قزاز ورذاذ
محمد الطيب الأمين
مزروعة في جواي وانا زدت في شوقها !!
* الفيضان ..
* والفيضان إرتبط بـ(الأمطار) و(الخريف) ..
* و(السيل) هو اسم من اسماء (الفيضان) أو العكس صحيح ..
* نحن في الحياة العامة نحصر الفيضان في (الموية والخريف) ..
* ولكن الفيضان ممكن يكون في اى حاجة ..
* تعريف الفيضان هو : (الزيادة في الشئ دون الإرادة) ..
* أو قل : الزيادة غير المتوقعة .. هذا هو تعريف الفيضان بحده الأدنى ..
* ولذلك ممكن يكون هنالك فيضان في الحزن وفيضان في العاطفة والشوق وحتى الكراهية فيها فيضان ..
* زيدان ابراهيم (غنا) : (يا المشاعرك فايضة رقة) ..
* جميل جدا هذا التعبير .. (مشاعر وفايضة رقة) ..
* والمشاعر يفترض تفيض مشاعر لكن عند زيدان ابراهيم المشاعر فاضت رقة ..
* وهذا فيضان له فوائد وبالضرورة هو تعبير يحسب لصالح (زيدان) ..
* هسه النيل لما يفيض مرات ما بجيب موية ..
* مرة النيل فاض جاب ليهو (خشب) و(تماسيح) و(براميل) ..
* فاضت المشاعر وجابت ليها رقة ..
* في مساحة اليوم يطيب لي ان اقف عند واحدة من اجمل الاغنيات السودانية ..
* اغنية تُمثل حالة فريدة من حالات الفرح والتعبير الصادق ..
* أغنية كتبها الشاعر (ابراهيم محمد ابراهيم) ..
* هى : (لهيب الشوق) ..
* اسم النص .. (لهيب الشوق) ..
* والأسم في حد ذاته له (شنة ورنة) ولذلك الاخ ابراهيم كان موفقا في اختيار الاسم لحد بعيد ..
* اللهيب (حاجة ما كويسة) ، والشوق (حاجة كويسة) ، وربط اللهيب بالشوق ابرز قوة النص ..
* قال : (فاض بي لهيب الشوق) ..
* قوة النص وجماله زادته (حنجرة الحوت) قوة وروعة حتى صارت الاغنية (تاج على رأس) اغنيات الشباب ..
* علي المستوي الشخصي لا أنفي محبتي الكبيرة لهذه الأغنية ولذلك تجدني أعيد نشرها كل فترة ..
* يقول ابراهيم في النص :
ﻓﺎﺽ ﺑﻰ ﻟﻬﻴﺐ ﺍﻟﺸﻮﻕ ﻭ ﻣﺎ ﻋﺎﺭﻑ ﺃﺣﻮﺍﻟﻬﺎ
ﺍﻟﺤﻠﻮﺓ ﺳﺖ ﺍﻟﻨﺎﺱ ﻳﺎ ﺭﻳﺘﻨﻰ ﻓﻰ ﺑﺎﻟﻬﺎ
* الذى يحس بالشوق يرجو ويتمنى ان يكون الطرف الثانى يشتاق له بذات الدرجة ..
* يعنى القصة ما تكون شوق من (طرف واحد) ..
* عشان كده ابراهيم بواسطة حنجرة الحوت قال : (الحلوة ست الناس يا ريتني في بالها) ..
* (يا ريت) كلمة تفيد التمنى ..
* وهو يتمنى ان يكون في بالها ..
* هذا التمنى يكشف ان ابراهيم عندما كتب النص لم تتجاوز قصته العاطفية مرحلة (يا ريت) وهذا يؤكد ان العلاقة (برلومة) ..
* علاقة جديدة تقف في حدود (التمنى) ..
* ولكن مرات (العلاقة وهي في أولها) بتكون أعمق وأخطر من العلاقات القديمة ..
* لانو يا جماعة تأثير الحب والشوق ما عندو علاقة بالفترة الزمنية بل له علاقة بحجم الحب وكمية الشوق ..
* وللفنان القامة ود اللمين أغنية غير مشهورة تقول : (سبعة يوم واليوم سنة) ..
* وفي دنيا الحب (يوم الريدة بيعادل سنة) ..
* وهذا يعني ان العلاقة لو عمرها (10) أيام بحسابات القلب ممكن تكون (10) سنين ..
* المهم ..
* نرجع للهيب الشوق ..
* وياتى أبراهيم فيقول :
ﻣﺰﺭﻭﻋﺔ ﻓﻰ ﺟﻮﺍﻯ ﻭ ﺍﻧﺎ ﺯﺩﺕ ﻓﻰ ﺷﻮﻗﻬﺎ
ﻣﺤﺮﻭﺳﺔ ﺑﻰ ﻳﺎﺳﻴﻦ وﻗﻠﺒﻰ ﻣﻌﺸﻮﻗﻬﺎ
ﺯﻯ ﻧﻔﺤﺔ ﺍﻟﻴﺎﺳﻤﻴﻦ ﺳﻤﺤﺔ ﻭ ﺳﻤﺢ ذﻭﻗﻬﺎ
* قال : (مزوعة في جواي) وقصد بذلك تضخيم مكانتها في القلب ..
* وهذا تعبير يشبه : (جنبك ومشتهيك) و(انت معاي وانا مشتاق ليك) ..
