اعمدة و أراءغير مصنفقزاز ورذاذ - محمد الطيب

 زي (عضم شليل) كل قيم شايلو زول !!

قزاز ورزاز – محمد الطيب الأمين
* يظن بعض الشباب أن (سب الدين) هو نوع من أنواع (الرجاله) .. والعياذ بالله ..
* وتظن بعض الفتيات أن (المنقة الخضراء بالشطة) نوع من أنواع (الأنوثة) .. وإستغفر الله ..
 * في السودان برامج (الغناء) و(الهجيج) تفرد لها مساحات معتبرة في القنوات ، بينما تتم محاصرة ومحاربة برنامج بقيمة (بنك الثواب) الذي يقدمه النجم الإنسان عبد الله محمد الحسن ..
* (بنك الثواب) أعلى قيمة من برنامج (المسامح كريم) الذي قدمه جورج قرداحي ..
 * كنت أتمنى أن تشترك كل قنواتنا السودانية في نقل برنامج (بنك الثواب) على الهواء مباشرة وفي توقيت واحد حتى (نُشرك أهل الخير) ونسهم في علاج المرضى المتعففين .. ولكن ..
 * قنواتنا تتنافس و(تُقلد) البرامج (الفارغة) ولذلك كان متوقعا أن يتم إيقاف (بنك الثواب) من قناة الخرطوم (المترنحة أصلا) ..
* أي إعتذار أو توضيح من هيئة إذاعة وتلفزيون ولاية الخرطوم بخصوص (بنك الثواب) غير مقبول ..
* قناة ترفض بث (بنك الثواب) وتشترط ، قطعا هي غير جديرة بالمشاهدة ..
* حاجة تكسف والله ..
* الإنتحار هو أن تدخل (السوق الشعبي) بعد (24) ساعة من هطول الأمطار ..
* سوق له (رائحة وطعم ولون) ..
* يا كافي البلا أسواقنا زي (حماماتنا) ..
* الله في ..
 * إذا توقفت مصانع (الكريمات) و(الخلطات) و(الجل) و(البدرة) ، إذا توقفت لمدة شهر واحد فأن الوسط الفني سيكسب خروج كثير من الأصوات والأجسام الغريبة ..
* كثير من أهل الوسط والنجومية (رأس مالهم) الفسيخ والجلخ ..
* لو ما (الكريمات) دي كان ممكن في كل خمسة سنوات تظهر مذيعة جديدة وفنانة جديدة ..
* لكن (كتر خير الكريمات) البقت تجيب لينا مذيعة في كل أسبوع ..
* طبعا (الفسخ) بيديهن دافع يبقن مذيعات ..
* وغايتو جنس غايتو ..
* في السابق كان عدد (المدارس) يحسب على أعصاب اليد الواحدة ..
* ولذلك ما كانت المدارس تحتاج لإعلانات ..
* اليوم عدد المدارس أصبح أكثر من التلاميذ وهو ما جعل إعلانات المدارس (كتيرة ومسيخة) ..
* في إعلان المدرسة بيقول ليك : ( أساتذة أكفاء وفصول مكيفة) ..
* أي مدرسة عايزة تعمل إعلان بتحرص علي حكاية (توجد فصول مكيفة) ..
* حتي أنني ظننت أن (التكييف) مادة تُدرس ..
* الإستثمار في التعليم هو الذي ألحق التعليم (أمات طه) ..
* ودي قصة واخرها لسه ..
* تراجعت بشكل كبير نجومية الفنان الشاب حسين الصادق خلال هذا العام ..
* حسين يحتاج لـ(خطوات تنظيم) فهو تجاوز مرحلة أغنيات (الكم) وعليه أن يركز على أغنيات (الكيف) ..
* (الكيف) أهم من (الكم) ..
* وما ينطبق على حسين ينطبق على شقيقه أحمد وعلى الموهوب منتصر هلالية وكل الشباب الجادين ..
* زمان لما كانت الدنيا بخيرها ..
* ولما كانت (اللحمة) ممكنة وفي متناول اليد كان (عضم شليل) هو نجم السهرة في كل الأحياء ..
* وكنا من باب (الإفتراء) لا نلعب شليل إلا بعضم بتاع (ضأن) ..
* نأكل لحمة الضأن ونلعب شليل بعضم الضأن..
*  ولما تدهورت الظروف وبقوا ناس الحكومة يصدروا الخرفان بقينا نلعب شليل بعضم (البقر) وبالضرورة بنأكل لحم بقر ..
* الآن اللحمة أصبحت (جميلة ومستحيلة) ولذلك أختفى العضم من الشارع وأختفى شليل من ليالي الناس ..
* شخصيا أري أن اختفاء لعبة شليل ليس بسبب تطور العالم ودخول الفضائيات وظهور ألعاب جديدة .. بل السبب هو أختفاء (العضم) نفسه وهذا بسبب اللحم الذي أتعزز عشان بالغنا في ريدو ..
*  من مواصفات (عضم شليل) أنه أبيض اللون ومتوسط الحجم وليس به رائحة والأهم من ذلك كله (كل قيم بيكون شايلو زول)..
* عضم شليل في كل قيم بيكون عند زول ..
* وبعض بنات حواء في (الريدة) هن مثل عضم شليل..
* كل يوم تلقاها مع زول جديد ..
* في الجامعة عندها حبيب وفي الحلة عندها حبيب ومن الأهل عندها حبيب..
* ولذلك الشاعر محمد الحسن أبنعوف في لحظة صدق عجيب (جابو اخرو) وقال :
القلب البريد بريد بالصح بكون معزول 
مفروز للحبيب ما بخشو أي عزول 
أنتي كريمة في الريدة وعشق مبذول 
زي عضم شليل كل قيم عند زول 
* أعتقد أن أبنعوف هو أفضل من أستخدم (عضم شليل) في الشعر السوداني والله أعلم ..
* منتهى الجمال يا أبنعوف ..
* قبل ثلاث سنوات كان شاذا جدا أن يرتدي الولد (كارينا) ..
* والآن حلت (الكارينا) محل الجلابية ..
* جلابية بـ(الغاء) ..
* وغايتو الله يكفينا شر (المُصدي) اللمعتو الأيام ..
* يا أستاذة : قلبك زي (البترينة)..
* و..و..
 * كلمنى قول ليا فاكر …(لما كنت ما عندك غير القميص المُشجر) ..
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تيليجرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1

مقالات ذات صلة

زر الذهاب إلى الأعلى