آخر محطاتك

أنا ال بس بقدر اتحمل
جنونك و كل زلاتك..
و انا البفهم صخب صمتك..
و انا البعرف تفاصيل الوجع جواك…
و بقرا خبايا كلماتك…
أنا الحافظة اشتعالاتك..
سكناتك..
دموع روحك..
جراحاتك..
أنا الفاهماك بدون ما تبوح..
بحسك..
و بقرا حالاتك…
و في عز انطفاءاتك..
أنا البعرف متين او كيف..
اشعل فيك ثوراتك..
أنا الجواكَ و انت بعيد..
انا الحب الوحيد و أكيد..
وسط كل احتمالاتك..
أنا البهواك بدون أسباب..
انا البعشق عذاباتك..
انا النغم المدوزن فيك..
وقت يملا النشاذ كونك..
وقت عشم الغنا يخونك..
انا البحلم بدال عينيك..
بَرَجِّع للقلب دمو..
و بوزن فيكَ نبضاتك..
أنا الوقتين خطاك تفتر..
بشيلك و بمشي خطواتك..
و لو مال الطريق يوم بيك..
بعدلو و بفتحو قصادك..
ايا هادا الحبيب أعرف..
بإني جواك زي ذاتك..
على قدر البعاد أبعد..
و توه من ريدي و احساسك..
وقت حيل سفرك يتهدّ..
و تفقد في السكك ناسك…
فلا تفتش كتير جواك..
هواي أجمل محطاتك..
حنينك عارف السكة..
فما تهم لو غشاك ضلام..
او كترت متاهاتك..
ففي الآخر.. هواك جياب…
أنا..
آخر محطاتك..
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1