اعمدة و أراءقزاز ورذاذ - محمد الطيب

مذيعة تشرب (الوسكي) قبل الدخول للأستديو !!

قزاز ورذاذ -محمد الطيب الأمين

ليه فجأة دون أسباب 
من غير عتاب أو لوم 
إخترت غيري صحاب 
وأصبحت قاسي ظلوم 
هان ليك فراقي خلاص 
وانا برضي حولك أحوم 
كان عهدي بيك ترعاني
وأجمل صلاتنا تدوم 
أمل المحبة سلام 
بعدك أماني هواي 
يا ما جنيته عدم 
ولا عرفت صديق 
لي قلبي غير الهم 
كم غيري يشدو سعيد 
وأنا في هواك مغرم
ما اظني انساك
ومن العذاب اسلم

* تلاشي المغني محمد البدوي أبو صلاح سريعا بعد أن تألق بترديده لاغنيات (جده) وأغنيات عثمان حسين ..
* محمد البدوي الذي هو ماهر جدا في العزف علي العود لم يتم اعداده بالشكل السليم حتي يصمود أمام النجومية والشهرة ولذلك سقط الان سهوا وكذلك (الشاب سعد) ..
* من حسنات (الطفل) محمد البدوي أبو صلاح أنه (يضرب) أوتار العود بشكل إحترافي أكثر من صلاح أدريس الذي يحبو الأن ببطء نحو السبعين من عمره ..
* صلاح أدريس حصل علي الموهبة بعد (الأربعين) ..
* وهذه تسمي (الموهبة المتأخرة) وهي أشبه بي (الخرف المبكر) والله أعلم ..
* موهبة زي (الصلعة الوراثية) بتجي بعد الاربعين ياكافي البلا ..
* عندما كانت الدنيا بخيرها كان (الدولاب) أربعة ضلف ..
* والان أصبح الدولاب من ضلفتين ..
* وذات الدنيا لما كانت بخيرها كان (الدولار) بجنيهين والان اصبح الدولار بـ(15) جنيه!!
* لا أعرف من الذى تغير (الدولاب والدولار ولا نحنا ولا الجنيه) ؟؟
* ولكن الحاجة الأنا متأكد منها أنو الجنيه بقي ما بيجب (موية فول) ..
* موية الفول بقت بجنيهين ..
* في بربر قالوا أن (لص) سرق عشرة منازل في ليلة واحدة ..
* شكلو (الليل) في بربر طويل حبتين ..
* ليل بربر زي ليل العاشقين ..
* الكويس أن الشرطة قبضت علي هذا اللص (النشيط) ..
* الفنانين الشباب يترددون علي (البوتيكات) أكثر من (الفنانات) ..
* زمان مافي (راجل) بيدخل ليهو بوتيك وهسه أخشي أن أقول : مافي (بت) بتدخل ليها بوتيك..
* من لوازم (الرجوله) الخشونة و(الغباشة) ..
* الراجل لازم يكون خشن وذلك لان (تنعيم الجسم) من صفات النساء ..
* علي بالقسم و(إنتو ما طالبني حليفة) .. نحنا زمان لما نشوف ولد شايل (منديل ورق) بنضحك فيهو ..
* والعجب لو شفنا ولد (بيطقطق) لبان ..
* هسه بقينا نشوف الولد شايل (علبة البودرة) في شنطة اللاب توب ..
* حاجة تكسف ..
* أكبر خسارة تلقاها الوسط الفني كانت (7\ صفر) بخروج الفنانة المذهلة أسرار بابكر التي أعلنت اعتزالها سرا ..
* أسرار تملك صوت عجيب ورهيب ومع ذلك توقفت ، وناس مونيكا شغالات ..
* مونيكا هي اول فنانة في تاريخ الغناء تشتهر دون أن يحفظ لها أحد ولو (أغنية) ..
* في زول يا جماعة حافظ ليهو اغنية لمونيكا ؟؟
* هي مونيكا ذاتها ما اظن حافظة ليها اغنية ..
* كثير من الناس لم يندهشوا عندما علموا أن هناك مذيعة (بتشرب ويسكى) ..
* إحدى الصحف قبل فترة أوردت خبرا يقول أن السلطات قبضت علي مذيعة تحتسي (الوسكي) ..
* حليل بنات زمان .. الواحدة لو شمت ريحة (بنزين) طالع من (عادم العربية) بيغمى عليها ..
* بنات زمان الواحدة لو شمت ليها ريحة (صباع أمير) بتقع واقفة ..
* زمان ريحة (صباع الامير) بتسكر البنات ..
* طبعا نفسى أعرف (صباع الأمير) ده شنو ؟؟
* أنا عارف صباع الأمير لكن قصدي التسمية ..
* التسمية دى جات من وين ؟؟
* من هو هذا (الأمير) الذى أطلقوا عليه (الصباع) ؟
* ننتظر لاحقا ظهور (صباع الملك) ..
* قالوا في سعد قشرة ظهر (صباع) جديد إسمو (صباع شيبوب) ..
* وغايتو جنس غايتو !!
* الراحل عوض جبريل هو رجل متسامح مع نفسه ولذلك الشعب السوداني أحب أغنياته حبا صادقا ..
* وعوض كبير بصراحته المعهودة قال أنه كتب أغنية (لو تعاين ليها تملأ ود عينك) في زوجته ..
* تذكرت عوض جبريل وأنا أتابع قصة (المراهقة) التي يعيشها الشاعر الكبير هذه الأيام ..
* شاعر كبير (يتهابل) الآن و(يتكبكب) كلما شاهد (طرحة) دون مراعاة لسنوات عمره التي تطاولت ..
* نعم الحب ما عندو عمر ولكن أظن (الهبالة) و(الرشاقة) عندها عمر ..
* من حق أي زول يحب لكن من حقنا أن ننصح بعض كبار الشعراء من هذه الخفة التي تنقص من قدرهم ومكانتهم ..
* الكبير يجب ان يكون كبير ..
* الكبير كبير يامولانا ..
* علاقة البنات بالكريمات تبدأ من سن الـ(12) وتظل هذه العلاقة متينة وقوية حتى سن الـ(50) والله أعلم ..
* يصنع الصانعون وردا ولكن وردة الروض لا تضارع شكلا ..
* زهرة البلاستك ما زي الزهرة الطبيعية ..
* زهرة بـ(العاء) ..
* ونركب صافنات ونجيبا (بطحانية) وأصلو الزول بموت والذكري تفضل حية ..
* يا أستاذة : أنتي ما عندك غير (عبايتك) الواحدة دي ولا شنو ؟
* و..و..
* وحبيبي فاكر معايا وأنت … (مع ناس الفيس) ..

مقالات ذات صلة

زر الذهاب إلى الأعلى