أخبار الرئيسية (سلايدر)ريبورتاجلقاء الاسبوع

الجدي (محمد بشير الدولي) : أتعرض لحرب شرسة

تجربتي منفصلة عن والدتي

وهذه طبيعة علاقتي بمذيعة النيل الأزرق (نورهان)..!!

حوار: ملاذ ناجي

فنان شاب صاحب قبول جماهيري عريض برز نجمه في وقت قصير واصبح حديث الناس بسبب موهبته الواضحة للعيان وجدت اغنياته الخاصة انتشارا كبيرا في اوساط الشباب وبات حاضرا في كل المناسبات الفنان (محمد بشير جابر) الشهير بالدولي التقته المجهر في حوار البوح والصراحة وخرجنا منه بالآتي:

بداية هل كان لنشأتك في بيت فني دورا في قرارك بأن تصبح فنان؟

اكيد طبعا من صغري وانا بحب الغنا وبحب ادندن وكانت في فنانين كبار بشيدو بصوتي لكن حسيت فعلا انو عندي صوت وممكن اغني لما الفنان (محمود عبد العزيز) له الرحمة قال لي يامحمد انت صوتك جميل وحتبقى فنان وظهرني معاهو في برنامجو في قناة الشروق.

ولماذا لم تغني من وقتها وتواصل؟

لأني كنت عارف انو والدتي ربنا يحفظها ويطول عمرها ما حتوافق الا اخلص الجامعة دا كان شرطها انو نخلص جامعاتنا وبعد داك اعمل الانا عايزو وعملت ليها الطلبتو الحمد لله.

هل حذرتك والدتك الفنانة (حنان بلوبلو) من عالم الفن ام عبدت لك الطريق؟

مابعتبر نفسي بعيد من الوسط لانو هي في الوسط وانا قريب منها ورغم كدا حذرتني من انو المهنة صعبة وانو ح اشوف كتير ولازم اصبر واواصل.

عبارة (بسمعوك عشان ود حنان بلوبلو) ما رايك فيها؟

بعتبر نفسي من اكتر الفنانين البتعرضو لحروب ودا طبعا دليل نجاح وفي ناس بتحاول تدمرك وتقلل من شأنك وتدخلك في حروب نفسية كبيرة جدا ودا نسبة لاني حققت انتشارا وشهرة كبيرة في وقت قصير وانا مطرب قائم بذاتي ووالدتي ربنا يحفظها مطربة قائمة بذاتها والعايز محمد بشير المطرب بجيبو والعايز حنان بلوبلو المطربة برضو ممكن يجيبها تغني ليهو.

ماهي الحروب الاخري التي تتعرض لها؟

قبل فترة كان في ناس متخصصين بس يشيلو صوري يغيرو الوان البدل البلبسها لألوان غريبة مثلا مرة مغيرين لي لون بدلة بنية للون الاصفر ودا كلو عشان الناس تشتمني فقط لكن سبحان الله محبة الناس كل يوم بتزيد ويمكن دا عشان انا ما بأذي زول وبتعامل بنيتي البيضاء.

وهل تساعدك والدتك في اختيار النصوص التي تغنيها؟

بستشيرها في النصوص لخبرتها طبعا ولأنها بتعرف الغناء المناسب معاي كما ان شقيقتي معزة لها نظرة ثاقبة في اختيار الاغاني.

ولماذا تركز علي اغاني السيرة والحماسة؟

لحبي لهذه اللونية منذ الصغر ولأنها تتماشي مع صوتي كما ان هذا اللون ميزني عن غيري من الشباب.

اغنية (الجدي) واللغط الداير حول انها ليست ملكك؟

الاغنية ملكي وهي من كلمات سحر ميسرة وصورت العقود ونزلت صورها للاثبات.

انت من الشباب القلائل الناجحين في الحفلات الجماهيرية رغم ان ظهورك لم يمضى عليه وقت طويل؟

اول مرة كان ليالي ماكنتوش وحقيقة انا اتفاجأت من كمية الجمهور والناس مع اني كنت متخوف ومأجل الفكرة لحدي ما اعمل غنا خاص اكتر واشتغل لسة علي مشروعي الفني لكن بعد نجاح الحفل دا وبعدو حفل راس السنة الحمد لله بقيت مواصل في الحفلات الجماهيرية اضافة للمواصلة في مشروعي الفني.

لماذا انسحبت من برنامج (نجوم الغد) بعد ان خضت التصفيات الاولية وقبل ان تظهر في الشاشة؟

حسيت اني عايز ابدا براي واستشرت وقتها الفنان (كمال ترباس) في اني اظهر في نجوم الغد ولا لأ فقال لي شوف الانسب ليك وانسحبت وما طلعت اصلا في الشاشة من البروفات وطلعت.

وماذا عن اغاني واغاني؟

اتصلوا علي للمشاركة في اربعة حلقات من الموسم السابق ولم يعاودوا الاتصال مرة اخرى ونشوف الحيصل شنو في المواسم القادمة ان شاء الله.

