* (90%) من الفنانات والمذيعات في السودان (يربطن في روؤسهن شعر الحكومة) ..
* وهذه إحصائية غير دقيقة ولكنها (شبه مؤكدة) ..
* الواحدة تلقى (شعر رأسها) أقصر من يوم الحزن ، وبين ليلة وضحاها تلقى شعرها بقي (في نص ضهرها) ..
* نلوم دولة الصين الشقيقة التي إستطاعت من خلال صناعتها لهذا الشعر أن تجعل (90%) من نجمات السودان (فاكات شعرهن الحكومي) ..
* الشعر تركيب والرموش تركيب والجسم تسمين واللسان تقليد ..
* بعض بنات بلادي بقن : (بنات تركيب) على غرار (تركيب العطور) ..
* غايتو في الزمن ده عشان تلقي ليك (واحدة ما تركيب) إلا تبقى (حاوي) والله أعلم ..
* في الخرطوم سبقت (المطرة) بساعات قليلة فتح أبواب المدارس وإنطلاقة العام الدراسي ..
* وعندما ذهب التلاميذ إلي مدارسهم وهم يكفكفون (البناطلين) ويحملون (الأحذية في الأيادي) ، عندما دخلوا المدارس إكتشفوا أن (الفصول) عبارة عن (أنهار) و(آبار) فإستحال الدخول وبالتالي فشل أول يوم دراسي في كثير من الأحياء الخرطومية بسبب المطر ..
* في السودان المطرة ممكن تأجل المدرسة وممكن تأجل العرس وممكن تأجل السفر ..
* وهذا تأكيد قاطع على أن العاصمة (قاعدة على الهبشة) من حيث البنية التحتية في جميع المجالات ..
* حاجة تكسف والله ..
* رغم أن صوتها جميل إلا أن هدى عربي تعتبر (فنانة مُملة جدا) ..
* هذا الملل ربما يكون سببه (هز الكتف) وربما يكون سببه أن هدى بقت فنانة بعد ما بقت كبيرة ..
* أقصد .. بقت معروفة بعد ما بقت كبيرة ..
* (13) شخص في السودان هم عبارة عن (ضيوف برامج) لثمانية قنوات فضائية سودانية خلال شهر رمضان والعيد ..
* (13) شخص فقط ..
* منعا للإحراج لن نذكر الأسماء ، ولكن كل القنوات الفضائية لم تخرج من إطار هؤلاء الـ(13) ..
* وهذا يمثل أعلى قمم الغباء ..
* غباء من أهل القنوات والمُعدين وغباء حتى من الضيوف أنفسهم ..
* لا يعقل .. بلد فيها أكثر من (30) مليون نسمة بينما قنواتنا الفضائية تتصارع في (13) ضيف لإستضافتهم (خريف ، شتاء وصيف) ..
* في قنواتنا … تتعدد الملابس والشخصيات واحدة ..
* مرات بتحس في ناس في السودان ده شغالين (ضيوف) ..
* والله صحي ..
* بجيك إحساس إنو الناس ديل شغلتهم الأساسية (ضيوف) ..
* وغايتو جنس غايتو ..
* أي دولة في العالم عايز تعرفها (وسخانة ولا نضيفة) شوف أقرب مستشفي ..
* المستشفي هو الذي يمنحك عنوان أي بلد في العالم ..
* وللأسف كله مستشفيانتا (وسخانة) أكثر من اللازم وهي من حيث الوسخ أقل درجة من (الحمامات) يا دكتور مأمون حميدة ..
* حاجة تكسف ..
* لم يعرف الناس أن شريف الفيحل موجود بكندا إلا عندما صرح شريف أمس الأول وأكد عودته ..
* ما عرفناهو سافر إلا بعد ما قال جاي ..
* وهذا يؤكد أن (حضور شريف الفيحل زوال) أو كما غني كابلي : (حضورو زوال) ..
* شريف لو قاعد ولا مافي كل واحد ..
* سيكون شهر (7) الجاري هو الشهر الأطول بالنسبة للموظفين ..
* (الماهية) إنتهت قبل إنتهاء العيد ، علما بأن العيد إنتهي أول يوم في شهر سبعة ..
* يعني (المرتب) إنتهي والشهر ياداب بدأ ..
* الله في ..
* (فاز) الكوميديان محمد موسى بـ(اللوتري) وهاجر إلي إمريكا وبالتالي (خسر) السودان شاب بارع جدا في (إضحاك الناس) ..
* الموهوب محمد موسى ظل ولسنوات طويلة يزرع البسمة في زمن الدمعة ويُفك (كرفسة) الوجوه بالبسمات الحلال ..
* نرجو التوفيق لمحمد موسى ونتمنى أن يتوفق (فخري خالد) في لوتري (إن شاء الله حتى في دولة تشاد) ..
* فخري ومعه مجموعة من (عاطلي الموهبة) هم الأحق بالهجرة وأمثال محمد موسى تحتاجهم البلد على الأقل حتى نحافظ على البسمة من الضياع ..
* بمناسبة الضياع ..
* يظن الممثل عوض شكسبير أن (الرشاقة) من مشتقات (خفة الدم) ..
* عوض شكسبير مسكين لا يعلم أن (الرشاقة) هي الأخت غير الشقيقة للعباطة وهذا ما لزوم التنويه ..
* الصداع النصفي أو (نصف الصداع) هو من الامراض التي أصبحت شائعة جدا ومؤلمة جدا ..
* والمصيبة أن كل من يشعر بصداع نصفي تجده يبلع (بندول ومسكنات) ..
* في ناس المسكنات دي يبلعوها زي الحاجة السمحة ..
* يحس بنصف صداع يجري جري يبلع بندول ..
* ولا بيتلفت ..
* والبندول يا كافي البلا ما جايب حقو ..
* تبلع ليك شريط بتاع بندول وتلقي الصداع زايد ..
* أنتو البندول ده صيني ولا شنو يا مأمون حميدة ؟؟
* أنا ما عارف الكعب البندول ولا كعب الصداع العندنا ؟؟
* غايتو في واحد كعب .. يا البندول ده صلاحيتو منتهية ويا كمان الصداع تتطور وأصبح أكبر من قدرات البندول ..
* بندول بـ(الساء) ؟؟
* يا أستاذة : شايفك من أكل الكافتريات عملتى ليك (جضيمات) ..
* و..و..
* ولو تعرف غلاوة الريد كنت …(شحنت بطارية التلفون) ..
