وأسألي الإدارة هذا السؤال

حوار: ملاذ ناجي

مذيع شاب بدأ حياته العملية بالتلفزيون الاوكراني الذي عمل فيه وهو ابن السادسة عشر ربيعا في فترة استقراره بروسيا عاد بعدها للسودان وتنقل بين قناة زول وفضائية الخرطوم قبل ان يحط الرحال علي الشاشة الزرقاء مذيع النيل الأزرق حذيفة عادل التقته ريبورتاج في دردشة وخرجنا منه بالآتي:

تقمصك لشخصية الشاب الأوربي ماحياَ بها سودانيتك؟

ضاحكا: انا ابن امدرمان وامدرمان الزمان يعني الاحياء الشعبية الفيها الجار بتعمل حسابو لأنو بيتدخل في تربيتك و ممكن يشاكلك ويوجهك وتعمل ليهو الف حساب زي والدك او اي زول من العيلة………

تأثرك بالغرب ثقافة وفكرا واضح علي الرغم من ان سفرك لروسيا واستقرارك هناك لم يكن منذ طفولتك؟

الفترة السافرت فيها دي هي الفترة البشكل فيها البني آدم شخصيتو.

تعترف اذا بعقدة الخواجة؟

ابدا….. لأن الأساس السافرت بيهو كان متين وبعدين البيئة الاتربيت فيها بيئة مرنة بتعلمك انك تاخد من كل مجتمع الصالح.

امدرمان الشعبية بدفئها ولمة الأهل وتدينهم وصقيع روسيا ووحدتها وانفتاحها سببا كافيا لخلق شخصية متناقضة؟

بل سببا كافيا لخلق شخصية متصالحة مع نفسها اولا ومع الاخرين ثانيا.

هل تتعامل مع الاخرين بمفهوم ود امدرمان ام مفهوم الشاب الروسي؟

انا زول ما بعرف النفاق الاجتماعي بغض النظر عن حتقولي لي اوربي ولا داخل في شخصية يعني بتعامل معاك لو بتهمني ولو في بتفع معاي ولو ما بتهمني ما بتعامل معاك والمهم بالنسبة لي دا بحرص علي وجودو في حياتي وبجاملك وبتحملك وغير كدا ومني الخاص بي ما مستعد اتبرع بيهو وان كنت برضو زول بعرف الواجب وبأدي واجبي في الافراح وفي الاتراح واتحدي اي زول يقول غير كدا.

الناس كلها شايفاك مغرور ومتعالي جدا؟

لأني قليل الكلام وبسمع أكتر

عندك صداقات في الوسط الاعلامي؟

عندي صداقات وعلاقات طيبة مع اغلبهم.

زي منو؟

مثلا مصطفي الشيخ ومحمد عثمان وسوركتي عبدالعزيز علاقتي بهم جيدة جدا وكل تيم النيل الازرق علاقتي بهم جيدة

من ذكرتهم اصدقاء ولا زملاء ؟

من ذكرتهم وغيرهم علاقتي بهم اقوي من الزمالة مع انو الفترة المفروض الواحد يكون فيها صداقات وعلاقات حقيقية انا ماكنت موجود في السودان وعموما العلاقات انواع وشتان مابين الصديق والصاحب.

انت بتاع مشاكل وردود فعلك عنيفة لا تتناسب طرديا مع الحدث؟

ضاحكا: أنا جعلي وقلبي حار وردة فعلي بتكون عنيفة لما زول يتعدى علي الثوابت الطبيعية المامفروض يتعداها معاي في النهاية نحن سودانيين وحرارة القلب دي فينا كلنا.

اين الشخصية الاوربية الباردة المسالمة هنا؟

انا اخدت من الشخصية الاوربية الانا عايزو وبرودهم دا بعرف استخدمو متين.

انت عايش بين روسيا والسودان مالفروقات التي لاحظتها؟

الفرق مية وتمنين درجة

اكتر حاجة لفتت نظرك شنو؟

لقيت بيئة صالحة خلتني وانا طالب في اكبر جامعات روسيا يناديني مدير الجامعة يقول لي انا عايزك تأسس مكتب جديد للادارة الطلابية تكون مسئولة من شؤون الطلاب الأجانب وفعلا اسستو وعملت المشروع بتاع العلاقات بين الامم وانا لسة طالب.