وماذا عن حلقة (عيدية) في قناة الشروق؟

من اجمل البرامج الاشتغلتها وكان معاي فيها الاستاذ الصحفي الكبير (الزبير سعيد) وهي من اعداد أنس المسلمي واستضافو فيها الوالدة ايضا وقدمت فيها اعمالي الخاصة.

محمد البيتوتي (ايام الجامعة) هل يختلف عن محمد (الفنان) اليوم؟

صدقيني مافي اي اختلاف لو ما شغال حفلة ولا في الاستديو ولا في بروفة بكون قاعد في البيت بحفظ في غنا وبقرا وكدا زي زمان واكتر وبعيد كل البعد عن الشلليات ودوشتها وماعندي زمن ذاتو لأنو مرات بكون عندي اكتر من حفلة في اليوم.

صور العربة المحطمة التي انتشرت اسفيريا مرفقة بتعرضك لحادث سير ما مدى صحة الخبر؟

اشاعة ما عارف مصدرها ولا سببها وبعتبر الحاجات دي ضريبة شهرة ما اكتر.

هل بتأثر فيك الحاجات دي؟

ابدا بنساها بمجرد ما اشوف محبة الناس واتصور معاهم واشوف فرحهم بحس اني بعمل في حاجة لو تمنها اشاعات اصلو مامشكلة.

بعض الفنانين الشباب السبقوك فنيا بأعوام عديدة بغنوا غناك في الحفلات مارايك في الامر؟

ماعندي مشكلة ودا نجاح لي وفي منهم بوروني ودا دافع لي اني اعمل غنا تاني ناجح عشان يغنوا لي.

وهل انت بتغني غناهم؟

في بدايتي قبل مايكون عندي غنا خاص كنت بغني غنا غيري ممن سبقوني تجربة وعمر فني مثل ترباس وندي القلعة والطيب مدثر وزكي عبدالكريم وغيرهم.

هل في فنان بقلدك؟

انتي عارفة انو فنان بقلد فيني بنفس شكل غناي ونفس شكل المزيكا وبرسلو لي الناس وبسمعو وبضحك بس وبعملو لي (تاقات) في بوستاتو بقولوا لي تعال شوف الفنان دا بقلدك في النهاية القبول من الله وربنا يوفق الجميع.

عداداك اربعين مليون يامحمد؟

والله انا بتماشى مع الناس وعمري مارديت زول الا اكون محجوز ولا شغال والناس دي كلها عارفاني بغني للعندو وللما عندو وبقدر ظروف الناس لحدي اخر شي.

انت مغرور ام متواضع؟

انا متواضع جدا وح اتغر في شنو الناس بالناس والكل برب العالمين بحب جدا اتواصل مع الناس في الفيس بوك وفي الحفلات لخلص الحفلة وبحب اتصور مع الناس وعمري ما تعاملت بتعالى مع زول ولا ممكن.

مواقع التواصل خدمت (محمد بشير) النشط اسفيريا؟

طبعا خدمتني جدا والقروبات قربتي من الناس وساهمت في انتشاري وانتشار اعمالي.

اهتمامك الكبير بمظهرك ماسره؟

بختار لبسي بعناية لأنو مظهر الفنان جزء اصيل منه.

ومن يساعدك في اختيار لبسك؟

براي وبشوف الازياء العالمية وبحب المختلف والمميز من الملابس.

معظم جمهورك من الفتيات والدليل صورك المنتشرة في القروبات النسائية؟

بعتبر جمهوري من الجنسين وفي النهاية كلو قبول من الله.

وماحقيقة علاقتك بمذيعة النيل الازرق (نورهان نجيب)؟

نورهان صديقة مقربة وبتحترمني وبحترمها بتحب غناي وانا حالف اغني ليها في عرسها.

انت مرتبط؟

مابفضل اتكلم عن حياتي الخاصة وان كنت حاليا مركز علي مشروعي الفني وماخد كل وقتي.

حدثنا عن حفلاتك الخارجية؟

في حفلتي في السعودية قابلت الشاب السعودي (معن) وهو شاب عاشق للغناء السوداني وكان بسجل فيديوهات بنزلها في الفيس بوك ووقف بعد ما لقى هجوم اسفيري كبير وعرفت انو هو من اكبر العائلات السعودية وحافظ كل غناي وغنا الشباب السودانين،،،، المهم كان عندي حفلات في قطر مع ميادة قمر الدين والامارات وغيرها من البلدان العربية والاجنبية.

اين انت من الاعمال الخيرية؟

مابحب اتكلم ومابشارك في عمل خيري فيهو كاميرات ولا هدفو الشو بعمل الخير البقعد لي وبساعد بالبقدر عليه وجاهز لأي عمل خير ما مصور وبعيد عن الاعلام.

ما طموحك؟

طموحي لا حدود له وان كنت بخلي الجاي دا علي الله وهو بدبر الامور.

وما جديدك؟

لدي تعاملات جديدة ومختلفة كما لدي تعاون مع هيثم عباس وسحر ميسرة ولدي عدد من الحفلات الجماهيرية كما احضر لفيديو كليب بمواصفات عالمية سيرى النور قريبا ان شاء الله.

شكرا محمد..
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

زر الذهاب إلى الأعلى