كتب:محمد الطيب الأمين
من قلبى من اجل المحبه وهبته ليك شعر الغزل
مع انو قدامى الطريق انا عارفو يا السمحه انقفل
مافى قسمه ومافى يا نور قلبى حتى بصيص امل
لا قدرته اقرب من ضراك ما قدرته لى بعادك اصل
* الحكومة قررت إيقاف التعامل بـ(الرقم الوطني) ..
* وانا اخشى ان تعتمد الحكومة (رقم العداد) بدلا عن الرقم الوطني وذلك من اجل اعادة (الضوء) لسد مروى (المضلم) ..
* نغمة اشعار رسائل الواتس بقت ثابته ومحفوظة زي (صفارة القطر) ..
* والله الواحد بقى لما يسمع صوت النغمة دى بضايق زي لما يكون سمع صوت ايمان لندن ..
* نغمة بتجيب للزول اخلاقو في طرف نخرتو ..
* النغمة بتجيب ليك اخلاقك في طرف نخرتك لكن صوت ايمان لندن بجيب ليك نخرتك في طرف اخلاقك ..
* حاجة تكسف ..
* واضح جدا إنو عثمان حسين لما غنى : (وريني ايه ضراك لو كان صبرت شويه) واضح المقصود فتاة إستعجلت في الزواج وعرست زول غير حبيبها الاول ..
* استعجال البنات من زمن عثمان حسين ولحدى الان هو سبب قتل كثير من قصص الحب الكبير الذى ما كان ينفصه شئ سوى (الصبر وعدم الشفقه) ..
* زوله تستعجل على سعادتها على حساب حطُام حياتك انت ..
* مرة عندنا بت في حلتنا ، البت دى اى ولد من اولاد الحله عندو (شاورما) في بطنها ..
* أكلناها شاورما لما لونها فتح ..
* وفي نهاية المطاف باعتنا عشان خاطر مغترب جا وجاب معاهو (خلاطة وبانسونك دبل كاسيت) ..
* عليك الله لو ما شفقه ساى في حب ببدلو بـ(خلاطة) ؟؟
* غايتو جنس غايتو ؟؟
* لما كنا (بنأكل مما نزرع) كان وزن الرغيفه يوازي حجم (الجوع) وحينما اصبحنا (نستورد مما نزرع) اضحت الرغيفة اخفه من (كيس النايلون) ..
* الرغيفه بقت (عينه ونموذج) ..
* الواحد فينا بقى اول ما يقوم من النوم بيشرب الشاي ويأكل (كيس عيش) بعد داك بفطر ..
* زمان يا جماعة الزول لو جيعان بقرض ليهو رغيفه واحده ، هسه لو جيعان بتقرض ليك كيس رغيف بعد داك تنتظر (الوجبه) ..
* وبرضو تقول لي (حماية المستهلك) ؟؟
* مستهلك بـ(الفاء) ؟
* في صمت شكى عمنا السنوى الضوى من المرض وغادر الى القاهرة في هدوء الكبار ..
* والمرض سلطان ولكن السنوى الضوى هو احد سلاطين العاطفة النبيله والغناء الرصين ولذلك هو سيقهر المرض بالصبر الجميل ..
* ولا نملك إلا ان نقول لعمنا السني الضوى : الدوله والحكومة في كثير من الاحيان تشجع المرض حتى ينتصر على عافيه المريض (6- صفر) ونحن لا نملك إلا الدعاء لك بالشفاء العاجل والعودة وانت (ملياااان عافيه) يا رب ..
* اولاد ادم نافسو بنات حواء في (الكريمات والتي شيرتات ونوعمة الجسم) ..
* وبنات حواء نافسن اولاد ادم في (البناطلين والمخدرات وسوء الألفاظ) ..
* وبما ان ذلك كذلك إحنا واولاد حلتنا بقينا ما بنفرز الراجل من المرا إلا بـ(الشنب) ..
* بمناسبة الشنب دى .. انا عندي ملاحظة ..
* لاحظت إنو الكديس العندو شنب لما يشرب لبن شنبو ما بشيل لبن ..
* لاحظت كده ..
* واى زول طبعا حر في (ملاحيظو) ..
* وعلى فكرة .. ما في زول بقدر يقول لي ليه لاحظت كده ..
* انا حر ..
* مرة جاتنا ضيفة في البيت زيارة ..
* الضيفة دى مما قعدت في السرير قعدت تعاين للحيط الاربعة ..
* أ تقول شغاله مهندسة ..
* تعاين ليك في الحيطة زي الحرامى البيجى زيارة تفقديه ..
* تتخيل الزوله دى كانت بتعاين للحيطه ليه ؟؟
* كده إتخيل ؟؟
* كانت بتفتش للعداد دايرة تشوف كهربتنا كم !!
