* معروف سلفا أن (البصلة المُعفنة بتعفن الشوال كلو) ..
* ويُستفاد من ذلك أن البصل (بيعادي) بعضه البعض ..
* خاصية (البصل) الذي (يعادي بعضه البعض) إنتقلت من (الشوال) إلي (بني الإنسان) وهذه (الخاصية) تظهر بشكل أوضح داخل الوسط الفني ..
* وأنا ما بفسر وأنت ما تقصر ..
* بعد غياب لسنوات طويلة عادة المذيعة تريزا شاكر عبر فضائية الهلال ..
* والجديد في عودة تريزا حتى الآن هو : (الثياب والطِرح والمكياج) ..
* تريزا عادة من حيث إنتهت ، أو هي إنتهت من حيث عادة ..
* غايتو واحد من الأتنين صاح ..
* من لطف الله أنه لم يجعل المطر (يوميا) في الخرطوم مثل سائر الولايات وإلا لكانت الكارثة أكبر ..
* في نيالا والدمازين والأبيض ومدني وكادوقلي تهطل الأمطار بمعدل ثلاثة مرات في الأسبوع ، وفي الخرطوم وفي عز الخريف تهطل الأمطار بمعدل (مطرتين) في الشهر ومع ذلك حدث ولا حرج ..
* الخرطوم بشكلها الحالي تحتاج لـ(سقف) يحميها من المطر أو تحتاج لـ(عرش بلدي) يخفف عليها الخطر ..
* والي الخرطوم عليه أن يُفكر في حكاية (السقف) دي ..
* حاجة تكسف ..
* النجومية والشُهرة التى حققتها (لوشي) في تلاتة شهور لم تحققها (ليلي المغربي) في عشرة سنوات ..
* لوشي صعدت قمة الشُهرة بـ(إسانسير الجمال) وليس بـ(سِلم الشطارة) ..
* وما بين (أسانسير الجمال) و(سلم الشطارة) ضاع الإعلام المرئي ..
* ودي قصة واخرها لسه ..
* كل العيوب الفنية التى أظهرها الفنان شكرالله عز الدين من خلال ظهوره الأخير عبر برنامج (أغاني واغاني) ، كل هذه العيوب لم تغطي على عيوب أفراح عصام ..
* شكرالله وأفراح يتنافسان في العيوب الفنية ومشاكل الصوت ومحدوديته ..
* وبما أن ذلك كذلك فمن حقنا ان نقول : (شكرالله وأفراح هما صمام أمان الوسط الفني في المركز الطيش) ..
* سجلت مدينة جبل أولياء أول حالة حرامي من (الجنس اللطيف) أمس الأول ..
* حيث تسلقت فتاة تبلغ من العمر عشرين عاما (حيطة الجيران) في تمام الساعة الثالثة والنصف صباحا وهي تحمل (بطارية) وذلك بغرض (السرقة الليلية) ..
* سرقة البيوت بالليل لا تعتبر حدثا جديدا ولكن ما هو جديد أن (تنط) فتاة الحيطة وتشرع في السرقة داخل بيت (مليان رجال) ..
* هذه تُسمى (قوة عين) مقرونة (بتحدي) ومخلوطة (بقلة أدب) ..
* النسوان بعد ما شاركونا في (لبس البناطلين والتي شيرتات وشراب السجائر والشيشة) ها هن يشاركننا حتي في (السرقة الليلية) المُحرمة حتى على الرجال ..
* يعني يا مولانا تاني انت تكون نائم في عز نومك تجي (مُزة) تسرق تلفونك وتسرق أنبوبة الغاز وتسرق (مُوتور) الموية وتبقى مارقة ..
* الغريبة البنات زمان بخافن من الحرامية وهسه البعض منهن بقن هن الحرامية ذاتم ..
* وغايتو جنس غايتو ..
* حتى وقت قريب كنت أظن ان (قرقوري) عازف بفرقة جمال فرفور ولكن عرفت من بعض الأصدقاء ان (قرقوري) فنان قائم بذاته ..
* انا أشكر هؤلاء الأصدقاء على تصحيح المعلومة ..
* المساحة الزمنية ما بين عيد الفطر وعيد الأضحى تستغلها قنواتنا الفضائية في إعادة برامج العيد ورمضان ..
* في هذه الفترة القنوات تتوقف عن إنتاج أي جديد وتكتفي بإعادة برامجها (المسيخة أصلا) ..
* هذا البرامج هربنا منها في العيد ومع ذلك تعاقبنا بها القنوات هذه الأيام ..
* الشئ الوحيد المتجدد في قنواتنا هو (نشرة الأخبار) ..
* في قنوات كده لو ما بيشوفها شينة كان ح يعيدوا لينا (صلاة التراويح) ذاتا ..
* والله صحي ..
* إسهل حاجة في البلد دي تعمل ليك (قناة) ناصية ، و(إذاعة) تاني ناصية ..
* وغايتو الله يكفينا شر (المُصدي) اللمعتو الأيام ..
* التاج مكي بصوته الجياش غني من كلمات حلنقي ما يلي : باقي الجميل تمو وأصلو العمر مرة وأنا كم وقفت معاك في الحلوة والمُرة أطرح جبينك لي خليهو ينفره أنت البيدور ضرك أن شاء الله ينضره
* هذا الكوبليه هو مربط الفرس في رائعة التاج مكي (فايت مروح وين) ..
* جميل جدا تعبير : (أطرح جبينك لي وخليهو ينفره) ..
* الجبين المطروح هو من علامة الرضاء والقبول ومحبة الإنسان للناس ..
* ولذلك إحنا وأولاد حلتنا نقترح أن تمنح الحكومة موظفين الدولة (نثريات) إبتسامة حتى لا يكشرون في وجوهننا ..
* تمشي عشان تقضي غرض يقوم الموظف (يكرفس ليك وشو) أ تقول عندو معاك مشكلة شخصية ..
* نادر جدا تلقى ليك موظف في الحكومة (طارح وشو) أثناء ساعات الخدمة ..
* طبعا الموظف بيزعل جدا لما يكون قاعد يلعب (ليدو) في التلفون وانت تجي تقيف ليهو في (الشباك) ..
* ما بين (الليدو) و(الواتس) يضيع الزمن وينتهي اليوم وتتعالى مقولة : (تعال بكرة) ..
* لكن .. الله في ..
* يا أستاذة : أول مرة في حياتي أشوف لي زول في الطين بيلبس كعب عالى ؟؟
* و..و..
* ومرت الأيام حبيبي ولسه …(بطاريتي بتنزل من أول مكالمة) !!
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تيليجرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1
