعمة الجسم) ..

* عموما .. بحساباتنا إحنا نجمة العام هى (ليلى المغربي) الله يرحمها ..

* وعلى فكرة .. ليلى المغربي غير (الكُحل) ما كانت بتعمل حاجة تانية ومع ذلك هى (سيدة المايكرفون) ..

* وبعض مذيعاتنا (بيعملن اى حاجة في وجوهن) ومع ذلك هن تعيسات جدا أمام المايكرفون ..

* أنا والله مستغرب المذيعات ديل بجيبوهن من وين ؟؟

* جد مستغرب ؟؟

* معقولة مذيعة عندها عضلات ؟؟

* غايتو جنس غايتو ؟؟

* البرلمان السوداني ترك (الفراخ الفاسد وشحنة المخدرات الدخلت بورتسودان والسودانيين في مصر) وأصبح يتحدث عن مشكلة الرياضية التى تسبب فيها الإتحاد العام لكرة القدم ..

* هذا العبث والهبل الذى يفعله الإتحاد العام يمكن تجاوزه في (5) دقائق تنقص ولا تزيد ..

* جيب ورقة وقلم (حل الإتحاد) والموضوع انتهى ..

* حكاية (الفيفا) والعقوبات المتوقعة على السودان يجب ان لا (تخوف الحكومة) ..

* إحنا هسه بدون عقوبات من الفيفا (سجمانين ورمدانين) عشان كده خلى الفيفا تعاقبنا ونبقى (سجمانين ورمدانين) على حق ..

* مش على باطل ..

* افضل الفيفا تعاقبنا ونعرف اننا (ناس طير ساكت) هذا افضل من ان يعاقبنا الاتحاد السودانى الفاشل جدا ..

* والله صحى ..

* (الشاكوش) في البرد أصعب من شاكوش الصيف والخريف ..

* والكلام ده أنا بقولو (ما عن تجربة) لكن من خلال (رصد ومتابعة) ..

* وعندي قناعة إنو عزمي أحمد خليل كتب أغنية (عشان أهلك بخليك) في الشتاء ..

* عندي قناعة إنو الأغنية دى مكتوبة في الشتاء ..

* واى زول طبعا حر في (قناعاتو) ..

* المهم في الموضوع .. في (عواطف) دايرة (كبريت) عشان تشتعل ..

* وفي (نار) دايرة (عواطف) عشان تتخمد ..

* ولذلك علينا ان نحافظ على (درجة حرارة) العواطف في كل فصول الريدة ..

* وما تنسو .. الريدة بين الناس صله ..

* ورد في أخبار الأيام الماضية ان السلطات أبادت كميات كبيرة من الفراخ ..

* والفراخ المقصود ليس فراخا فاسدا وإنما فراخ مسرطن ..

* والصحيح ان نقول : (السلطات ابادت كميات من السرطان) ..

* وأنا والله كنت بتمنى من السلطات تعمل إبادة لـ(سيد الفراخ) وليس الفراخ ..

* كان تخلو الفراخ وتعملو إبادة لسيد الفراخ عشان نرتاح ..

* لانو سيد الفراخ ده ممكن يظهر لينا في حاجة تانية ..

* والله صحى ..

* ممكن يظهر لينا في (الطماطم) او حتى في البطيخ ..

* عشان كده كان سيكون جميلا لو (ابدنا) سيد الفراخ ..

* سيد الفراخ ده داير يعمل إبادة لمليون زول سوداني من خلال هذا الفراخ المسرطن ..

* الله يرحم الأخلاق والأدب والضمير ..

* الله يرحم الضمائر والله يلعن أبو القروش ..

* ناس عشان تعمل قروش ما عندها مانع إحنا نموت ..

* بتمشو وين من الله ؟؟

* الناس ديل ناسين القبر وناسين سؤال الله وناسين يوم لا ينفع فيه لا مال ولا بنون ..

* كل همهم الدنيا .. دايرين يركبو العربات على حساب صحة الناس وسلامتهم ..

* بستهتروا بحياتنا لانو في نظرهم حياتنا أرخص من (جزمهم وبناطلين اولادهم) ..

* ديل نسو الله عشان كده الله أنساهم أنفسهم ..

