نورهان نجيب: النجومية ذكاء وصناعة و لهذا السبب انا مذيعة صف اول..!!

حوار: ملاذ ناجي

مذيعة مثيرة للجدل تخرجت من برنامج (ون اير) الذي يعطي الفائز فيه جائزة عبارة عن فرصة التدرب في قناة النيل الازرق التي انضمت لها بعد فترة التدريب لتصبح احدى مذيعاتها نورهان نجيب التقتها ريبورتاج في حوار الصراحة وخرجنا منها بالاتي:

في البداية مامجال دراستك؟

درست جامعة الخرطوم قسم الاعلام والفلسفة وتخرجت العام الماضي منها ودخلت الخرطوم بنسبتي وكنت من الاوائل المرشحين لدراسة السنة الخامسة.

كيف انضممتي لبرنامج (ون اير)؟

كنت في الاجازة ونزلت (ترينينق) في قناة امدرمان ولاقيت معدة اسمها هبة (عبدالقادر) فكانت بتكتب في خبر انو في مسابقة بتاعت مذيعين ومذيعات فقالت لي امشي اشتركي فلما مشيت كانت الخانات اتملت فطلب مني وضع رقمي احتياطي فاتصلت علي المنسقة في اليوم التاني وقالت لي في زول اتخلف اذا حابة اجي فمشيت واشتركت.

وبعد داك؟

المشتركين كانوا مية وعشرين طالب وطالبة من مختلف كليات الاعلام تم تصفيتهم من قبل لجنة التحكيم المكونة من عدد من الاعلاميين المخضرمين مثل البروفسير صلاح الدين الفاضل والاستاذة اسراء زين العابدين و استاذ عوض ابراهيم عوض ووصلت لآخر مرحلة بعد مراحل من التصفيات.

وهل كانت الجائزة ان تصبحي مذيعة في الازرق؟

الجائزة كانت ان يجد الفائز فرصة تدريب وبعد ذلك يتقرر مصيره علي حسب مدى استفادته من مدة التدريب وانا استفدت من التدريب واصبحت مذيعة في النيل الازرق.

الم تلعب الواسطة دورا في اشتراكك وفوزك في المسابقة؟

المسابقة منذ لحظة انطلاقتها وحتي لحظة اعلان فوزي كلوو كان علي الهوا وقدام الناس ومافي اي واسطة في الموضوع.

عادي برامج كتير علي الهواء والواسطة بكون ليها دور فيها؟

ابدا اساسا انا ماكنت بعرف زول عشان يتوسط لي واول لقاء لي مع خالد ساتي صاحب الفكرة والبرنامج كان البرنامج ووقتها ولاحتي ناس النيل الازرق مابعرف فيهم زول عشاان يتوسط لي.

مودة حسن قدمت الموسم الأول وهي مذيعة متمكنة لماذا قدمتي الموسم التاني وانت خريجة البرنامج؟

مودة مذيعة مختلفة واتمنى في يوم اكون زيها لكن قدرات المذيع ماليها دخل بهو مذيع من متين وممكن مذيع الليلة يفوت مذيع بقدم ليهو عشرة سنين عادي وادارة البرامج شافت انو انا الاصلح اني اقدم البرنامج لأني طلعت منو فبكون عارفة الاجواء وتفاصيل البرنامج فأنا مذيعة في القناة وخريجة البرنامج في نفس الوقت.

انتي مذيعة في القناة ولا متعاونة؟

دا مسمى وظيفي ما اكتر في النهاية انا مذيعة وشغالة في القناة وكل الاسماء الكبيرة هسي زي تسابيح ورشا ومحمد عثمان بدو متعاونين.

هل كان حلمك النيل الازرق من البداية؟

النيل الازرق هي الرائدة حاليا وان كان احلامي لا حدود لها وقد تصل للعالمية.

انتي مسيرة ام مخيرة؟

كلنا كمذيعين مسيرين بناء علي سياسات الدولة وسياسات القنوات.