انت سوداني الم تعاني من العنصرية؟

العنصرية موجودة والمشروع المسمي العلاقات بين الامم عملته بسبب العنصرية وعندما انتهيت منو اقراهو مدير الجامعة انو يتقري كل سنة للطلاب الاجانب وطلب من ادارة الجامعة انو يتعمم علي باقي الجامعات في روسيا.

اسفيريا يلقبونك بجوكر النيل الازرق لعملك في برامج المنوعات والاخبار في ان واحد كيف تري نفسك انت؟

اري نفسي اجيد العمل في كل الاقسام ولدي القدرة علي العمل اي برنامج.

في النيل الازرق انت مصنف في اي صف بين المذيعين؟

لا تعليق واذا كان سؤالك عن التصنيف الاداري ممكن توجهي سؤالك للإدارة.

من هو نجم النيل الازرق حاليا بعد مغادرة سعدالدين ومحمد عثمان؟

سؤالك مفخخ ولا ارغب في الرد لأنني لا احب ان اقيم الناس.

ماذا يعيقك من تقديم برنامج خاص بك تثبت فيه قدراتك؟

انا موظف في القناة واقدم المهام التي توكل الي والبحدد انو اقدم شنو ادارة البرامج ما انا ويمكن هم شايفين امكانياتي في ما يوكل الي.

طيب ما فكرت تنتج لنفسك خارجيا وتبث في النيل الازرق فالامر متاح طالما توفرت الفكرة والرعاية؟

انا رافض الفكرة دي بتاعت اني اجيب رعاية عشان يتبث لي برنامج ممكن اقدم فكرة لكن اكتر من كدا لا.

بعد ستة سنين في تقديم مساء جديد كيف تراه والي متي ستظل في خانة المساء الجديد؟

انا ما بس قدمت مساء جديد في الستة سنين اشتغلت في كل الاقسام وممكن اقدم برنامج تاني في الفترة الجاية ان شاء الله.

وكيف ترى المساء الجديد؟

البرنامج مشاهد بنسبة كبيرة

عقدة سعدالدين هل تخلصت منها؟

تاااااااااني سعدالدين طيب انا ح اقول ليك حاجة اقسم بالله العظيم انا لمن جيت النيل الازرق واشتغلت فيها ما كنت بعرف انو في مذيع اسمو سعدالدين حسن ولا حتي شفتو في التلفزيون وكانو بقولو لي انت بتشبه سعدالدين وهو اصلا كان خلى القناة لقيت السودان كلو بقول لي انت بتقلد حسن.

حاسي انك بتستحق مكانة افضل من الانت فيها في القناة؟

اي انسان بشوف نفسو بيستحق الافضل دا شعور طبيعي.

من المذيعات تشكل معها ثنائية ناجحة؟

اتعامل مع جميع الزميلات بنفس القدر ونفس الود بدون فرز.

اتجاهك للكتابة الصحفية من خلال عمود راي ماهي اسبابه وهل تري ان الصحافة تعبر عن ارائك اكتر من الشاشة؟

احاول الكتابة عن ماهو مهمل وعموما الموضوع ما بالشكل الكبير داك وان كانت براحات الصحافة اوسع لأنك تكتب رأيك اما والتلفزيون فهي وظيفة عليك فيها بعرض المادة المعدة لأنني مذيع ولا ان تكون محايد تجاه الرأي والرأي الآخر.

سياسة الفصل الاخيرة في القنوات وخصوصا النيل الازرق ما رأيك فيها؟

دي قرارات ادارية وبتخص الادارة وفي النهاية دي قنوات خاصة يعني شركات واستثمار يعني صاحبها ممكن يقرر يقفلها عديل طالما هي ماجهة حكومية يبقي القرار الاخير لصاحب الشأن في لوائح وقوانين الناس بتتعامل بيها وفي النهاية برضو نحن بشر وما معصومين من الخطأ؟

ما رأيك في فصل زميلك محمد محمود؟

حقيقة ماعندي خلفية عن الحصل ولا تعليق.
شكرا حذيفة
لمتابعة الاخبار الفنية الثقافية زورو موقعنا الالكتروني صحيفة ريبورتاج:
صفحة الفيسبوك: https://www.facebook.com/reportagesd
تلغرام: https://telegram.me/reportagesd
مجموعة الفيسبوك: https://www.facebook.com/groups/85632…
تويتر:https://twitter.com/reportagesd1