* هو عليك الله لو ما (قلة أدب) الشعب السوداني ده ناس فراخ مسرطن ؟؟

* وأنا دعوتي لسيد الفراخ ده ولكل سيد فراخ مضروب : أن شاء الله اى (لقمة) نحن أكلناها وفيها مادة مسرطنة ان شاء الله تظهر فيك اليوم قبل بكرة ..

* وحقنا بنلقى قدام ..

* نأكل فراخكم ده ونموت لكن لما نقيف قدام الله بنعرف نهاية الفراخ ده شنو ..

* قدام الله الحصانة هى العمل ..

* والدعوة للحكومة وناس الحكومة بأن يضربو بيد من حديد لأن استهتار التجار بصحتنا قد بلغ مرحلة لا تنفع معها الرحمة ..

* و..و..

* والله في ..

* أشهر بايرة في العالم هى (كوندليز رايس) وأشهر بايرة في السودان هى (البعرفها أنا) ..

* بمناسبة (البعرفها أنا دى) ..

* فنانة معروفة أكلت قروش المسجد ..

* والله صحى ..

* في (سيدات أعمال) من دولة الكويت سلمن الفنانة المعروفة مبلغ (21) ألف دولار لبناء مسجد حسب طلب الفنانة ولما أدوها القروش (ضربتهم وبقت ما بترد على تلفوناتهم) ..

* دى أكلت قروش الجامع يا مولانا ..

* قالت ليهن دايرة قروش لبناء مسجد ولما قبضت المعلوم دخلت السوق ولقطت التياب والاكسسوارت ..

* والله الفنانة دى هى وبتاع الفراخ في سرج واحد ..

* وتحت تحت إحتمال بتاع الفراخ يكون أحسن منها ..

* غايتو جنس غايتو ..

* (النطيط) الذى يمارسه الفنان صلاح ولي لن يصنع منه (محمود عبد العزيز) ..

* ولذلك على الأخ صلاح ولي ان يوفر طاقته ويُصلح حنجرته عسى ولعل في يوما ما يصبح (عاطف السماني) ..

* كل الشعب السوداني حفظ وردد أغنية أبوعبيدة حسن : (والله ما رضيناها ليك تغمر الدمعات عينك) ..

* أبوعبيدة حسن الذى اطرب هذا الشعب يعيش الآن ظروف بالغة التعقيد والأسف ..

* تنكر له الناس وإنفضوا من حوله ولم تبقى له إلا زوجته مشاعر التى تشاركه (غرفة تعيسة) في اطراف أم درمان ..

* قد لا يصدق أحد ان أبوعبيدة حسن حاليا يستخدم (شوال السكر الفارغ) بدل (مُصلايه) ..

* يشهد الله فنان السودان أبو عبيدة حسن في البيت الساكن فيهو ما عندو (مُصلايه) ويُصلى أوقاته الخمس في شوال سكر فاضى ..

* يحدث هذا في بلد فيه (ديوان ذكاء) و(صندوق دعم مبدعين) و(وزارة ثقافة) و(إتحاد فنانين) ..

* عيب والله يا ناس ..

* لا نملك ما نقوله حيال حالة أبوعبيدة سوى : (ياخى ما رضيناها ليك تغمر الدمعات عينك ورغم كل خصام وجفا برضو شفقانين عليك) ..

* في السودان تلفونات البنات أكبر من تلفونات الأولاد ..

* البنات عندنا بحبن التلفون الشاشتو كبيرة ..

* والحب ده ما جاء من فراغ ..

* قول لي كيف ؟؟

* بعض البنات بيحرصن على التلفون الكبير عشان يستخدمن الشاشة كـ(مرايا) ..

* وعلى بالنعمة إحنا عارفين اى حاجة ..

* وعارفين كمان المذيعة المتدربه البقت (24) ساعة قاعدة في مكتب مدير القناة ..

* عارفين والله ..

* البنات الواحدة تعمل ليك فيها خاشه الواتس وهى في الحقيقة بتعاين في الروج والظلال ..

* إحنا اولاد تسعة برضو يا حلوات ..

* حلوات بـ(الغاء) ..

* يا استاذة : عشان كده انت غير (تلاتين عشرة) ما بتستاهلى تلفون تانى ..

* و..و..

* وقالوا متألم شوية …(اوعى تكون ضربته ليك فرخه) ..

مقالات ذات صلة

اترك تعليقاً

زر الذهاب إلى الأعلى