ماهو باين فى العيون وين حنهرب منو وين الهوى البعث الليالى العامره بى ذاد الشجون يفتح قلوبنا ديار محبه ديار حياة للعائدين ما بنقاوم وكيف حنقدر وين نهرب منو وين * ترى ايهما أكبر : الفساد السياسي أم الفراخ الفاسد ؟؟ * الإجابة على هذا السؤال ستكون شافية وكافية في حالة واحدة بس .. * في حالة الفراخ ينطق .. * وطول ما الفراخ أبكم يبقى الفساد زي الهواء ما بتمسك .. * لم يكن سيف الدسوقي يحتاج لشائعة تتحدث عن موته فالرجل يعيش معاناه مع المرض كنا نتمنى ان تكون هى نفسها إشاعة .. * محبتنا لسيف الدسوقي جعلتنا نتمنى ان تكون (حقيقة مرضه) إشاعة ولكن .. * حتى مرضك يا سيف كنا بنتمناهو إشاعة فلماذا هؤلاء يباغتونا بموتك وانت بين الأحياء بسمة .. * نقول لكل ضعاف النفوس ان الموت حق ولكن أمثال سيف الدسوقي لا يستحقون الشائعات لان عشاقهم كُثر .. * الله يشفي مرضانين الشائعات .. * في (بيت العرس) زمان إحنا وأولاد حلتنا عندنا محبة خاصة جدا للبت البتكون ماسكة الدلوكة .. * كنا بنحب نعمل علاقات عاطفية مع البنات البيمسكن الدلوكة في بيوت الأعراس .. * وفي الغالب هن بنات من حلتنا .. * وأظن سبب محبتنا لبنات الدلوكة هو شعورنا بموهبتهن في (الدق) .. * كل بت من بنات حلتنا دقت الدلوكة زمان لسه بنذكرها بالخير وهذا وفاء منا لتلك (الأنامل) التى أطربتنا في زمن برئ براءة الغناء من إيمان لندن .. * لندن بـ(الفاء) .. * من جديد قررت الحكومة رفع الدعم عن المحروقات .. * تاني قامو رفعو الدعم عن حاجات اصلا الدعم مرفوع عنها .. * غايتو جنس غايتو ؟؟ * وانا والله لاحظت حاجة .. * لاحظت إنو الحكومة دي من الله خلقها (بترفع) لكن (ما بتنزل) .. * شغالين رفع بس .. * حاجة تكسف .. * شكرالله عز الدين بعد ما إتعصر في السوق اراد ان يعود للاضواء باغنية اسمها (حلاة لقِلق) .. * وشكرالله لو ما عارف إنو الساحة الفنية ما ناقصة سخف تبقى دي مشكلة ولو عارف تبقى مشكلتين .. * قال حلاة لقِلق قال ؟؟ * أكبر فرحة ممكن تدخل في نفوس الأُسر السودانية هى فرحة إستقبال مولود جديد .. * وفي هذه الأيام بالذات الأُسر السودانية تموت من الفرح حينما تشاهد (أنبوبة مليانة غاز في بطن البيت) .. * الانبوبة المليانة غاز في بطن البيت بتفرح ناس البيت اكتر من (بطن المرا) المليانة طفل .. * قبل أيام كان عندنا عرس في حلتنا .. * والعريس مغترب طبعا .. * اصلو الزمن ده ما في زول بيقدر يعرس إلا المغترب .. * المهم .. العريس ده النوع البيحب البوبار .. * الزفاف كان في الصالة .. * والمعازيم ما شاء الله تبارك الله (حلا وحمار) .. * العروس شدة ما حلوة كلنا جانا (سكري) .. * والعجب صاحبات العروس ؟؟ * مبالغة عديل .. * وحكمة الله حتى إصحاب العريس مبالغة .. * مبالغة في عينك .. * المهم .. العريس كان متعطر بعطر (الغاز) .. * أظنو في الكوفير فتح ليهو إنبوبة في (البدله والقميص) .. * أول ما تجي تبارك للعريس طوالى بتشم ريحة الغاز فايحة .. * وأنا بسبب ريحة الغاز الحلوة دى باركت للعريس (8) مرات وباركت للعروس (12) مرة مع إنو العروس ما متعطرة بعطر الغاز .. * خفه ساكت ورشاقة مني باركت للعروس (12) مرة .. * وانا حر .. أن شاء الله ابارك ليها ألف مرة .. * يعنى خلاص بقت على المباركة ؟؟ * هو إحنا غير (نبارك) و(نشم) ح نعمل شنو يعني ؟؟ * نحمدالله إنو إحنا لسه قادرين نشم .. * دى براها بالدنيا .. * ونبكي بس .. عين قطرة وعين مس .. * كثير من النهايات تشبه البدايات .. * وبعض البدايات لا تشبه النهايات .. * وكم كنا نتمنى ان تكون نهاية هيثم مصطفى بطريقة أفضل من هذه التى انتهت عليها فصول سنوات طويلة من العشق الكبير .. * إعتزل هيثم الكره رسميا وقرر السفر إلى الامارات لتدشين تاريخ جديد عبر بوابة التدريب .. * هيثم (ظلم) و(إتظلم) ولا نملك إلا ان نتمنى له التوفيق في مشواره الجديد ونرجو له حياة عملية سعيدة .. * رغم ان (الواتساب) قلل من المسكولات إلا ان كثير من البنات ما استطاعن التخلص من (المسكلة) والمسكولات .. * غايتو أنا ما لقيت حاجة اسوأ من إنو يجيك مسكول من رقم غريب .. * ويا ريتو لو مسكول واحد .؟ * الله يكفينا شر المسكولات وشر الما مسكولات .. * ورد في الاخبار ان المذيعة إسراء سليمان قد تم إختيارها (سيدة للشاشة) .. * ونحن قبل ان نبارك لأختنا إسراء هذا اللقب من حقنا ان نسأل سؤال واحد فقط : إنتو قاصدين ياتو شاشة ؟؟ شاشة التلفزيون ولا شاشة الموبايل ؟؟ * لو كنتو قاصدين (سيدة شاشة الموبايل) يبقى ما عندنا كلام والله .. * وللضمأن كده أنا بقول : الله يرحم ليلي المغربي .. * في بعض المستشفيات ممكن تلقى لبن الطير لكن ما بتلقى ضمير .. * والطبيب الما عندو ضمير من الأفضل له ولنا ان يفتح (طبلية) في الميناء البري .. هذا مع أكيد إحترامي وتقديري لكل أصحاب (الطبالي) في الميناء البري وفي كل مكان .. * زمان لما كنا صغار وحسب خيالي المريض كنت فاكر إنو قصب السكر بيزرعهو في السكر .. * يعنى كنت فاكر إنو (بذرة قصب السكر) بزرعوها في (ارضية من السكر) وليس أرضية من التراب .. * يعنى في الواطة بشتتو السكر (بدل تراب) وبيرمو بذرة القصب عشان تندفن في السكر المشتت في الواطة .. * كنت فاكر كده .. * واى زول طبعا حر في (افكارو) .. * وعلي فكرة .. والله العظيم ما في زول بيقدر يقول لي ليه إفتكرت كده .. * انا حر .. * علميا الجرح في الشتاء حار .. * وشفاء الجرح في الشتاء يختلف عن شفاء الجرح في الصيف وذلك من حيث الفترة الزمنية المخصصة لشفاء الجرح .. * الجرح في الشتاء يحتاج لفترة أطول حتى يطيب .. *وبما أن ذلك كذلك فنحن نقول لبنات حواء : (رفقا بقلوبنا ورفقا بشبابكم) .. * نقول لبنات حواء : لو لابد من الجروح نرجو ان تجرحونا في الصيف او حتى في الخريف .. * لما ظهرت شائعة (أبو القنفد) قامت ندى القلعة اشترت توب اسمو (ابوالقنفد) .. * وتوب ندى حسب ما تردد بـ(4 مليون 700) جنية بالقديم .. * والفنانة محاسن لقيمات دايرة تقلد ندى القلعة اشترت ليها توب (هزاز) بـ(195) جنية وسمتو توب (اب جعران) .. * سبحان الله .. اب جعران في نظر محاسن لقيمات ابو قنفد .. * حاجة تكسف .. * غايتو جنس غايتو ؟؟ * ونركب صافنات ونجيبه (هدندوية) وأصلو الزول بيموت والذكرى تفضل حيه .. * يا استاذة : ما تدي الزول اكتر من حقو عشان ما يديك بالباقي لبنان .. * و..و.. * وبرضو اسأل عن قلوبنا بتلقى فيها كنوز محبة وتلقى فيها …(العنكبوت ساكن عديل) ..