* (مزروعة في جواي وأنا زدت في شوقها) مقطع يشابه المقطع الذى غناها محمود في اغنية اخرى حيث قال : (تمر الفكى السيدو شايلو ومشتهي) ..
* استفاد ابراهيم من الثقافة الدينية واستعان بـ(سورة يس) فمنحت النص جمالا ..
* محروسة بي يس وأنا قلبى معشوقها ..
* والذى تحرسه (يس) يكون في آمان وفي حفظ الله ورعايته دون شك ..
* ختم ابراهيم الكوبليه التانى بصورة جمالية قال فيها : (زي نفحة الياسمين سمحة وسمح ذوقها) ..
* الياسمين هو سمح من حيث الشكل والمضمون ..
* يعنى يا حبيبي ما ممكن تلقى ياسمين شكلو حلو وريحتو كعبة ..
* ما في ..
* الياسمين حلو شكل وحلو ريحة ..
* وهو شبه هذه الفتاة بـ(الياسمين) ليؤكد إنها (فتاة شكل ومضمون) ..
* ويقول :
ﻟﻴﻪ ﺍﻟﺤﻨﻴﻦ ﺩﻓﺎﻕ ﻭ ﻗﻠﻮﺑﻨﺎ ﻣﺸﺘﺎﻗﺔ
ﻛﺎﺗﻼﻧﺎ ﺑﻰ ﺭﻳﺪها ﻭ ﻧﺤﻦ ﻋﺸﺎﻗﻬﺎ
ﺍﻟﺮﻭﻋﺔ ﺳﺖ ﺍﻟﻨﺎﺱ ﺣﺎﺭﻗﺎﻧﺔ ﺃﺷﻮﺍﻗﻬﺎ
* تدفق الحنان فيه تأكيد على فيضان الشوق ..
* التدفق والفيضان هما (اخوان اولاد خالات) ..
* والاستعانة بـ(التدفق) تؤكد اصرار الشاعر على تثبيت (فيضان شوقه) وهو ايضا ظهر في قوله (قلوبنا مشتاقة وحارقانة اشواقها) ..
* يختم ابراهيم النص قائلا :
ﻧﺎﺭ ﺍﻟﻐﺮﺍﻡ ﻓﻰ ﺍﻟﺠﻮﻑ ﺯﺍﺩﺕ ﻟﻬﻴﺐ ﺍﻟﺸﻮﻕ
ﺍﻟﺮﻭﻋﺔ ﺳﺖ ﺍﻟﻨﺎﺱ ﺻﺎﺣﺒﺔ ﻣﻌﺎﻟﻰ ﻭ ذﻭﻕ
ﺯﻯ ﻗﻤﺮﺓ ﻓﻰ ﺩﻭﺭﻳﻦ ﻳﺎ ﻗﻤﺮﺓ ﻓﻰ ﺩﻭﺭﻳﻦ
ﺃﺻﻠﻮ ﺍﻟﺠﻤﻴﻞ ﻣﻌﺸﻮﻕ
* جميل جدا والله قوله : (نار الغرام في الجوف زادت لهيب الشوق) ..
* والنار العندها لهيب هى زي (الحيطة الليها ضل) ..
* نحن نعوذ بالله من النار العندها لهيب ولكن نستمتع بنار ولهيب الشوق ..
* ونار الغرام لما يظهر ليها لهيب تأكد إنك ستحترق إذا لم تعيش هذا الغرام ..
* (حلة الملاح) لو إستوت وما نزلتها من النار بتحرق ..
* والغرام لو ظهر ليهو لهيب لابد من ان (تعيشهو) ..
* اسوأ حاجة في (الغرام أبو لهيب ونار) إنك تكون (محروق) والبتحبو يكون (يدو في الموية الباردة) ..
* المهم ..
* خلاصة القول عند ابراهيم هى : (فتاة زى قمرة في دورين) ..
* بت عبارة عن (قمر 14) ..
* وبمناسبة القمر ..
* القمرة الهسه قاعدة تظهر دى لما تختفى وتظهر الشهر الجاي بنكون في رمضان ..
* قلت اذكركم عشان ما تنسو ..
* لهيب الشوق ده ما بيحلكم ..
* يعنى رمضان باقى ليهو (62) يوما ..
* باقي ليهو شهرين ويوم ويوم تاني يا حبيبي ..
* التحية للشاعر الجميل ابراهيم وللملحن الكبير القديل وللاسطورة محمود عبد العزيز ..
* لهيب الشوق ابدع فيها الحوت كعادته وجعل كل الشباب يحسون بالشوق حتى وإن لم يكن الشوق مشكلة عندهم ..
* والجميل ان الاغنية تحظى بكل هذا الحب والاستماع في زمن (الواتس والفيس والاختلاط في الجامعات) ..
* كل الاشياء والوسائل التى قتلت الشوق لم تقتل صوت محمود وهو يصدح بهذا النص الفاخر ..
* كنت اود ان اتحدث عن اغنية (خوف الوجع) ولكن لاسباب نفسية تحدثت بما تيسر عن (لهيب الشوق) ولنا عودة ..
* الرحمة والمغفرة للحاج محمود عبد العزيز ..
* يا استاذة : المرضان بشتاق للعافية وأنا شوقي ليك أشد من شوق المريض للعافية..
* والله صحي ..
* و..و..
* وليه الحنين دفاق و…(قلبي زي حوادث أم درمان) ..