لو جاتك عروض من قنوات اخري بتوافقي؟

حاليا انا مرتاحة جدا في النيل الازرق.

حتي لو كان العرض المادي افضل؟

انا ما ببحث عن المادة ووضعي الاقتصادي كويس فبفتش عن الجو المريح.

بتعتبري نفسك شخصية عامة؟

طبعا ومعروفة في الشارع العام بالإسم.

شايفة انك قدمتي مايجعل منك شخصية عامة؟

طبعا والناس بتتذكر لي البرامج القدمتها بالاسم.

الاغلبية يرون ان شهرتك اسفيرية اي انك اشتهرتي عبر مواقع التواصل اكثر من الشاشة؟

النجومية ذكاء وصناعة وكيف الزول يبقى نجم ويخش من ياتو مدخل دا ما مهم وشريحة السوشال ميديا شريحة مهمة جدا ولا احد يستطيع نكران ذلك ولا تستطع فرض وجودك وسيطرتك الا اذا كنت انسان قوي لأنك بتتعامل مع فئات مختلفة.

انتي مذيعة وعندك براحات في قناة كبيرة كيف تعترفي بإنو نجوميتك اسفيرية؟

انا نجمة سوشال ميديا قبل ما اكون مذيعة وقبل كدا استضافوني في النيل الازرق بهذه الصفة قبل ما انضم ليهم.

نجومية السوشال ميديا مافرقها من وجهة نظرك من نجومية التلفزيون؟

نجومية التلفزيون خاضعة لرقابة كبيرة علي الجميع من الكبير للصغير والسوشال ميديا تكفل كل الحريات المطلقة ورسالة التلفزيون اكثر جدية وعلي فكرة نجومية الاسافير دي ماحاجة ساهلة محتاجة جهد وطاقة ونفس بارد.

انتي اخر زول ممكن يكون نفسك بارد؟

كوني برد علي الناس وما بسكت علي حقي ما معناها انا نفسي ما بارد المشكلة وين اذا رديت.

المشكلة انك اعلامية وواجهة لقناة وواجهة لنفسك؟

ما لازم الرد يكون كعب ممكن الرد يكون بطريقة ظريفة وعادية وعموما انا زولة مسالمة مالم زول يهبشني.

انتي زولة بتاعت مشاكل؟

حكمتي بناء علي شنو

اقرب حاجة بناء علي مشاكلك في القروبات لازم يكون كل فترة في بوست حدودو الفين تعليق فيهو شكلة طرف فيها نورهان؟

ماسألتي نفسك ليه بحصل كدا؟

انت بسألك انتي؟

لأنو انا من حقي طالما في زول اتهجم علي اني ارد عليهو ليه الناس بتفرض علي اني ادعي المثالية دا حقي وعمرك سمعتي اني غلطت علي زول لكن لما تجيني لحدي عندي اضمن تماما اني اخد حقي كامل.

بوست اللون والبلبلة التي احدثتها ماذا عنه وماسببه؟

انا كتبت بوست قلت (نحن بقى عندنا عقدة لون) ومحتاجين تدخل اطباء نفسيين لسة عند كلمتي.

انتي قلتي (البنات) بقى عندهم عقدة لون؟

قلت نحن والبوست قاعد ممكن نرجع ليهو.

انتي عقدة لون؟

لا ما عندي

طيب معناها طلعتي نفسك؟

انا قصدي كلنا بقى عندنا عقدة دي لونها فاتح ودي لونها غامق ودي نضيفة ودي ثقافة مستلبة وكلنا بنعلق لكن ما لدرجة الهوس.

بوست واحد جاب ليك عداء من عدد كبير جدا من البنات هل شايفة انك اتسرعتي؟

لو كلمة الحق بتجيب لي عداء خليهم يعادوني ماعندي مشكلة.

بتفتشي المشاكل عشان تشتهري؟

عمري ما اختلقت مشكلة عشان اظهر.