* والله صحى ..
* انا ما عارفها بتستفيد شنو لكن شمار كده داير تعرف كهربتنا كم ..
* الشمار ده على بالقسم مما طلع من (حله الخدره) وبقى حايم في الحله إحنا ما ضقنا عافية تانى ..
* الناس من الشمارات لما بقو (ضعاااااااف) ..
* غايتو جنس غايتو ؟؟
* قبل ان تزيد معاصينا كانت (المطرة) في اليوم بتجى مرتين او تلاته وكانت الارض تشرب ونحن نلعب والمجارى سالكه ..
* وبعد ان كترت معاصينا اصبحت المطرة في الشهر بتجى مرة والارض عطشانه والمجارى مليانه بـ(اولاد الحرام) و(اللقطاء) و(المشردين) ..
* والخرطوم اذا لم تنتبه لهذه المجارى ستجد ان الذين يسكنون فيها اكثر من الذين لا يسكنون فيها ..
* المجارى بتاعتكم دى ما بتصرف موية المطر ولذلك هى عباره عن (خندق) لممارسه (16) نوع من انواع الجرائم الكبيره ..
* اردمو المجارى دى وخلونا نغرق اصلو كده كده إحنا غرقانين ..
* بمجرد إنتهاء برنامج (اغانى واغانى) انتهت صلاحية الاستماع للفنانة هدى عربى ..
* صلاحية لمدة شهر ..
* حليل حنان النيل الاعتزلت قبل ست سنين ولسه هى الفنانة الاولى ..
* على فكره ..
* عيد الضحيه باقى ليهو (20) يوما ..
* ومع اقتراب الاضحى جاتنا فكرة ممتازة جدا ..
* فكرت وقررت اتشترى لي (جلد خروف) ..
* تشترى جلد خروف ساكت كده ..
* تقوم تجيب الجلد تختو في البيت وكل يوم تشترى ليك (ربع لحمه) ..
* تجيب ربع اللحمة تدخلو جوة جلد الخروف ..
* كل يوم تجيب ربع كيلو بعد شهر بتلقى نفسك مليت جلد الخروف لحم ..
* وشرطا اللحم يكون لحم بقر لانو ارخص من لحم الضأن ..
* يوم العيد تجيب جلد الخروف المليان لحم بقر وتختو تحت الشجرة وتجيب الصينيه جمبك وتفتح الجلد وتطلع اللحم وتختو في الصينية ..
* تعيش احساس انك ضابح ..
* في النهاية ممكن تعلق الجلد في الباب عشان الما بيشترى يتفرج ..
* دى اسمها الطريقة الذكيه لعيد الضحيه ..
* ضحيه في عينك ..
* انسب مكان للكضب (الكافتريات) وانسب مكان للبوبار (بيت البكا) وانسب مكان للنميمه (المقابر) ..
* نحن نفعل (الخطأ) في المكان (الصاح) ولذلك حياتنا الغاليه بقت مرتكزه على الثلاثى الخطير (الكضب ، البوبار والنميمه) والعياذ بالله ..
* والله تشوف الناس بتكلمو في المقابر وبتونسو تلحلف تقول ديل جو دفنو ليهم (شتلة شجرة عنب) ..
* الناس ناسيه الموت لكن الموت ما ناسينا يا حبيبي ..
* المذيعة البليدة هى تلك التى تغلط في اسم الضيف ..
* والمذيعة البتغلط في اسم الضيف طوالى اعرف إنها دخلت القناة بـ(الشباك وليس الباب) ..
* والدخلن بالشباك على قفا من يشيل ..
* معقولة مذيعة بتلغط في الضحك ؟؟
* اول مرة في حياتي اشوف لي زول بيغلط في الضحك ..
* والله العظيم انا مستغرب المذيعات ديل بيجيبوهن من وين ؟؟
* جد مستغرب ..
* الرصيد في (داخلية البنات) اهم من العشا ، والعشا في (داخلية الاولاد) اهم من (اللحاف) ..
* وبمناسبة الداخليات ..
* انتشار الداخليات داخل الاحياء والاسواق يحتاج لمراجعة لان هذا السكن غير المريح فيهو خطوره للطرفين ..
* الرجاء اعادة النظر واختيار المكان المناسب لسكن الطلاب ..
* ونركب صافنات ونجيبه (كسلاويه) واصلو الزول بموت والذكرى تفضل حيه ..
* يا استاذة : جضومك ديل انا على بالقسم عندي فيهم (كراع فرخه) ..
* و..و..
* وما نسيناك جاي تعمل ايه معانا بعد ما …(جبت الآيفون) ..
