اعمدة و أراءقزاز ورذاذ - محمد الطيب

 لو جاتك بالليل أوع تطردها !!

 

 
* إحصائية غير دقيقة ذكرت أن خمسة مليون مواطن سوداني يتعاطون ( ود عماري ) الذي هو (التمباك) ..
* خمسة مليون بيسفوا تمباك ..
* وأظن وليس كل الظن إثم أن خمسة مليون آخرين بيسفوا (التراب) ..
* وغايتو جنس غايتو ..
* نجمة الأدب العربي أحلام مستغانمي قالت إنها لا تثق في رجل (لا يبكي) ..
* وإحنا وأولاد حلتنا بصراحة كده مابنثق في بت (بتبكي) ..
* دموع الأطفال عندنا أغلى من دموع البنات ..
* (47) مليون هي تكلفة (الحاج) الذي يقصد (بيت الله) لأداء شعيرة الحج هذا العام ..
* المبلغ مخيف جدا و(كتير شديد) قياسا بالظروف الإقتصادية التي نعيشها في الوقت الراهن ..
* الحج وكما هو معلوم (فريضة) لمن إستطاع إليه سبيلا ، وقطعا أن هنالك كثير من الذين (يستطيعون إليه سبيلا) ، وبالمقابل هنالك من كان ينوي غير أنه لا يملك هذه الملايين الكبيرة ..
* العندو قروش يجب أن لا يتوقف ولا يبخل على أداء هذه الفريضة ، وحقيقة نتمنى أن تجتهد الحكومة في سبيل (رفع الجنيه) الذي (وقع) وأن تجتهد في سبيل تيسير تكاليف الحج للعباد ..
* وأوعدنا يارب ..
* في آخر حوار معاها قالت المذيعة نجود حبيب أن قدرتها علي الإقناع صنعت منها مذيعة جريئة ..
* أنا غايتو متابع نجود حبيب من زمن طويل وبصراحة لا شفت فيها جرأة ولا شفت فيها إقناع ..
* نجود مذيعة أكثر من عادية ولا تختلف عن زميلاتها إلا فيما يتعلق بـ(المكياج) ..
* مذيعاتنا ديل كلهن واحد .. الإختلاف فقط يكون في (شكل اللبس وألوان المكياج) ..
* المستوي واحد بإستثناء مذيعات لا يتجاوزن أصابع اليد الواحدة..
* اسوأ (خمسة) حاجات في الدنيا (ثلاثة) هي : جُرح الريدة ومسكول الصباح ..
* في ناس عندهم موهبة في مسكول الصباح ..
* والله صحي ..
* مسكول يجيك (6) صباحا ..
* مسكول على الريق ..
* ومسكول الريق ممكن يحرجك مع نسابتك ..
* بمناسبة المسكول ..
* من مفارقات الشعب الصيني أن الجالية الصينية في الخرطوم كلها تحمل موبايلات (سامسونج) ..
* لما أشوف لي صيني شايل سامسونج زي لما أشوف سوداني لابس) عقال(..
* يصنعوا لينا الهواتف الصينية المزعجة دي وهم شالين السامسونج ..
* حاجة تكسف والله ..
* الممثلة المصرية سمية الخشاب قالت في تصريحات لها : أرغب في عريس بخاف الله ..
* كلنا بنخاف الله يا بت الخشاب ..
* والإيميل أهو في الجريدة ..
* وكان سألتي بتصلي أنشاء الله ..
* وكان دايرة رقم التلفون برضو في ..
* جنس خِفة ..
* الفنان مأمون سوار الدهب لا يزال فنان (خام) ..
* مأمون الذي (كسر الدنيا) في أول إطلالة له عبر (أغاني وأغاني) ظهر حتى الآن بـ(40%) من إمكانياته ..
* إذا (إشتغل) مأمون على نفسه أكثر سيكون هو الأول والثاني والثالث في ترتيب الفنانين الشباب ..
* بجانب مأمون سوار الدهب هنالك موهبة كبيرة للفتى أحمد فتح الله ..
* أحمد فتح الله صاحب موهبة كبيرة وصوت يعتبر (خليط) ما بين طه سليمان وأحمد الصادق ..
* سيكون لأحمد فتح الله مستقبل باهر إذا إنتبه لموهبته وعمل على تطويرها ثم حدد ملامح شخصيته الفنية ..
* وأهم من هذا لابد أن (يتخير) أحمد (الشلة) التى من حوله وذلك لأن كثير من المواهب (قتلتها) الشلة إما قتل (عمدا) أو عن طريق (الخطأ) .. 
* الفتاة تستطيع أن تنسي (قروش المواصلات) ولكنها لا يمكن أن تنسي (علبة البدرة) !!
* لو عايز تموت من الضحك شوف ليك بت داقاها مطرة وعاين لوشها مع الموية بيكون كيف؟؟
* حالة صعبة والله ..
* البروف مأمون حميدة وزير الصحة قبل الخريف قال ان وزارته إستعدت بشكل جيد للخريف .. 
* بشكل جيد كيف يعنى ؟؟
* قال : وفرنا علاج الملاريا لكل مدن السودان ..
* الوزير قال وفر علاج الملاريا لكل مدن السودان ..
* هكذا أستعد وزير الصحة للخريف ..
* أنا كنت بفتكر أنو مأمون حميدة أذكى من ذلك ..
* كنت بتوقع إنو سعادة الوزير يفكر فى (مكافحة البعوض) وليس في توفير العلاج للذين (يعضيهم) البعوض ..
* كل الذي قدرت عليهو وزارة الصحة هو توفير العلاج ..
* إحنا نمرض ونجى نتعالج ..
* البعوض كما هو ، والمجاري والخيران ( أريح سكن ومحل مناسب لتكاثر البعوض وحفظ النوع من الإنقراض ) فقط (العلاج متوفر فى كل مدن السودان والقرى) ..
* يعنى لو أنت نايم وجاتك بعوضة أوع تطردها !!
* خليها تعضيك وقول ليها : مأمون حميدة قال العلاج متوفر فى كل مدن السودان ..
* ما تخافوا من البعوض طالما العلاج متوفر ..
* متوفر بـ(الهاء) !!
* يا أستاذة : (البعوض ده طلعو ليهو رقم وطني ولا لسه) ..
* و..و..
* ولو جارت عليك أيام تعال … (قيل معانا) ..
 

مقالات ذات صلة

زر الذهاب إلى الأعلى