شهرتك سببها شكلك ام محتواك؟

بل سببها ثقافتي ومحاولتي للتطور ومحتواي ولو علي شكلي انا ماسمحة شديد بشوف شكلي عادي وعلي فكرة انا بقدم اهم برامج وبرامج صعبة مابدوها لأي مذيع زي ال(bn fm) الهو عبارة عن ثلاثة ساعات علي الهواء وبرنامج تفاعلي مع جمهور واتصالات مباشرة ماعارفة المتصل حيقول ليك شنو وعلي فكرة هو اصعب من مساء جديد لأنو ب(سكريبت مفتوح).

لماذا توقفتي عن تقديم مساء جديد؟

خيرت بينه وبين الاف ام واخترت الاف ام لأن نسبة مشاهدته اعلى.

هل عندك الامكانيات انك تقدمي برنامج خاص بيك؟

اكيد وبرنامج (امراة من طراز خاص) كان مفروض يكون للتلفزيون لكن لأنو برنامج حاد جدا و بناقش القضايا بوضوح وشفافية مابينفع يتعرض في التلفزيون لأنة الرقابة في التلفزيون كبيرة وانا ما عندي استعداد اعدل فيهو عشان كدا وديتو الاذاعة وهسي بقى برنامج اذاعي اسبوعي اذا بعد دا كلو شايفين انو انا مذيعة خاوية فبعد دا الناس تراجع نظرها.

وليه ماعملتي فكرة تانية؟

عشان عايزة لما اقدم اعمل برنامج بخدم قضايا الناس ماعايزة اقدم غناء ولا شعر ولاكدا محتاجين برامج حقيقية واحسن لي اقعد كدا من اقدم برنامج استفز بيهو الناس لأنو دا ما وقت بتاع غنا لأنو في النهاية الاعلام دا رسالة وبإنو يعكس هموم الناس وبصراحة الترفيه عندنا اوفر في القنوات.

علاقتك كيف مع زميلاتك؟

كويسة شديد وانا اجتماعية من الطراز الاول وعلاقتي قوية مع زميلاتي في كل القنوات ما بس النيل الازرق.

عيد ميلادك والضجة التي اثيرت حوله؟

عيد ميلادي دا حدث عادي وانا كل سنة بحتفل بي عيد ميلادي ما فاهمة المشكلة وين في اني اعملو واعزم اصدقائي من الاعلاميين دا شي طبيعي وعادي بعدين انا اصغر وحدة في الوسط الاعلامي يعني مافي غرابة في احتفالي دا ولسة كل سنة ح اعمل عيد ميلادي وحقي افرح بي يوم مولدي والدنيا بختها بي.

ردود فعلك عنيفة علي الصحفيين زي الفي عداء من ناحيتك ليهم؟

اقول ليك حاجة انا اصدقائي من الصحفيين اكتر من المذيعين بكتيير جدا والعندي معاهم عداء يتعدو علي اصابع اليد الوحدة وحاولو يعملو نجومية من خلالي.

من هي افضل مذيعة في النيل الازرق حاليا؟

مودة حسن

ومن نجمة النيل الازرق؟

تسابيح ومودة علي اختلاف تجربة مودة من تسابيح اذ ان تجربة تسابيح قديمة وتجربة مودة حديثة وهما تجربتان محترمتان جدا.

اداريا في صف انتي بين المذيعات؟

انا مصنفة نفسي مذيعة صف أول بدليل تقديمي لأصعب برامج القناة البشتغلوها مذيعات الصف الأول.

خطوبتك المفاجأة علي الرغم من استبعادك سابقا لفكرة الزواج في الوقت الحالي؟

فعلا ما كنت مفكرة في الموضوع حاليا لكن الزول الاخترتو مساعد وداعم لي ولما اقتنعت انو الخيار صحيح اقتنعت و النصيب لما يجي مافي حاجة بتوقفو.
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1